Huib ǃaroma hâ ǀgores
1 Sa hîkākā-aotse! Sats ǂûts hîkākāhe tamatsa! Sa ǀhôagaotse! Sats khoe-i xare-i xa ge ǀhôagaoǃnâhe tama hâ itse! Hîkākātoats ka, ots nî hîkākāhe tsî ǀhôagaosib ǀkhats ga toa, ots sats tsîna nî ǀhôagaoǃnâhe.
2 ǃKhūtse, ǀkhomxa da re. Sats ai ta ge ra ǃâubasen. Mâ ǁgoas hoasa sida ǁkhauba-ao kai re tsî ǂōǂōsib ǁaeb ǃnâ sida ore-ao kai re. 3 ǁAedi ge kai ǂkhupiba di ga ǁnâu, o nî ǃkhoeni; sa ǁkhāsiba di ga mû, o di ge ǁaede nî ǀgaruǀgaruhe. 4 ǀÂǀhanats ge ǃkhūsibats ge ǂhomn khami ge ǀhaoǀhao; ǂhomn ǁîba ra ǀhao-ai khamin ge khoena ǁîba nî ǀhao-ai.
5 ǃKhūb ge ge ǀgapiǀgapihe, ǁîb ge ǀgapise ǁan hâ! ǁÎb ge Sionsa ǂhanu-aisib tsî ǂhauǃnâsib tsîkha ǀkha ge ǀoaǀoa. 6 ǁÎb ge ǁaposasib di ǀau, ǃnāǂamsa oresats ūhâ, tsî gā-aisib tsî ǁnâuǃāb tsîkha. ǃKhūba ǃaoǃgâs ge ǁuiba hōsa.
7 Mû, ǂnûǁkhaeba-aogu ge ǃgangu ǃnâ ra āma; ǂkhîb sîsabegu ge tsûtsûsase ra ā. 8 Kai daogu ge ǃū-aisase ǁgoe, ǃgû-aon ge ǁîga ǃaruǀî sîsenū tama hâ. ǃGaeǁaredi ge ge khôahe, tsî ǁîdi nūdi ge sorahe, tsî ǂgaoǀkhādi âde ge ǁauǁauhe. 9 ǃHūb ge ǃū-aisase ǁgoe ra ǃoa. Libanonni haidi ge taob xa ra ǂnâ. Sarons ge ge ǃgaroǃhū kai tsî Basanni tsî Karmeli tsîkha ge ǂnaregu âkha ge ǃhaebeǁnâ.
ǃKhūb ra ǁîb khākhoena ǃkhâikhom
10 Nētib ge ǃKhūba ra mî: “Nēsi ta ge tita nî khâimâ. Nēsi ta ge aitsama nî guisen; nēsi ta ge nî ǀgapiǀgapihe. 11 ǀGân ǂomaba du a ǀgamǀkhā tsî du ǀhōb ǀguiba ra ǁora; sadu ǀommi ge sado nî ǂhubiǂui ǀaes ase ī. 12 Khoen ge ǂhubi tsî nî tsaotsao, ǁkhūn hîa ǁhāǁnâhe tsî ǂhubiǂuihe hân khami. 13 Sadu ǃnūse hâdo tare-e ta ge dī ǃkhaisa ǁnâu tsî sadu ǀgūse hâdo ti ǁkhāsiba ǂanǃgâ.”
14 Sions di ǁore-aon ge ra ǃao; eloxoresan ge ǃaob xa xāǂgāhe tsî ge mî: “Tari-i sada di-e hapu ra ǀaeb ǃnâ a hâ ǁkhā? Tari-i sada di-e ǀamo ǀaeǁhabub ǃnâ a hâ ǁkhā?” 15 ǁNān ǂhanu-aise ûi tsî ǂhauǃnâse ra ǃhoan, ǁnān ǁgâiǀā-aon ǃkhūsiba ra ǂharan, ǁnān ǁamaǃkhunihesa ǂkhā tsî ū taman, ǁnān ǀaoǂnâxūs ǃaroma ǂgaedi âna ra ǂganamn tsî ǁnān ǂkhababan mû ǂgao tama, o mûdi âna ra ǂganamna. 16 ǁÎn ge ǁaposa ǃkhaigu ai nî ǁan; ǁîn ge ǃgareǀuigu ǃnâ ǂnôa ǁhoagu ǃoa nî ǁhaiǁhâ. ǁÎn ge hoaǁae ǂû-i tsî ǁgam-i tsîna nî māhe.
ǂKhaisa ǃgoaxaǁaeb
17 Sadu mûra ge gao-aoba ǁîb îsasib ǃnâ nî mû; ǁîra ge ǃhūb harase ra ǂapaǂoa ǃkhaisa nî mû. 18 ǃKharuǃnâ du ge tsâb tsî tsûba du ge ǂâihō tsî nî dîsen: “Xoamâi gereba mâpa hâ? Marib di ǃgomma gere ǀnōba mâpa hâ? ǂGō-omga gere ǃgôaba mâpa hâ?” 19 ǃAruǀî du ge ǁnâuǃā ǁoa du a gowaba ra ǃhoa ǃnâudanaxa khoena mû tide, ǁîn ge ǃkhā ǁoa du a ǃhao gowaba nî ǃhoa. 20 Sions, ǁîs ai da ǀgoreǀîs ǁâudīga ra dīsa kō re! Jerusalemsa du ge nî mû, ǃnōsa ǁanǃkhais, ūbēhe ǁoa tentoms, ankerǀurigu âs ge ǂgaeǂuihe ǁkhā tide tsî ǁîs tsurigu ge tātsē ǃgâu tide. 21 Xawe ǃKhūb ge ǁnāpa sida ǂama ǁkhāsib âb ǀkha nî hâ. ǂHaba ǃāgu tsî ǃārogu tsîn ge ǁîs ǃnâ-ū nî dâu, kai doe-om-i ǂharugu-aogu di-i tsî torodoe-om-i ge ǁîs ǃnâ-ū ǃkharu tide. 22 ǃKhūb a sida ǀgoraǃgâ-ao, ǃKhūb a sida ǂgaeǂgui-ao, ǃKhūb a sida Gao-ao xui-ao; ǁîb ge nî ore da. 23 Sadu tsurigu ge a ǃoposa; ǁîgu ge ǃkhaugu di haiga ǃkhōmâi ǁoa tamas ka io sailga ǁaposase ǃkhōǀgara ǁoa. Ob ge toroba xu ge ǀhanahe ǁuiba ǃnāǂamsase nî ǀgorahe; ǃhora khoen tsîn ge ǁnā ǁuiba xu nî ūbasen. 24 ǀGui ǁanǂgāsabe-i tsîn ge mî tide: “Tita ge ǀaesen hâ.” ǁNāpa ǁan hâ khoen ge ǁîn dīsade nî ǀûbahe.
© Khoekhoegowab Elobmîs © Bible Society in Namibia, 2020.
