1 Korinteǁîn 13 - Khoekhoegowab New Translation 2020 (KKG20)

ǀNammi

1 Khoen tsî ǀhomǃgāgu di gowaga ta ga ǃhoa, xawe ta ga ǀnamma ūhâ tama io, o ta ge ǀō ra ǀurise tamas ka io ǂnauhe ra simbalse ī. 2 Kēbo ǁkhā ta ka tsî ǂganǃgâsigu hoaga ta ga ǂan, hoa ǂans hoasa ta ga ūhâ tsî ǂgoms ǃhomga ta a gongonū ǁkhās hoasa, xawe ta ga ǀnamma ūhâ tama i, o ta ge xū tama hâ. 3 Ū ta hân hoana ǀgâsana mā tsî ta ga ti sorosa ǂhubihes nîse māǁnâ, xawe ta ga ǀnamma ūhâ tama i, o i ge tita xū-e harebeba tama hâ.

4 ǀNammi ge ǃnūǃnâxa tsî a ǃgâi, ǀnammi ge suri tama hâ, ǀnammi ge koasen tama tsî ǀgapiǂâixa tama hâ. 5 ǁÎb ge ǁgauoǃnâse tanisen tama hâ, ǁîb di ǃgâi-eb ôabasen tama hâ, ǃhaeseb ǀarakaisen tama tsîb ǁîb ǃoagu ra dīhe tsū xūna ǃgôakhâi tama hâ. 6 ǂKhabab ǃnâb ǃgâiaǂgao tama, xaweb amab ǃnâ ra ǃgâiaǂgao. 7 ǀNammi ge hoana ra taniǀnam, hoana ra ǂgom, hoana ra ǃâubasen tsîb hoana ra taniǀnam.

8 ǀNammi ge tātsē ǀuni tideba, xawe kēbodi di mās kao, ǁîs ge nî kā, ǃkharaga gowaga ǃhoas di mās kao, ǁîs ge nî ǀam, ǂans di mās kao, ǁîs ge nî kā. 9 ǃKharese da ǂan tsî ǃkharese ra kēbo xui-ao, 10 xawe dīǀoaǀoasib ga hāo, os ge ǃkhareǃkharesa nî kā. 11 ǀGôa ta ge i, o ta ge ǀgôa-i khami gere ǃhoa, ǀgôa-i khami gere ǂâi, ǀgôa-i khami gere ǀgora; xawe kaiǀoa ta geo, o ta ge ǀgôasi xūna ge ǀû. 12 Mûsenǃnâxūs ǃnâ da ge noxopa ǀhoese ra mû, xawe ǁnā ǁaeb ai ǃgāsase nî mû. Nēsi ta ǃkharese a ǂan, xawe ta ge ǁnā ǁaeb ai ǀoasase nî ǂan, tita Elob xa a ǂanhes ǁkhās khami. 13 Xawe nēsi ra ǃgaun ge ǂgoms, ǃâubasens tsî ǀnammi tsîna; tsî nē ǃnonan ǃnâ a kaib ge ǀnamma.