Elisab ge ǀgâsa ǃoatarasa ra hui
1 Kēbo-aogu ǀguib di ǃoataras ge Elisab tawa sī tsî ge mî: “Ti aob ge ge ǁō. Sats tsîn a ǂanseb ge ǁîba ge eloǃaoǃgâxa khoe i, xaweb ge nēsi ǁîb ge surude hâ i khoeba ti ôakha, ǁnā surudeb ǃaroma hā ǂgao, îb ǁîkha khobodī.”
2 Ob ge Elisaba ge dî: “Tare-e ta nî dība si? Mîba te re tare-es oms tawa ūhâsa?”
Os ge ǁîsa ge ǃeream: “Xū-i xare-e ta ūhâ tama, ǀgui xaparob di oli-i ǀgui-e ta ūhâ.”
3 Ob ge Elisaba ge mî: “Sa ǁanǁare-aon hoan tawa hō ǁkhās as kōse ǀkhaiǃnâ oli-i xapaga sī ǀkhupi, 4 î du ǁnās khaoǃgâ sas tsî ǀgôakha âs tsîdo oms ǃnâ ǂgâ, dao-amsa ǂganam tsî oli-e ǁnā xapagu ǃnâ ǂnâ tsî ǀoa gab hoaba ǀguiǀkhāb ai mâi.”
5 Os ge ǁîsa ǀgôakha âs ǀkha oms âs ǃnâ ǂgâ, dao-amsa ǂganam tsî oli-i xaparoba xu oli-e ǀgôakha ra mā si xapagu ǃnâ gere ǂnâǀoa. 6 Tsî xapagu hoagu ge ǀoa, os ge ǁîsa ǀgôakha di ǀguiba ǃoa “ǀGui xapaba noxopa hā-ūba te” ti ge mî, ob ge ǁîba “ǀNî xapa-i ge a ǀkhai” ti ge ǃeream. O i ge oli-e ge ǂnâǀû. 7 Tsî kēbo-aob Elisabas ge nēsa sī a mîba, ob ge ǁîba ǁîs ǃoa ge mî: “ǃGû, î oli-e sī ǁamaxū tsî sa surudeba matare. Sas tsî sa ôakha tsîdu ge ǃgauga-e xu a ûi ǁkhā.”
Elisab ge ǃkhū hâ Sunemǁîsa ra hui
8 ǀGuitsēb ge Elisaba Sunems ǁga ge ǃgû. ǁNāpas ge ǃkhū hâ tarasa ge ǁan hâ i tsîs ge ǁîba ge ǁkhau ǁîs tawab nî ǂûse, tsî ǁnā ǁaeba xub ge Elisaba ǁnāpab ga sī ǃnās hoasa ǁîs di oms tawa gere ǂû. 9 Tsîs ge ǁîsa aob âs ǃoa ge mî: “Tita ge a ǂan nē khoeb hoaǁae sam tawa ra ǀkhīb a Elob di ǃanu ao ǃkhaisa. 10 Am ǃnā-omrosa oms ǂamǃnâb ai om tsî ǁîba kharob, tāb, ǂnû-aiǃnaos tsî ǃnâs tsîna ǁnāpa mâiba, ob ge sam tawab ga hā ǃnās hoasa ǁnāpa a hâ ǁkhā.”
11 ǀGuitsēb ge Elisaba Sunems ǃnâ ge sī tsîb ge ǁnā ǃnā-oms ǃnâ ǂgâ tsî ge sâ. 12 Tsîb ge ǁîb di ǃgāb Gehasib ǃoa ge mî, îb Sunemǁîsa sī ǂgai. Tsî ǁîs ge hā, 13 ob ge Gehasib ǃoa ge mî: “ǁÎsa nētikōses go sakhoma ǂhansenba, o ta tare-e nî mādawa-am si ǃkhaisa dî re. ǀNîsis ge gao-aob tamas ka io toroǃkhamaogu ǃkhōdana-aob tawa ta sī nî ǃhoaba si ǃkhaisa nî ǂhâba.”
Os ge “Ti khoen ǁaegu ta ge hâ tsî ta ge xū-i xare-e ǂhâ tama hâ” ti ge ǃeream.
14 Ob ge Elisaba Gehasiba ge dî: “Tare-es kha ǁnâi a dībahe ǁkhā?”
Ob ge Gehasiba “ǁÎs ge aore ǀgôaba ūhâ tama hâ tsî aob âs ge ǀnai kaira hâ” ti ge ǃeream.
15 “ǂGai si, îs hā” tib ge Elisaba ge mî, tsîs ge Gehasib ge ǂgai si, o hā tsî dao-ams ǃnâ hā ge mâ. 16 Ob ge Elisaba ǁîs ǃoa ge mî: “Nē ǁaeb ǃgoaxa kurib dib ais ge aore ǀgôaroba ǃomkha âs ǃnâ nî ūhâ.”
Os ge ǁîsa “ǃGôahesatse, sats ge Elob aotsa xuige tā gāba te re” ti ge mî.
17 Xawes ge ǁîsa Elisab ge mî khami, ǁnā ǁaeb sao ra kurib dib ai aore ǀgôaroba ge ǁora.
18 Kaikhâib ge ob ge axaba ǀguitsē ǁgûb tawa, gao-aogu ǀkhab hâpa ge sī. 19 Tsîb ge ǁîb îba ǃoa “Tsûadana ta ge ra, tsûadana ta ge ra” ti ge mî.
Ob ge ǁgûba “ǁGûsa ǃoa tani bi” ti ǃgāb ǁga ge mî. 20 Ob ge ǃgāba ǀgôaba ǁgûs ǁga ge tani-oa. ǁÎs ge tîǂams âs ai ǃuis kōse ge ǁgui bi tsîb ge ǁnās khaoǃgâ ge ǁō. 21 Os ge Elisab ǃnā-oms ǁga ǂoa-ū bi, kharob ai ǁgui bi tsî ǂoa tsî dao-amsa ge ǂganam. 22 ǁNās khaoǃgâs ge aob âsa ǂgai tsî ǁîb ǃoa ge mî: “ǃGāb tsî dâukis tsîna sîba te re. Kēbo-aob Elisab ǁga ǃgû tsî ta ge ǁkhawa ǃhaese ra oaǀkhī ǂgao.”
23 “Tare-i ǃaromas nētsē ǁîb ǁga ra ǃgû ǂgao, nēs kom Sabbattsē tama i, ǀAsa ǁKhâb Kaitsē tama i ti īo?” tib ge aob âsa a dî si, os ge ǁîsa “ǂKhîǂâixa re” ti ge ǃeream.
24 Tsîs ge dâukisa ǃgaeǃgâ kai tsî ǃgāba ge mîmā: “Dâukisa ǃhaese ǃkhoe kai, î ǁîsa tā tita mî tama hâ hîa mâ kai.” 25 ǁNātis ge ǂoa tsî Elisab ge hâ ipa, Karmelǃhommi tawa ge sī.
Elisab ge ǁîsa ǃnūseba xu mûǃgoaxa tsî ǁîb di ǃgāb Gehasiba ǃoa ge mî: “Kō re, Sunems di taras kom ǁnā ǃgoaxasao. 26 ǃHaese ǁîsa ǃgûǃoa, î ǁîs tsî aob tsî ǀgôab tsîn hoan ǃgâise hâsa dî re.”
Os ge ǁîsa Gehasiba “ǃGâise da hâ” ti ge ǃeream, 27 xawes ge Elisab tawas ge hā, o ǁîb aiǃâ ǃhon tsî ǁîb ǂaira ge ǃkhō. Gehasib ge ǁîsa gere ǂhābē ǂgao, xaweb ge Elisaba ge mî: “ǁNāxū si re, kaises tsûaǂgao hâ xuige. Tsî ǃKhūb ge nēs xa xū-i xare-e go mîba te tama hâ i.”
28 Os ge tarasa ǁîb ǃoa ge mî: “ǃGôahesatse, tita ǀgôa-e ǂgan tsi ta ge? Tā ǁau ǃâubasensa mā te, ti mî tama ta ge i?”
29 Ob ge Elisaba Gehasib ǃoa ge mî: “ǃHaese ǂhomisen, ti ǁgâibasenhaiba ū, î ǃgû. Tā daob aits ga ǀhao-ū khoe-e tawede tsî dîǂhôa. Ti ǁgâibasenhaiba ǀgôab di ais ai ǁgui.”
30 Os ge ǀgôab di îsa “ǃKhūb tsî sats tsîn a ûitsama ǃkhais ao ta mā-am tide, sats nî hâ-oa ǃkhaisa” ti ge mî. Ob ge khâi tsî ǁîs ǀkha ge ǃgû. 31 Gehasib ge ai sī tsî Elisab di ǁgâibasenhaiba axab ais ai ge ǁgui, xawe i ge ǀō-i tamas ka io ûib go ǃkhais ǁgauǁgau-i xare-e ge ǀkhai i. Ob ge Elisab ǁga oadabasen tsî ǀgôab ûi tama ǃkhaisa ge mîba bi.
32 Elisab ge oms ǃnâb ge ǂgâ, o ǀgôab ǁō hâse kharob ai ǁgoe ǃkhaisa ge mû. 33 Ob ge dao-amsa ǂganam tsî ǃKhūb ǃoa ge ǀgore. 34 ǁNās khaoǃgâb ge axab ai ge ǁgoe, ǁîb ams, mûra tsî ǃomkha tsîna axab ams, mûra tsî ǃomkha ai ǁgui hâse, tsîs ge axab di sorosa ge ǀgam. 35 Ob ge Elisaba khâimâ tsî oms ǃnâ ǃgûma tsî ǁkhawa axab ai sī ge ǁgoe, ob ge axaba hû ǃnādeb ge tsîs khaoǃgâ mûra âba ge khowa. 36 Ob ge Elisaba Gehasiba ǂgai tsî ge mîba, îb ǀgôab di îsa ǂgai. Tsîb ge ǂgâxas geo ǁîs ǃoa “Sa ôaba ūkhâi re” ti ge mî. 37 Os ge Elisab ǂai-am ǃhūb kōse ge ǃgamǃgâ tsîs ge ǁnās khaoǃgâ ǀgôab âsa ū tsî ge ǂoa.
ǀGam buruxa dīkha Elisab dikha
38 ǃÂtsūǀkhāb ǃhūb ǃnâ hâ hîab ge Elisaba Gilgals ǃnâ ge oasī. Kēbo-aogab ra ǁkhāǁkhā hîab ge ǃgāb âba ge mîba, îb kai sūsa ǀaes ai mâi-ai tsî ǁhaon xa ǁîga sâiba. 39 Ob ge ǁîgu di ǀguiba ǁhaonab sī nî ūse ǃaub ǁga ge ǃgû. Ob ge ǃaub ǃnâ ǂûhai-e hō tsî ǁî-e xu ǃaub tôana sarab âb ǀoase ge ǀhaoǀhao. Tsîb ge ǁîna taren a ǃkhais tsînab a ǀū, xawe sūs ǃnâ hā ge ǃgaoǂgā. 40 Nē ǂû-e gu ge ǂû gu nîga a horabahe, o gu ge aoga ǁî-e gu ge tsâo, “Elob aotse ǃgāb ge ǂû-i ǃnâ hâ” ti ge mî, tsî gu ge ǁî-e ge ǂû ǁoa. 41 Ob ge Elisaba mel-e ǂgan, ǁî-e sūs ǃnâ tsoro tsî “Khoega horaba, î gu ǂû” ti ge mî. Tsî sūs ǃnâ hâ ǂû-i hoaraga-i ge ge ǃgâi i.
42 ǀGui ǃnā-eb ge khoeba Bal-Salisasa xu ǀgamdisi peregu, ǂguro ǃgaos ǃhoron ǀkha ǁgansagu tsî ǀasase ǃgaoǁnâsa ǃhoroǃnurugu tsîna Elisaba ge hā-ūba. Ob ge Elisaba ǃgāb âba ge mîba, îb aoga ǁîna ǂû gu nîga mā, 43 xaweb ge ǁîba ge ǃeream: “Mâti ta kaidisi khoega nē ǀoro ǂûron ǀkha nî ǂûmā ǁkhā?”
Ob ge Elisaba ge mî: “ǁÎga mā, î gu ǂû, ǃKhūb ǂû tsî gu noxopa nî ǂûǃgau ti ra mî xuige.” 44 Ob ge ǃgāba ǁnā ǂûna ǁîga ge mâi-aiǃâ tsî gu ge ǃKhūb ge mî khami ǂû tsî ge ǃgau.
© Khoekhoegowab Elobmîs © Bible Society in Namibia, 2020.
