Paulub ge Jerusalems ǁga ra ǃgû
1 ǁÎga xu ge ge ǀgoras khaoǃgâ ge ge ǃoa Kosǃnāǃnuis ǁga ge ǃgâu. Tsî ge ge sao ra tsē Rodes tawa sī tsî ǁnāpa xu Pataras ǁga ge ǃkharu. 2 ǁNāpa ge ge doe-om-i hîa Fonisiab ǁga garu-e hō tsî ǁî-i ai ge ǂoa. 3 ǁAreǀkhāb âge ai Sipruǃnāǃnuisa ra mûse ge ge Siriaba-ū ǃgâu tsî Tirus di doe-ommâ-ais tawa, ǃnaohe hâ xūn nî ǃnaoǁnâhese ge sī. 4 ǃĀs di ǁkhāǁkhāsabega* ôaǂui tsî ge ge ǁîgu ǀkha ǁnāpa hû tsēde ge hâ. ǁÎgu ge ǃAnu Gagab ǃnâ-u Pauluba ǀûs ose Jerusalems ǁga ǃgûsa gere ǂkhā. 5 Tsî tsēdi di ǀams ai ge ge doe-ommi ǁga oa, on ge hoaraga ǂgomsaben, taradi tsî ǀgôan tsîna, ǀhû hâse sige ǀkha ǃās ǃaugab kōse ge ǃgû. ǁNāpa da ge huri ammi ai ǃhonǁgoa tsî ge ǀgore. 6 Tawedegutoa da ge, o ge ge sige doe-oms ai ge ǂoa tsîn ge ǁîna omdi ân ǁga ge oa.
7 Tsî ge ge Tirusa xu ge ge ǃkharuo, Ptolemais tawa ge sī. ǁNāpa ge ge ǂgomsabena tawede tsî ǀgui tsēsa ǁîn ǀkha ge hâ. 8 Tsî sao ra tsēs ai ge ge ǂoa tsî Kaesareas tawa ge sī. ǁNāpa ge ge ǃgâiǂhôa-aob Filipub, hû khoegu, hui-aose ge Jerusalems ǃnâ ǁhûihegu di ǀguib di oms tawa sī ge hâ. 9 ǁÎb ge haka ǃgame tama ǀgôadi, kēbo gerede ge ūhâ i.
10 ǁNāpa ge ǀnîkhamakō tsēde hâ hîab ge ǂanǂansa kēbo-aob Agabub ti ǀon hâba Judeaba xu ge hā. 11 Sige tawa ǀkhī tsîb ge Paulub di kamanaǃgaesenna ū tsî ǃomkha tsî ǂaira ai ǃgaesen tsî “ǃAnu Gagab ge nēti ra mî: ‘Nētib ge nē kamanaǃgaesenni di ǀhonkhoeba Jodeǁî ǂgaeǂgui-aogu, Jerusalems ǃnâ hâgu xa ǃgaeǃnonhe tsî Jodeǁî taman ǃomǁae nî māǁnâhe’ ” ti ge mî.
12 Tsî nēsa ge ge ǁnâu, on ge sige tsî ǀnîn hîa ge ǁnâuna Pauluba Jerusalems ǁgab ǃgû tide ǃkhaisa gere ǀkhoma. 13 Ob ge Pauluba ge ǃeream: “Tare-i ǃaroma du nēti ā tsî ti ǂgaoba ra khôa? Tita ge Jerusalems ǃnâ ǃgaeǃnonhe tsî ǃkhōsis ǃnâ ūhes ǀguisa tama i tsî ǃKhūb Jesub di ǀons ǃaroma ǁōsa ǂhomisenba hâ.”
14 Tsî ǁîba da ge gowadan ǁoa, o da ge ǀûsen tsî “As ǃKhūb di ǂâisa ī re” ti ge mî.
15 ǁNāpa ge ge ǀnîkhamakō ǁaeba hâs khaoǃgâ ge ge ǂhomisen tsî Jerusalems ǁga ge ǃgû. 16 On ge ǁkhāti ǀnî ǁkhāǁkhāsaben Kaesareas dina sige ǀkha ge ǃgû. ǁÎn ge sige Mnason ti ǀon hâ Sipruǁîb, gaxuse ge ǂgomsabe ib di oms tawa, ǁnāpa ge nî hâse ge sī-ū.
Paulub ge Jakobuba ra sari
17 Jerusalems tawa ge ge sī, on ge ǃgâsana sige kaise ǁkhorexase ge ǃkhōǃoa. 18 Tsî sao ra tsēb ge Pauluba sige ǀkha Jakobuba nî sarise ge ǃgû tsî gu ge hoaraga ǂnomdomgu* kerkheb digu tsîna ǁnāpa ge hâ i. 19 ǁÎgab ge tawedetoas khaoǃgâb ge Pauluba mâtib ge Eloba ǁîb ǃnâ-u Jodeǁî taman* ǃnâ gere sîsen ǃkhais di ǀoasa ǃnuriba ge mā. 20 Tsî nēna gu ge ǁnâu, o gu ge Eloba koa tsî ge mî: “ǃGâsatse, mûts ge ra mâtikō Jodeǁîn ge ǂgom tsî ǀaexase ǂhanuba ra ǁnâuǀnamsa. 21 Tsîn ge ǁîna sats xa ǃhoabahe hâ, sats hoaraga Jodeǁîn hîa Jodeǁî taman ǁaegu ǁan hâna Moseb ǂhanuba* ǂhara tsî Jodeǁîn ǁnaetigu, ǁîn di aore ǀgôaroga ǃgaos* diga ǁnākhaosa ra ǁkhāǁkhā tsî ǁkhātin ǀnî Jodeǁîn ǁnaetiga sao tide ǃkhaisa. 22 O tare-e ǁnâi nēsisa dīhe ǁkhā? ǂAnǂansasen ge sats hā hâ ǃkhaisa nî ǁnâu.
23 “O da ge nēsa ra ǁgui-ai tsi. Nēpa gu ge haka khoegu, mîmâisa dī hâga hâ. 24 ǁÎga ū, î ǁîgu ǀkha ǃgû tsî ǃanuǃanusens di ǁāxasib ǃnâ ǁhao re. Î ǁîgu di māǂuisa matareba î gu danadi âga ǂkhom ǁkhā. ǁNā ǀgaus ain ge hoana ǁîn ge sats xa ǁnâun ama tama tsîts sats tsîna ǁkhāti nē ǂhanuba ǃgôa hâ ǃkhaisa nî ǂan. 25 Xawe ǂgomsabe kai ge Jodeǁî tamana da ge sîǂkhanisa sida di mîǁguib xa ge xoaba, ǁgôa-elon ra ǁguibahe ǂû-i kas, ǀao-i kas, ǃkhōdomhe hâ ǀguru-i di ǁgan-i kas hoasan ǂû tide ǃkhaisa tsî ǁkhātin ǀaiba xus tsîna nî ūdabasensa.”
26 Ob ge Pauluba ǁnā khoega ū tsî sao ra tsē ǁîgu ǀkha ǃanuǃanusen tsî Tempeli ǃnâ ge ǂgâ, mâǁae di ǃanuǃanusens tsēde nî ǀoas tsî mâǁaeb mâb hoab ǁîgu dib di ǁguibasa nî ǁguibahe ǃkhaisa nî ǂanǂanse.
Paulub ge Tempeli ǃnâ ra ǃkhōhe
27 Tsî hû tsēdi ra ǀam ǁga hîa gu ge ǀnî Jodeǁîgu Asiab diga ǁîba Tempeli ǃnâ mû tsî ǁîb ǃoagu ǂnubisa khâikhâiǃnâ tsî ǁîba ǃkhō, 28 tsî “Israelǁî aogo, hui re! Nēb kom ǁnā khoeb, ǁaes tsî ǂhanub tsî Tempeli ǃoagu khoena ǁkhāǁkhābao. ǁKhātib ge Grikeǁîna nēpa ǂgâxa-ūs ǀkha nē ǃanu ǃkhaiba ra ǃanuoǃnâ kai!” ti ge ǃau. 29 ǁÎn ge Trofimub, Efeseǁîban ge aiǃâ Paulub ǀkha ǃās ǃnâ mû hâ i xui-ao ǁîb xab go Tempeli ǃnâ ǂgâxa-ūhe ti ge ǂâi hâ i.
30 Tsîs ge hoaraga ǃāsa ge khâikhâisen tsîn ge khoena ge ǃkhoeǀhao tsî Pauluba ǃkhō tsî Tempela xu ge ǃkharaǂui. O di ge ǁnātimîsi Tempeli di dao-amde ge ǂganamhe. 31 Tsî ǁîban ra ǃgam ǂgao hîas ge Romeǁî toroǃkhamaogu di ǃkhōdana-aob tawa hoaraga Jerusalems ra khâikhâisen ǃkhais di ǂhôasa ge sī. 32 Tsî nē ǂhôasab ge ǃkhōǃoa ob ge ǁnātimîsi toroǃkhamaogu tsî ǂammâisagu tsîna ū tsî ǁîn ǁga ge ǃkhoe. Tsî ǁîban ge mûǃgoaxa on ge Pauluba ge ǂnauǀû. 33 Ob ge nē toroǃkhamaogu di ǃkhōdana-aoba hā tsî ǃkhō bi tsî ǀgam ǀuriǃgae-ūdara ǀkhab nî ǃgaeǃnonhe ǃkhaisa ge mîmā. ǁNās khaoǃgâb ge ǂnubisa ǁîb a tari tsî tare-eb go dī ǃkhaisa ge dîǂuiǃnâ. …ǃkhō bi tsî ǀgam ǀuriǃgae-ūdara ǀkhab nî ǃgaeǃnonhe ǃkhaisa ge mîmā. 34 On ge ǂnubis ǃnâ ge mâ in xa nēna nēti tsî nauna ǀnîti gere ǃau. ǂKhupib ǁîn dib xab ge ama xū-e hō tama i, ob ge ǁîba toroǃkhamaogu di hâǃkhais ǁgab nî Pauluba ǃgû-ūhe ǃkhaisa ge mîmā. 35 Dā-aiǃharodi tawab ge sī, ob ge toroǃkhamaogu xa ge tanihe, khoen gere kaise khâikhâisen xui-ao. 36 On ge ǂnubis dina sao tsî “Ūbē bi!” ti gere ǂgaiǂui.
Paulub ge ǂnubis ǀkha ra ǃhoa
37 Tsî ǁkhui-ommi ǃnâb ra ǂgâ-ūhe ǂgao, hîab ge Pauluba nē toroǃkhamaogu di ǃkhōdana-aoba ge dî: “Xū-e sats ai dî ǁkhā ta a?” Ob ge ǂamkhoeba kaise buru hâse Pauluba ge dî: “Grikegowab tsînats a ǃhoa ǁkhā? 38 Ots kom satsa hana ǁnā Egipteǁî tamao, ǁaero-i ǃkharu hâse ge nēpa mâǃoaǃnan-e ǂnubi tsî ǁaubexa hakaǀoadisi ǁâtanisa khoega ǃgaroǃhūb ǁga ge ǂgaeǂguiǂuitsa?”
39 Ob ge Pauluba “Hî-î, tita ge a Jodeǁî, Silisiab ǃnâ ǂnôa ǃās, Tarsus kaise a ǂhâǂhâsas di ǃāǁîta. Mā-am te re nē ǂnubis ǀkha ǃhoasa” ti ge ǃeream. 40 Tsî toroǃkhamaogu di ǂgaeǂgui-aob xab ge mā-amhe, ob ge Pauluba dā-aiǃharodi ai mâ tsî ǃomkha âba khoena ǃnōǃnōs ǃaroma ge ūkhâi. Tsî ǃnōn ge, ob ge ǁîn ǀkha Hebregowab ǃnâ ge ǃhoa:
© Khoekhoegowab Elobmîs © Bible Society in Namibia, 2020.
