1 ǀKhaeheb ge hâ ǃgâi tarasa ūhâ aoba, ǁîs ge ûib âb nî ǀgamǃnâguse gaxu ǃkhaisa nî ǃaroma. 2 Îǂhôa taras ge ǁîs aoba ra ǃgâiaǂgao kai tsîb ge ǂkhîxaǃnâ ûikuriga nî ūhâ. 3 ǃKhūb ge ǁîba ra ǃoaba khoega ǃgâi ǀkhaeba ra mā tsî ǃgâi taras ge nē ǃgâi ǀkhaexūn di ǀguisa. 4 ǁNāti ī aob ga ǃkhū tamas ka io ǀgâsas hoasab ge ǀnommi ǁîb di ais ai hâba dâxa ǂgaoba xu ra ǀkhī.
5 Haka xūn, tita ra ǃao kain ge hâ; ǃās ǃnâ ra ǃhoamahe ǃgâi tama ǀhaeǂhôan, ǂkhaba khoen di ǀhaos, ǂhumiǂgā-amdi; nēn hoan ge ǁōb ǃgâ-ai a tsū. 6 Xawe tarekhoes nau tarekhoesa ra taus ge tsûaǂgaob tsî ǃoaba ra ǃaroma. ǁÎs di nammi ǀkhas ge khoen hoana ra ǂanǂan.
7 ǁGai tarasa ǃkhō-unusa dītsâs ge ǃgâise ǃgaesa tama jokhoes ǀkha hâ gomaba ǂgae-unus tamas ka io ǃgāxa ǁgamabe-e ǃkhōs khami ī. 8 Tarekhoes ga ǀhoro, os ge taotaosase ra tanisen tsî ǁnāsa a gaugau ǁoa. ǁÎsa ra mû khoen ge ra uixa.
9 ǀAiǃnâ tarekhoes ge ǁîs mûra âsas ra ǀapiro ǀgaus ai a mûhe ǁkhā. 10 ǃNâudanaxa tareǀgôas hîa ǃgaridanas tsî ǁîs ǂhunuma daoba ra ūbasen ǂgaosats ga ūhâ, o ǁîsa ǂōrisase kōǃgâ, ǁnā tamas ka i, os ge ǁîsa ǃēǃkhō ǁkhā. 11 Kaises ga ǁîǂâixa, o ǂanbasen, î tā buru ǁîs ga ǃannaǂgao kai tsio. 12 ǁÎs ge mâ khoeb hoab ǀkha kharob ǁga ra ǃgû tsî ǁîsa ra ǂhâbab hoaba ra māsen.
13 Tsauraǃnâ taras ge ǁîs aoba ra ǂkhîǂkhî tsî ǁîs di sâiǁkhāsib ge ǁîba ǃgâi mâsib ǃnâ ra ūhâ. 14 Kaise ǃhoaxa tama taras ge a ǃKhūb di ǀkhae, ǁnā taras khami ǃgôaǃgôasa xū-i ge a ǀkhai. 15 ǃNomsase ra tanisen taras ge toa ǁoa anusib tsî ǀnōhe ǁoa ǃgomǀgausasiba ūhâ. 16 ǃGâise ǂhomisa oms ǃnâ hâ taras di îsasib ge ǁgoasores, ǃKhūb di ǀhomaib ai ra ǂoaxas khami ī. 17 ǃNâ ra ǃamǀaes, ǃanu kandelari ai mâs khamis ge îsa aisa anusa soros ai ī. 18 ǁÎs di îsa ǀnūkha tsî ǀgaisa ǃgorora ge Tempeli di ǃhuniǀuri ǂkhâǃnâgu ǀhaiǀurib ǃnâ mâihe hâgu khami ī.
ǃOa kai te ra xūn
28 ǀGam xūn hîa ra ǃoa kai ten tsî ǃnona ǁî-i hîa ra ǁaixa kai te i ge hâ:
Toroǃkhamao-i hîa ge ǀgâ i,
gā-ai khoen hîa ǃgôasiba māhe taman
tsî ǂhanu-ai khoe-i hîa ǂkhabab ǁga ra dabasen i tsîna.
ǃKhūb ge ǁnāti ī khoe-e ǁōb ǀkha nî ǁkhara!
29 ǂHarugu-aon ǃaroma i ge a ǃgom, tsūse dīsa xu ǂgōsensa; hoan ge ǁoreb ǃnâ a ǀhapixa.
© Khoekhoegowab Elobmîs © Bible Society in Namibia, 2020.
