Judab khoen ǁkharab
1 Ob ge ǃKhūba tita ǃoa ge mî: “Moseb tsî Samuel hâkha ga tita aiǃâ mâ tsî ǀkhoma te hâ, xawes tsîna ta ge tita nē ǁaesa ga ǀkhom tama hâ. Ti aiǃâba xu ǁîna sîbē, î ǁîna ǃgû kai! 2 Tsî ‘Mâǀî da kha nî ǃgû?’ tin ga dî tsi, ots ge ǁîna nî mîba ‘Nētib ge ǃKhūba ra mî:
“ ‘ǀNîn ge tsûtsû-ain xa nî ǁō,
ǁnāb ge a ǁîn di dao!
ǀNîn ge torob ǃnâ nî ǁō,
ǁnāb ge a ǁîn di dao!
ǀNîn ge ǃâtsūǀkhāb xa nî ǁō,
ǁnāb ge a ǁîn di dao!
ǀNîn ge ǃkhōsabese nî ǃgû-ūhe,
ǁnāb ge a ǁîn di dao!’
3 “Tita ge hakaǃnâgu hîkākā-aona ǁîn ǂama nî mâi”
tib ge ǃKhūba ra mî.“Gôaba ǃgam nîse, ariga ǀkhauǃā nîse, ǀhomanin tsî ǀguruna hapu tsî nî hîkākāse. 4 Tita ge ǁîna hoa gaosigu ǃhūbaib digu ǃaroma ǃaoǃaoxūse nî dī, Manaseb, Hiskiab ôab, Judab gao-aob ge Jerusalems ǃnâ dīn ǃaroma.
5 “Tari-e sasa nî ǀkhomxa Jerusalemse
tari-e sas ǂama nî ā?
Tari-e nî dabasen,
sa ǂkhaisib xa nî dîse?
6 Tita du ge ge ǂhara
tsî o du ra oao khaos ǁga ra oa;
ǁnā-amaga ta ge ti ǃomma sadu ǃoagu ǀhōǂui tsî ge hîkākā du,
sadu karosaǂgaosib xa ta ǂkhabu hâ amaga.
7 Tita ge ǁîna ǀnupiǃoreb ǀkha ge ǀnupi,
ǃhūb di ǂgâ-amdi tawa.
Tita ge ǁîna ǃoaǃoa tsî ti khoena ge hîkākā;
daogu âna xun ge oa tama ge i.
8 ǁÎn ǃoatarade ta ge ge ǂguiǂgui,
hurib di ǃhūb ǃgâ-ai.
ǂKhamkhoegu îdi ǂama ta ge
tsēǃgâǁaeb ai hîkākā-aoba ge hā-ū.
ǃAob tsî ǃhuriǃhurisasiba
ta ge ǃnapetamase ǁîn ai ge hā kai.
9 Hû ǀgôaga ge ǁoras ge ge ǂkhabu,
ǁîs ge ge ǀgaio.
Ganupe i tsēa hîas ge sores âsa ge ǂgâ,
ǁîs ge taotaohe tsî ge ǃharaxūhe.
ǁÎn xa ga ǃgauna ta ge gôab ǃnâ nî māǁnâ
khākhoen ân aiǃâ”
tib ge ǃKhūba ra mî.Jeremiab ge ǃKhūb tawa ra ǃgae
10 Tsūba te ti îse, titas ge ǁora ǃkhaisa, tita hoaraga ǃhūba ǂnoagu-ao tsî ǃkhamaose ība ta! Mari-i tamas ka io tare-i ǀgui-i kas hoasa ta ǀkhupi tama hâ, xawen ge ra ǀâxare te. 11 Ob ge ǃKhūba ge mî: Amase ta ge ǃgâib ǃoa ge ǃnoraǃnora tsi. ǂKhabab tsî ǂōǂōsib ǁaeb ai ta ge satsa khākhoeba xu nî huiǂui. 12 Khoe-e hâ-e, ǀapasǀkhāba xu ra hā ǀurib tamas ka io brons-e khôa ǁkhā-e?
13 “Sa ǃkhūsib tsî sa ǁuiba ta ge ǁkhâuǁnâxūse nî mā, xū-i ama tama, sa ǁoren ǃaroma, sa hoaraga ǃhūb ǃnâ. 14 Sadu khākhoena du ǀū du a ǃhūb ǃnâ nî ǃoabase ta ge tita sado, ti ǁaixasib ǃnâ ǀaes, ǀamose nî khausa ge khauriba.
15 “ǃKhūtse sats ge a ǂan. Tita xa ǂâi, î hui te re. ǁNān tita ra ǃgôaǃgona ǀkhaoba te re. Sa ǃnūǃnâxasib ǃnâ tā ūbē te re, sats ǃaroma ta ra ǃgabehe ǃkhaisa ta ge a ǂan. 16 Sa mîdi ge hōhe o ta ge ǁîde ge hapu, tsîs ge sa mîsa ti ǂgaob ǃnâ ǃgâiaǂgaob ase ge ība te, sa ǀons ǃoa ta ǂgaihe hâ xui-ao, ǃKhūtse, Hoaǀgaixatse. 17 ǃHō-aon di ǀapes ǃnâ ta ge ǂnû tama hâ tsî ǁkhāti dâb xa urikhâi tama hâ. ǀGuri ta ge ge ǂnû, sa ǃommi ge tita ai hâ i amaga, ǁaixasib ǀkhats ge ǀoaǀoa te amaga. 18 Tare-i ǃaromab ti tsûba toa tama hâ? Tare-i ǃaroma di ti ǀhapide ǂgau ǁoa? Titats gāxaǃnâ ǁgamǃāro-i ase nî ība, ǁgam-i hâhâ tama-i khami?”
19 Nētib ge ǃKhūba ra mî: “Oats ka, o ta ge nî ū-oa tsi, tsîts ge tita aiǃâ nî mâ. ǃGâi xūnats ga ǃhoao, harebeoǃnâ xūn ose, ots ge ti amse nî ī. ǁÎn ge sats ǃoa nî oa, xawets ge satsa ǁîn ǁga oa tide. 20 ǁÎn ǃoagu ta ge tita satsa bronsǂnubiǂgoab ase nî dī; sa ǃoagun ga ǃkham xawen ge dan tsi tide, tita hâǀkhā tsi tsî ra ore tsî sâu tsi amaga”
tib ge ǃKhūba ra mî.21 “Tita ge satsa ǂkhaba khoen ǃomǁaeba xu nî huiǂui, tsî ta ge ǁgauoǃnân ǃomǃnāba xu nî ore tsi.”
© Khoekhoegowab Elobmîs © Bible Society in Namibia, 2020.
