1 ǂGuro ǂgaeǂguis kurib Dariusi Medeǁîb dib ǃnâ ta ge tita ǁîba hui tsî ge ǁkhauba. 2 Tsî nēsi ta nî mîba tsin ge a ama.”
Egipteb tsî Siriab tsîkha di gaosikha
ǀHomǃgāb ge ge mî: “ǃNona gao-aogu ge Persiab ǂama nî gao tsî ǁnās khaoǃgâb ge hakaǁîb, aiǃâ ge hâ igu hoagu xa ǃkhū hâba nî hā. ǁÎb ge kaiseb ga ǃkhūsib âb ǃnâ ǀgai, o hoa gaosiga Grikeǃhūb di gaosib ǃoagu nî khâikhâiǃnâ.
3 “ǁNās khaoǃgâb ge ǀgaisa gao-aob, kai gaosib ǂama gao tsî ǁîb ra ǂâi khami nî dība nî ǀkhī. 4 Xawe mâǁapob ka, os ge ǁîb di gaosisa nî khôa tsî haka ǃâdi ǃnâ nî ǀgorahe. ǁÎb ôananôaguba xu hâ tama gao-aogu ge ǁîb soas ǃnâ nî gao-ao kai, xawe gu ge ǁîb ge ūhâ i kō ǀgaiba ūhâ tide.
5 “Egipteb di gao-aob ge nî ǀgaisa, xaweb ge ǀguib ǁîb ǂamkhoegu diba ǁîb ǃgâ-ai nî ǀgaisa tsî kai gaosib ǂama nî gao. 6 ǀNî kurigu khaoǃgâb ge Egipteb di gao-aoba Siriab di gao-aob ǀkha ǃgaeǀhao-e dī tsî ǀgôas âba, ǁîba tarase nî mā. Xawes ge ǁnā ǀapesa ǃgâiǃgâ tide tsîn ge ǁîs, ǁîs aob, ǁîs ôa-i, ǁîs ǃgān ǁîs ǀkha ge sīn tsîn hoana nî ǃgamhe. 7 Tsîb ge ǁîs ǀaokhoen di ǀguiba nî gao-ao kai. ǁÎb ge Siriab gao-aob di toroǂnubisa ǁnāǂam, ǁîn di ǀgaisa toro-omga ǂgâǃnâ tsî ǁîna nî dan. 8 ǁÎb ge ǁkhāti ǁîn di ǁgôa-elo-īgu tsî ǁîgu di ǃgomǀgausa ǃhuniǀuri tsî ǀhaiǀuri xūn tsîna Egipteb ǁga nî ǃgû-ū. ǁNās khaoǃgâb ge ǀnî kuriga Siriab di gao-aoba ǂkhîb ǃnâ nî ǁnāxū. 9 Siriab di gao-aob ge Egipteba nî ǁnāǂam, xaweb ge ǁkhawa ǁîb di ǃhūb ǁga nî ǃkhoeni-oa.
10 “Siriab gao-aob di ôagu ge torob ǃoa ǂhomisen tsî kai toroǂnubisa nî ǀhaoǀhao. ǁÎgu di ǀguib ge dâuǃkhopa ra ǁgammi khami ǃkharu tsî khākhoeb di omǂnamisa toro-omma nî ǁnāǂam. 11 Egipteb gao-aob ge ǁaib âb ǃnâ Siriab gao-aob ǃoagu ǃkham tsî ǁîb di kai toroǂnubisa nî dan. 12 ǁÎb ge ǁnā kai toroǂnubisa go dan ǃkhais xa kaise ǂnīsase nî hōǃâsen, xaweb ge ǃaruǀî danaose hâhâ tide.
13 “Siriab gao-aob ge oa tsî ǂguros ǃgâ-ai kai toroǂnubisa sī nî ǀhaoǀhao. Tsîb ge ǀnî kurigu khaoǃgâ ǁkhawa ǁnā kai toroǂnubis, ǃgâise ǁâtanisen hâs ǀkha nî hā. 14 ǁNā ǁaeb ǃnân ge ǂgui khoena Egipteb gao-aob ǃoagu nî khâikhâisen. Tsî ǀnî ǂkhaba khoen sa ǁaes din ge ǁnā ais di ǂâibasensan nî dīǀoaǀoase nî khâikhâisen, xawen ge ǁnās ǃnâ ǃgâiǃgâ tide. 15 Ob ge Siriab gao-aoba omǂnamisa ǃāsa ǁnāǂam tsî nî ū, tsî Egipteb di toroǂnubis ge mâǃoa ǁkhā tide. ǁÎn di ǂoaǂamsa toroǃkhamaogu tsîn ge ǁîga mâǃoas ǀgai-i xare-e ūhâ tide. 16 Siriab di ǁnāǂamaob ge ǁîn ǀkha ǂâib ra khami nî dī, khoe-i xare-i xa mâǃoahe tamase. ǁÎb ge mîmâis ǃhūb ǃnâ ǂgâ tsî ǁîn tsîna nî ūbasen.
17 “Siriab gao-aob ge ǁîb di hoaraga toroǂnubis ǀkha ǀapas gao-aob ǃoagu torodīsa nî ǀapeǁgui. Tsîb ge ǁîb khākhoeb di gaosisa hîkākās ǃaroma, ǁîb ǀkha ǃgaeǀhao-e dī tsî ǁîba ǀgôasa tarase ge mā, xawes ge nē ǀapesa ǃgâiǃgâ tama ge i. 18 ǁNās khaoǃgâb ge ǁîba huri-ammi ai ǁan hâ ǃhaode ǁnāǂam tsî nî dan. Xawe gu ge ǁîb di ǃguriǂâixa dīga ǀnî ǂgaeǂgui-aob xa nî ǀamǀamhe, tsîb ge ǁîb di ǁēsib ǁkhāb ǀkha nî mādawa-amhe. 19 Tsîb ge ǁkhawa ǁkhui-omgu ǁîb ǃhūb digu ǁga nî ǁaru, xaweb ge nî danhe tsîs ge ǁnāsa nî ǁîb di ǀam.
20 “ǁÎb ge ǀnî gao-aob, ǁîb gaosib di ǃkhūsiba kaikais ǃaroma khoena ǁgui-aimaride nî ǁgūǀkhā khoeba nî sîb xa nî saoǃgonhe. ǁNā gao-aob ge ǃnubu ǁaeb ǃnâ nî ǃgamhe, xawe ǂhaisasib ǃnâ tamas ka io toro-i ǃnâs ose.”
Siriab di ǃharaxūhesa gao-aob
21 ǃAruǀîb ge ǀhomǃgāba ge mî: “Siriab gao-aob soas ǃnâb ge ǃharaxūhesa khoeb, gao-aosis tsîna anuba tamaba nî gao-ao kai. ǁÎb ge khoen ǂan tamase ǁgūǂgâ tsî ǀhôagao ǀgaub ǃnâ-u gaosisa nî hō. 22 ǁÎb ge toroǂnubide ǁîb aiǃâba xu ǁkhaebē tsî nî hîkākā tsî ǁnās ǁkhāsa Elob di ǀgapipristeri tsîn ǀkha nî dī. 23 ǁÎb ge ǃgaeǀhaodeb dī-ū hâ ǃhaode ǀhôagaoǃnâ tsî ǂkhari ǃhaoros ǀguis ǂamab a gao-ao, xawe aiǃâb ǃoa ǀgui nî ǀgai. 24 Tsîb ge ǃkhū hâ ǃhūǃâdi ǃnâ ǃâubasen taman hâ, hîa ǂgâ tsî ǁîb aboxagu ge tātsēs tsîna dī tama hâ i xūna nî dī. Tsîb ge ǁkhâuǁnâb ka xūn tsî ǃkhūsiba ǁîb di khoen ǃnâ nî ǀgoraǂui. ǁÎb ge ǁkhui-omga ǁnāǂamsa nî ǀapeǀape, xawes ge ǁnāsa ǃnubu ǁaerob kōse ǀgui nî ī.
25 “Tsîb ge ǁîb di ǀgaib hoab ǀkha, kai toroǂnubisa Egipteb di gao-aob ǃoagu nî ǀhaoǀhao. Ob ge Egipteb di gao-aob tsîna ǁîbab nî ǃkhamǃoaga kai toroǂnubisa nî ǀhaoǀhaobasen, xawe ǃgâiǃgâ tide, ǁîb ǃoagu di ǀapeǀhaode nî dīhe xui-ao. 26 ǁÎb ǀkha ǀgui tāb ai ra ǂûn ge ǁîban ga hîkākāsa nî dītsâ. Toroǂnubis âb ge nî hîkākāhe tsî gu ge ǂgui toroǃkhamaoga nî ǁō. 27 Nē ǀgam gao-aokha ge ǀgui tāb tawa ǂnôaǃâ ǂkhaba ǀapede ǂâiǂui tsî ǂnôa nî ǂhumibagu; xawes ge ǁnāsa a ǁau, mîǁguisa ǁaeb noxopa ǀoa tama xui-ao. 28 Siriab gao-aob ge ǂgui ǁkhâuǁnâxūn ǀkha ǁîb di ǃhūb ǁga nî ǁaru, xawes ge ǂâis âba Elob ǁaes ǃoagu nî hâ. Tsîb ge ǁîb ra ǂâi khamib ga dīs khaoǃgâ, ǁîb di ǃhūb ǁga nî ǁaru.
29 “Egab ge ǁîba ǁkhawa Egipteba nî ǁnāǂam, xawe i ge nē ǃnāsa, ǂguro ǃnās ai i ge ī-i khami i tide. 30 Romeǁîn ge doe-omdi ǀkha ǁîb ǃoagu nî hā, tsîb ge nî ǃhuri.
“Ob ge ǁaib âb ǃnâ dabasen tsî Elob ǁaes di eloǃoabasa hîkākāsa nî dītsâ. ǁÎb ge ǁnā eloǃoabasa xu ge ǁnāǁgôan di ǀapesa nî sao. 31 ǀNî toroǃkhamaogu, gao-aob digu ge Tempela nî ǃanuoǃnâ kai. ǁÎgu ge tsēkorobe ra dīhe ǁguibade ǀû kai tsî ui-uisa xū-i, ǃanuoǃnâ kai ra-e ǁîb ǃnâ nî mâi. 32 Gao-aob ge ǀhôagaosib âb ǀkha ǁnān, ǃgaeǀhaosa xu ge ǁnāǁgôana nî nanaǁnâ, xawe ǁnān, Eloba ǂann ge mâǁapo tsî nî ǃkhamǃoa. 33 ǁNâuǃāxa ǂgaeǂgui-aogu ǁaes digu ge ǂgui khoena nî ǁnâuǃā kai, xawen ge aibe ǀnîn âna ǃgamhe, ǂhubiǂuihe, ǃnariǀhanahe tsî ǃkhōsis ǃnâ nî ūhe. 34 Nēn ga ǁîn ǀkha ī ǁaeb ain ge ǁîna ǂkhari huiroba nî ǃkhōǃoa, tsîn ge ǂguina ǁîn tawa ǀhôagao ǂâibasendi ǀkha nî ǀarosen. 35 ǀNîgu, nē ǁnâuǃāxa ǂgaeǂgui-aogu digu ge nî ǃgamhe, ǁnās ǃnâ-us ǁaesa nî ǃanuǃanuhese. Nēs ge mîmâisa ǁaeb nî hās kōse nî aiǃgû.
36 “Siriab di gao-aob ge ǂâib ra khami nî dī. ǁÎb ge elogu hoagu ǂamaib a kai, tsîb Hoan xa ǀGapi Elob ǂamais tsîna a kai ti nî koasen. ǁÎb ge ǁnā ǃkhais ǀkha, Elob nî ǁkhara bis kōse nî aiǃgû. Elob ge ǀapeǁguib hâ khami nî dī. 37 Gao-aob ge ǁîb aboxagu gere ǃoaba eloga ǃaoǃgâ tide tsî tarekhoedi xa ǀnamhe elob kas, ǀnî elo-i kas hoasa ǃgôasi-e mā tide tsî ǁî-aitsama ǁîgu hoagu ǂamai nî ǀgapiǀgapisen. 38 ǁÎb ge ǁkhui-omgu di elob, ǁîb aboxagu ge ǂan tama hâ ib ǀguiba ǃgôasiba nî mā. Tsîb ge ǁîba ǃhuniǀurib, ǀhaiǀurib, ǃgomǀgausa ǀuidi tsî ǂoaǂamsa ǀkhaexūn tsîna nî ǁguiba. 39 ǁÎb di ǁkhui-omgab nî ǁkhaubaseb ge ǃhao eloga ra ǀgoreǀî khoena nî sîsenū. ǁÎba ǂgaeǂgui-aose ra ǂanǃgâ khoenab ge kai ǃgôasiba nî mā, tsîb ge ǁîna ǀgapi ǃharodi ǃnâ mâi tsî ǃhūǃâde ǀkhaese nî ǀgoraǂuiba.
40 “Siriab gao-aob di ǀams kara ǀgū, ob ge Egipteb gao-aoba ǁîba nî ǁnāǂam, xaweb ge Siriab gao-aoba ǁîba torokunidi, hān tsî ǂgui doe-omdi ǀkha nî ǃkhamǃoa. Tsîb ge ǁîba ǂgui ǃhūga dâuǃkhū ra ǁgammi khami nî īǂam. 41 ǁÎb ge ǁkhāti mîmâis ǃhūb tsîna ǁnāǂam tsî ǂgui khoena nî ǃgam, xawe Edomǁîn, Moabǁîn tsî ǁnān, Amonǁîna xu ǃgau hân tsîn ge ǁîb ǀgaiba xu nî ûiǂoa. 42 ǁÎb ge ǀgaib âba ǂgui ǃhūgu ǂama nî khoraǂui, Egipteb tsîn ge ǁnāsa xu ǃnora tide. 43 ǁÎb ge Egipteb di ǁuib, ǃhuniǀurib, ǀhaiǀurib tsî nau ǃgomǀgausa xūn ǂama nî ǀhonkhoe. ǁKhātib ge Libiab tsî Etiopiab tsîkha nî dan. 44 Xaweb ge aiǂoas tsî ǀapas tsîra xu nî hā ǂhôan xa nî ǃhuriǃhurihe, tsîb ge kai ǁaib âb ǃnâ ǃgûǂoa tsî ǂgui khoena nî ǃgam. 45 Tsîb ge gaotentomde hurib tsî Tempeli mâ-ai ǃhommi tsîkha ǁaegu nî mâi. Xaweb ge hui bi nî khoe-i xare-e ūhâ tamase nî ǁō.”
© Khoekhoegowab Elobmîs © Bible Society in Namibia, 2020.
