ǂAnǂansa ǀai-aos
1 Ob ge hû ǀhomǃgāgu, hû ǃorede ge ūhâ igu di ǀguiba tita ǃoa hā tsî ge mî: “ǀKhī, î ta mâtib Eloba ǁnā kai ǀai-aos, ǁgamgu ai ǂnôasa nî ǁkhara ǃkhaisa ǁgau tsi. 2 Mâ gao-aob hîa ǃhūbaib ai hâb hoab ge ǁîs ǀkha ge ǀai tsîn ge ǃhūbaib di khoena ǁîs di ǀaib di ǂauxûib xa ā tsî ge ǀhoro.”
3 Gagab ǃnâ ta hâse ta ge ǀhomǃgāb xa ǃgaroǃhūb ǃoa ge tanihe. ǁNāpa ta ge tarekhoes hîa ǀapa ǀgurub, Eloba ra ǃkhāǃkhā ǀonde hoaraga ǀkhāb âb ai ūhâb, hû danade ūhâb ai ǂnôasa ge mû. 4 ǁÎs ge ǂhoaǀapa tsî ǃnâsaǀapa sarana ge ǂgaeǂgā hâ i. Tsîs ge ǃhuniǀurib, ǃgomǀgausa ǀuidi tsî pereldi tsîn ǀkha ge anisen hâ i. ǃOmmi âs ǃnâs ge ǃhuniǀuri ǀgabis, ǁîs di ui-uisa dīgu tsî ǃanuoǃnâsib ǁîs di ǀaib dib xa ǀoa hâsa ge ūhâ i. 5 ǃŪs âs ai i ge ǂganǃgâsa ǂâibasensa ūhâ ǀon-e ge xoamâisa i: “Babilons, hoaraga ǀai-aon di îs, hoaraga ǁgaisi dīgu ǃhūbaib ai hâgu di ǀaus.” 6 Tsî ta ge nē khoes, ǃanu Jesub xan ra ǃkhō-am ǃkhais ǃaroma ge ǃgamhe khoen di ǀaoba ra ā ǃkhaisa ge mû.
ǁÎsa ta ge mûo ta ge kaise ge buru. 7 Ob ge ǀhomǃgāba ge dî te: “Tare-i xats ǁnāti ra buru? Tita ge satsa ǂganǃgâsib nē tarekhoes tsî ǀgurub ǁîsa ra tanib, hû danadi tsî disi ǁnâga ūhâb diba nî mîba. 8 ǀGurub hîats go mûb ge ge hâ i, xawe nēsi a ǀkhai. ǁÎb ge ǃgam āba xu ǂoaxa tsî nî ǃgû, hîkākāheb nîse. ǃHūbaib ai ǁan hâ khoen, ǀondi ân ge ǃhūbaib di ǂnubihes aiǃâ ûib di ǂkhanis ǃnâ xoahe tama hâ in ge nî burugâ, ǀguruban ga kō-o. ǁÎb ge aiǃâ ge ûitsama i; nēsib ge ǃaruǀî ûitsama tama hâ, xaweb ge ǁkhawa nî ǂhai.
9 “Nēs ge gā-aisib tsî ǁnâuǃāba ǂgan hâ. Hû danadi ge hû ǃnâugu ǁîgu ais nē tarekhoesa ǂnôaga. ǁÎgu ge a ǁnā hû gao-ao: 10 Korogu ǁîgu digu ge ge ǁnā, ǀguib ge noxopa ǂgaeǂguis ǃnâ mâ tsî naub ge noxopa hā tama hâ. Hāb ka, ob ge ǁîba kaise ǂkhari ǁaerob ǀguiba nî ǂgaeǂgui. 11 Tsî ǀgurub ûitsama ge ib, xawe ǃaruǀî ûitsama tamab ge a ǁkhaisaǁî gao-ao, hûgu di ǀguib hîa ra ǃgûba, hîkākāheb nîse.
12 “Disi ǁnâgu hîats ra mûgu ge ǁnā gao-aogu hîa noxopa ǂgaeǂguitsoatsoa tamaga, xawe gu ge ǁkhāsiba nî māhe ǀgui iri di ǁaeba ǀgurub ǀkha gao-aose ǂgaeǂguisa. 13 Tsî hoa disigu ge hoatsama ge ǀguiǂâixa i, tsî gu ge ǁîgu di ǀgaib tsî ǁkhāsiba ǀguruba ge mā. 14 ǀGurub tsî ǁîb di disi gao-aogu tsîgu ge ǁKhaoba nî ǁnāǂam, xawen ge ǁKhaob tsî ǁîb di saoǃgonaona ǁîga nî ǃkhamdan, ǁîb a ǃkhūgu di ǃKhū tsî gao-aogu di Gao-ao amaga, tsîn ge ǁîna ǁhûisan, ǃkhōǂuisaben tsî ǂgomsaben ti ra ǂgaihe.”
15 Tsîb ge ǀhomǃgāba ge mîba te: “ǁGamgu, ǁîgu ais ǀai-aosa ǂnôagu hîats go mû gu ge ǃhaodi, ǁaedi, khoen tsî gowagu tsîna. 16 Disi ǁnâgu hîats ra mûgu tsî ǀgurub tsîn ge ǀai-aosa nî ǁkhan; ǁîgu ge ūs hân hoana ūǀhana si tsî ǁîsa nî ǀōǀkhā kai. ǁÎs di ǁgansa ǂû tsî gu ge ǁîsa ǀaes ǀkha nî khauǃkhū. 17 Elob ge ǁîgu di ǂgaogu ǃnâ ǁîb ǂâibasensa ǀguiǂâixase sîsenǂuis di ǂâisa ge mā, tsî ǁîgu di gaosisa ǀguruba ge mā, Elob di mîdi nî dīǀoaǀoahes kōse.
18 “Tsî tarekhoes hîats go mûs ge ǁnā kai ǃās hîa ǃhūbaib di gao-aogu ǂama ra gaosîsensa.”
© Khoekhoegowab Elobmîs © Bible Society in Namibia, 2020.
