ǃGaos ǁguibadi
1 “ǃKhūb sadu Elob ge ūbasen du nîse mā du ǃhūba du ga ūbasen tsî ǁanǃnâs khaoǃgâ, 2 i ge mâ khoe-i hoa-e ǁî-i di ǂguro ǂoaǂamsa ǃhanaǂû-i hîa i ra ǃgao-i hoa-e ǀharu-i ǃnâ ǂgā tsî ǃKhūb sadu Elob di ǀō-aisa ǀgoreǀîǃkhais tawa nî sī-ū. 3 Pristeri ǁnā ǁaeb ǃnâ ǃereamsa ūhâb tawa sī, î ǁîba mîba: ‘ǃKhūb sada Elob aiǃâ ta ge nētsē ra ǂanǃgâ, ǃhūb hîab ge ǁîba ūbasen da nîse sada aboxaga mîmâibab ǃnâ ta go ǂgâxa ǃkhaisa.’
4 “Pristeri ge sī-ūhe ra ǀharusa ū tsî ǃKhūb sadu Elob di altars aiǃâ nî mâi. 5 ǁNās khaoǃgâ du ge sao ra mîde nî mîǂui: ‘Sida aboxab ge Arameaǁîb hîa ge ǃgûkhoe ib, ǀoro khoen ǀkha Egipteb ǁga ǃgû tsî ǁnāpa ǃhaokhoese sī ge ǁanna. ǁNāpan ge ǁîna kai tsî ge ǀgaisa ǁae kai. 6 Egipteǁîn ge kaise ǁgaise ûi-ū da tsî gere khobodī da. 7 ǁNā-amaga da ge ǃKhūb sida aboxagu Elob kōse ge ǂgai, tsîb ge ǁîba sida ǂgaidomma ǁnâu tsî sida ǃgommi tsî ǁgâiǀāba ge mû. 8 ǁÎb kai ǁkhāsib tsî ǀgaiba xub ge sida Egipteb di khobosisa xu ge ǃnoraǃnora. ǁÎb ge buruxadīna dī tsî ǃaoǃaosa xūna gere ī kai. 9 ǁÎb ge nē ǃhūb tawa ǀkhī-ū da tsî nē ǂûtanixa ǃhūba sida ge mā. 10 ǁNā-amaga ǃKhūba ǂguro ǂoaǂamsa ǃâs ǃgaos dis ǁîb ge mā dusa hā-ūba.’
“ǁNāpa xu ǀharusa ǃKhūb sadu Elob mûǁae mâi, î ǁîba ǀgoreǀî. 11 ǃKhūb sadu Elob ge sats tsî sa omaris tsîna mā xūn hoan ǃaroma ǃgâiaǂgao, în Leviǁîn tsî ǃhaokhoen sadu ǁaegu ǁan hân tsîna dâǀhao.
12 “Mâ ǃnonaǁî kurib hoaba disiǁîǃâs sadu ǃhanaǂûn disa Leviǁîn, ǃhaokhoen, ǃguniǀgôan tsî ǃoataradi tsîna mā, în mâ ǀhûhâsib hoab ǃnâ ǂhâban hâ ǂûn hoana ūhâ. Nēsa du ga dī, 13 o ǃKhūb ǃoa mî: ‘ǃNâu disiǁîǃâs ge sida omde xu ūhe tsî Leviǁîn, ǃhaokhoen, ǃguniǀgôan tsî ǃoataradi tsîna sa mîmādi hîats ge sida mîmādi ǃoa ge māhe. Sida ge sa mîmādi ǃoagu ǁore tama i tsî ǁîde ǁkhāti ǀuru tama ge hâ i. 14 ǃOab ǃnâ da ge hâ i, o da ge disiǁîǃāsa tsâǀkhā tama ge hâ i; ǃanuoǃnâ da ge i, o da ge ǁîsa ǁkhāti tsâǀkhā tama ge hâ i; ǁkhāti da ge ǁîsa xu ǁō hân ǃaroma ǁguiba tama ge hâ i. ǃKhūtse, sida ge sa domma ge ǁnâuǀnam tsî sats ge mîmā da khami ǀgui ge dī. 15 Sa ǃanu hâǃkhaib ǀhommi ǃnâ hâba xu kōǁnâ, îts sa ǁaes Israeli dis tsî sidats ge mā ǂûtanixa ǃhūb tsîna ǀkhae, sida aboxagats ge mîmâiba hâ i khami.’
ǃKhūb ǂhunuma ǁaes
16 “Nētsēs aib ge ǃKhūb sadu Eloba hoaraga mîmādi tsî ǂnûiǂgādi âba du nî ǁnâuǀnamsa ra mîmā du; ǁnā-amaga ǁîde sadu hoaraga ǂgaob tsî ǀoms hoas ǀkha ǃkhōǀgaipe. 17 Nētsē du ge ǃKhūb a sadu Elo ǃkhaisa go ǂanǃgâ; sadu ge ǁîba ǁnâuǀnam, ǁîb di mîmādi tsî ǂnûiǂgāde ǃkhōǀgaipe tsî du ǁîde hoaǁae nî dī ǃkhaisa go mîmâi. 18 Nētsēb ge ǃKhūba sadu a ǁîb di ǂhunuma ǁae ǃkhaisa sadob ge mîmâiba khami ra ǃkhōǃgâ; ǁnā-amagab ge hoaraga mîmādi âba du nî ǃkhōǀgaipe ǃkhaisa ra mîmā. 19 ǁÎb ge nau ǁaedi hîab ge kurudi ǃgâ-ai nî kaikai du, tsî du ge ǁîb ǀonsa koa tsî nî ǀgapiǃgôa. ǁÎb ge mîmâi khami du ge nî ǁîb di ǂhunuma ǁae.”
© Khoekhoegowab Elobmîs © Bible Society in Namibia, 2020.
