2 Korinteǁîn 3 - Khoekhoegowab New Translation 2020 (KKG20)

ǀAsa ǃGaeǀhaos di ǃoaba-aon

1 ǁKhawa ge kha ǁî-aitsama ra koasentsoatsoa? Tamas ka io ge kha ǀnîsi ǀnî khoen khami ǃkhō-amǂkhanide sadu ǃoa tamas ka io sado xu ǂhâba hâ? 2 Sadu ge sige ǃkhō-amǂkhanidu, hîa sige ǂgaogu ǃnâ hoan nî khomai tsî ǁnâuǃāse xoahe hâdo. 3 ǃGāsa i ge a Xristub* di sîǂkhanidu, sige xa xoahe hâdu a ǃkhaisa. Ink-i ǀkhas ose, xawe Gagab ûitsama Elob dib ǀkha, ǀuiǂgapagu ais ose, xawe khoen di ǂgaogu ai.

4 Nēsa ge ge Xristub ǃnâ-u ge Elob ai ǀoasa ǂgomǃgâsa ūhâ xui-ao ra mî. 5 Sige xu ge nē sîsenna aitsama ra dī ti ge ge mî tama hâ, xawe Elob di ǁkhāsiba xus ge. 6 ǁÎb ge sige ǀAsa ǃGaeǀhaos di ǃoaba-aoge ase ge ǁkhāsiba ge mā, xoasa ǂHanub dises ose, xawe Gagab dise. Xoasa ǂHanub ge ra ǃgam, xawe Gagab ge ra ûi-ûi.

7 ǂHanub hîa ǁōba ge hā-ūb ge xoamûdi ǀkha ǀuib ai ge xoasa i. ǁÎb ge Elob ǂkhaisib ǀkha hā tsî Moseb aisa ǁnātikōse ge ǂkhai kai Israelǁaes ge kō ǁoa is kōse. Xaweb ge ǁnā ǂkhaisiba ega ge bē. 8 O mâtikō ǃnāsa ǂkhaisibas kha ǁnâi Gagab di ǃoabasa hā-ū ǁkhā? 9 ǁKharaba ra hā-ū ǃoabas ga ǂkhaisiba ūhâ, o mâtikō ǃnāsases ǃgâiǃōsiba ra hā-ūsa ǂkhaisiba ūhâ. 10 ǀOro ǃoabas ge ǂkhaisiba ūhâ, xawe ǀasa ǃoabas ǃnāsa ǂkhaisiba ūhâs ǀkhas ga ǀguiǀguihe, o ǁnā ǂkhaisiba ra ǂoaǃnâ. 11 ǁNā ǀoro ǃoabas hîa ge kās ga ǂkhaisib ǀkha hā, os ge ǀasa ǃoabasa ǃnāsa ǂkhaisib ǀkha nî hâhâ.

12 Nē ǃâubasensa ge ge ūhâ, ǁnā-amaga ge ge a ǁkhoaǂgaoxa. 13 Sige ge Moseb hîa ge ǀhāb ǀkha ǃgūnaib khami ī tama, Israelǁîn kā ra ǂkhaisiba mû tidese. 14 ǁÎn di ǂâidi ge nētsēs kōse ǂganamsa tsî ǀoro ǃgaeǀhaos ga khomaihe, o ǁnâuǃā tama hâ, xaweb ge Xristuba nē ǀhāba ǁîb ǃnâ ra ǂgom-i ǃaroma ra ūbē. 15 Xawe nētsēs kōse, Moseb ǂhanub* ra khomaihe ǃnās hoasab ge ǀhāba ǁîn ǂgaogu ai ra ǁgoe. 16 Xawe khoe-i ga ǃKhūb ǃoa dabasen, ob ge ǀhāba ra ūǁnâhe. 17 ǃKhūb ge a Gaga tsî ǃKhūb di Gagab hâpa, ǁnāpab ge ǃnorasasiba hâ. 18 Sada aidi ge ǃgū-aisa tama hâ. Sada hoada ge ǃKhūb di ǂkhaisiba mûsenǃnâxūs khami ra ǁgauǂui. Sada ge ǁîb di īb ǃnâ ǃnāsa ǂkhaisib ǀkha ra ǀkharaǀkharahe. Nēs ge ǃKhūb hîa a Gagaba xu ra hā.