Eksodus 31 - Khoekhoegowab New Translation 2020 (KKG20)

ǃKhūb ge Besaleli tsî Oholiab tsîkha ra ǁhûi

1 Tsîb ge ǃKhūba Moseb ǃoa ge mî: 2 “Tita ge Besaleli, Urib ôab, Huri di ǁnuriǀgôab, Judab ǃhaosa xu hâba ge ǁhûi. 3 Tsî ta ge ǁîba Elob Gagab ǀkha ǀoaǀoa tsî ǁnâuǃāb, ǂans tsî ǁkhāsib ǃomsîsenni diba ge mā. 4 Tita ge ǁîba ǂâiǂuis, ǀapeǁguis tsî ǃhuniǀurib, ǀhaiǀurib tsî brons-i ǀkha xūna kurus, 5 ǀuina ǃgaos, ǃnaon ǃnâ ǃgaoǂgās tsî ǃgaoǂuis tsî hâ ka sîsenǃnôa-i di ǂansa ge mā. 6 Tita ge Oholiab, Ahisamaxi ôab, Danni di ǃhaosa xu hâb tsîna Besalelab nî huise ge ǁhûi. ǁKhāti ta ge nau khoegu ǁkhāsiba ūhâgu tsîna ǂansa ge mā, î gu tita ge mîmā gu xūn hoana kuru: 7 ǃKhūb di Tentommi, ǃGaeǀhaos ǂGaes tsî ǁîs di ǂganais tsî ǃKhūb di Tentommi xūn, 8 tāb tsî ǁîb sîsenūxūn, ǃūmû ǃhuniǀuriǃamǀaekandelara tsî ǁîb di sîsenūxūn ǀkha, altarsa ǃgâihamxūna ǂhubi-ais ǃaroma, 9 altarsa ǁguibade ǂhubi-ais ǃaroma ǁîs di sîsenūxūn ǀkha, bronsǁāsenǃnâǃoreb tsî ǁîb di ǃgaoǃgaob hoab ǀkha, 10 ǂoaǂamsase ǂomsa ǃnâu pristersi saran Aronni tsî ǁîb ôagu din, 11 ǀnau-ū ǀkhera-oli-i tsî ǃgâihamxūna ǃanu ǃkhais ǃaroma. Nē xūna gu ge tita ge mîmā gu khami ǀgui nî kuru.”

Sabbattsēs

12 Tsîb ge ǃKhūba Moseb ǃoa ge mî: 13 “Israelǁîna mîba în Sabbattsēsa khai, nēs ǃgoaxa surigu ǃaroma ǁîn tsî tita tsîn ǁaegu hâ saos ase ī, tsî ǃKhūb ge ǁîb di khoen ase dī du ǃkhais di ǁgauǁgau xui-ao. 14 Sabbattsēsa khai ǁîs a ǃanu xuige. ǁNā tsēsa nau tsēdi khami ra ǃgapaǀî khoe-i ge nî ǃgamhe tsî ǁnā tsēs ai ga sîsen khoe-i hoa-i ge ǃaruǀî ti khoen di ǀgui-i ase ǃgapaǀîhe tide. 15 ǃNani tsēdets ge a sîsen ǁkhā, xawe hûǁî tsēs ge ǃKhūb di ǃgôasib ǃoa khaihe tsî nî sâhe. Khoe-i hîa ga Sabbattsēs ai sîsen-i ge nî ǃgamhe. 16 ǃGaeǀhaos di saos asen ge Israelǁîna Sabbattsēsa hoaǁae nî ǃgapaǀî. 17 Nēs ge hâhâ nî saos tita tsî Israelǁîn tsîn ǁaegu hâsa, ǃKhūb ge ǀhommi tsî ǃhūbaib tsîkha ǃnani tsēdi ǃnâ a kuru xui-ao, tsî hûǁî tsēs aib ge sîsenǀû tsî ge sâ.”

18 Elob ge Sinaiǃhommi ai Moseb ǀkha ǃhoatoa, ob ge ǁîba Moseba aitsamab disi mîmāde xoa-ai hâ ǀuiǂgapakha ge mā.