ǁKhaob ra ǂganamsa ǂkhanisa ǁkhowa-am
1 Tsî ta ge ǁNāb hîa trons ai ǂnôab di amǀkhāb ǃommi ǃnâ ǂkhanis, hoa ǀkhākha ai xoahe tsî hû ǂganamxūdi ǀkha ǂganamsasa ge mû. 2 Tsî ta ge ǀgaisa ǀhomǃgāba ge mû, ǃgari dommi ǀkhab nēti ra ǂgaiǂuise: “Tari-e kha a anu, ǂkhanisa ǂganamxūdi âsa khôas ǀkha ǁkhowa-amsa?” 3 Xawe i ge khoe-i xare-e ǀhommi ǃnâs kas, ǃhūbaib ais kas, ǃhūbaib ǃnakas kas hoasa ge ǀkhai i, nē ǂkhanis ǂganamxūde ǁkhowa-am tamas ka io nî ǁîs ǃnâ kō-e. 4 Kaise ta ge tsûsase khoe-i nē ǂkhanisa ǁkhowa-ams tamas ka io ǁîs ǃnâ kōs ǃaroma anuse hōhe tama ǃkhais xa ge ā. 5 Ob ge ǂnomdomgu* di ǀguiba tita ǃoa ge mî: “Tā ā, mû Judab ǃhaos di Xammi, Davidi ǃnomaba xu hâb ge go dan, ǁîb ge a ǁkhā, ǂkhanisa ǂganamxūdi âsa khôas ǀkha ǁkhowa-amsa.”
6 O ta ge trons ǁaegub ǃnâ ǁKhaob, ǂāhe hâ-i xase ība ge mûmâ, haka ûitsama kurusabegu* tsî ǂnomdomgu xa mâǂnamipehe hâse. ǁÎb ge hû ǁnâgu tsî hû mûde ge ūhâ i, hû gagagu Elob digu hîa hoaraga ǃhūbaib ǃoa sîǂuihe hâga. 7 Tsîb ge hā tsî trons ai ǂnôab di amǀkhāb ǃomma xu ǂkhanisa ge ū. 8 ǂKhanisab ge ū, o gu ge ǁnā haka ûitsama kurusabegu tsî ǀgamdisihakaǀa ǂnomdomgu tsîga ǁKhaob aiǃâ ge ǁnāǁgoe. Mâb hoab ge harps tsî ǃhuniǀuri ǃores hîa ǃgâihamxūn xa ǀoa hâsa ǃomǁae ge ūhâ i, ǃanun di ǀgoredi ase īna. 9 Tsîn ge ǀasa ǁnaetsana-e ge ǁnae:
“Sats ge a anu, ǂkhanisa ū
tsî ǁîs di ǂganamxūde ǁkhowa-amsa,
ǃgamhets ge tsîts ge sa ǀaob ǀkha Eloba khoena ge ǁamaǂuiba,
mâ ǃhaos, gowab, khoen tsî ǁaes hoasa xu.
10 Tsîts ge ǁîna gaosise tsî pristerse ge dī,
sada Eloban nî ǃoabase,
tsîn ge ǁîna ǃhūbaiba nî gaoǂam.”
11 Tsî ta ge ǁkhawa kō, o ta ge ǃgôahe ǁoasase ǂgui ǃgôab di ǀhomǃgān hîa trons ǂnamipe mân, ûitsama kurusabegu* tsî ǂnomdomgu tsîna ge ǁnâu, 12 ǃgari domgu ǀkha ra ǁnaese:
“ǁKhaob hîa ge ǃgamheb ge a anu,
ǀgaib, ǃkhūsib, gā-aisib, ǁkhāsib,
ǃgôasib, ǂkhaisib tsî koasa!”
13 Tsî ta ge kurusaben ǀhommi ǃnâ, ǃhūbaib ai, ǃhūbaib ǃnaka tsî hurib ǃnâ hâna ge ǁnâu, nētin ra mîse:
“ǁNāb trons ai ǂnôab tsî ǁKhaob tsîna ǃoa,
koas, ǃgôasib, ǂkhaisib tsî ǀgaiba
ǀamosib kōse!”
14 O gu ge haka ûitsama kurusabega “Amen” ti ge ǃeream, tsî gu ge ǂnomdomga ge ǁnāǁgoe Eloba gu nî ǀgoreǀîse.
© Khoekhoegowab Elobmîs © Bible Society in Namibia, 2020.
