Gogi ge Israels ǃoagu ra khâimâ
1 ǃKhūb di mîs ge tita ǃoa ge hā: 2 “Khoenôa ǀgôatse, sa aisa Gogi, Magogi ǃhūb dib, Mesexi tsî Tubali tsîkha di dana ǂgaeǂgui-aob ai ǃammâi, îts ǁîb ǃoagu kēbo 3 tsî mî: Nētib ge ǃKhūb Eloba ra mî: Tita ge sats ǃoagu hâ, sats Gogts, Mesexi tsî Tubali tsîkha di dana ǂgaeǂgui-aotse. 4 Tita ge ūdawa tsi tsî ǂhao-ūdaga sa ǃnanikha ǃnâ nî ǂgā. Tsî ta ge nî ǂgaeǂui tsi, sa hoaraga toroǂnubis, hān tsî hāǃgabi-aogu, ǀoasa torosaraga ǂgaeǂgā hâgu, kai ǂnubis toroǃkhamaogu ǁkhaukhōdi tsî ǁhâigôaga ūhâgu tsîna. 5 Persiab, Etiopiab tsî Libiab tsîgu khoegu ge ǁîgu ǀkha hâ; hoagu ge ǁkhaukhōgu tsî toroǀgapadi tsîna ūhâ. 6 Gomeri tsî ǁîb di toroǂnubidi hoadi, Bet-Torgamab tsî ǁîb dide ǃnū ǃkhaidi ǀapasǀkhāb dide xu; ǂgui ǁaedi ge sats ǀkha hâ. 7 ǂHomisen, î ǂhomisase hâ, sats tsî sats tawa ǀhao hâ ǂnubis tsîdo, îts ǁîna ǃûi-aose ība. 8 ǂOmxa ǁaeb khaoǃgâts ge satsa nî mîmāhe, îts ǁnā ǃhūb torob khaoǃgâ ge ǁkhawa omkhâiheb ǃoagu khâimâ. ǁNā ǃhūb ǂgui ǁaede xu ge ǀhaoǀhaohe khoen, Israeli ǃhomgu, gaxu ǁaeba ge hîkākāsase ǁgoe igu ai hâb ǃoa. ǁÎn ge ǂgui ǁaede xu ge oahā-ūhe tsî nēsi hoatsama ǃnorasase ǁan hâ. 9 Sats ge ǁgaoǂoas khami ǁîn ai nî hā, ǃâu-i ǃhūba ra ǃûǂam-i khami, sats tsî sa toroǂnubi hoadi tsî ǂgui ǁaedi sats ǀkha hâdi tsîdo.
10 “Nētib ge ǃKhūb Eloba ra mî: ǁNā tsēs ai di ge ǀapede sa ǂâis ǃnâ nî hā tsîts ge ǂkhawa ǀapesa nî ǂâiǂui, 11 tsî nî mî: Tita ge ǁnā ǃhūb, omǂnamisa tama ǃāde ūhâb ǃoagu nî khâimâ; tsî ta ge sâsase tsî ǃnorasase hâ khoena nî ǁnāǂam. ǁÎn hoan ge omǂnamisa tama ǃādi, dao-amdi tsî ǂganamū ǀurigu tsîna ūhâ tamadi ǃnâ ǁan hâ. 12 Sats ge ǁnāpa ǁkhâuǁnâ tsî nî tanibē, ǃū-aisa ge i ǃādi nēsi ǁanǃnâhe hâdi tsî nau ǁaede xu ge ǀhaoǀhaohe ǁaes ǂgārib tsî xūn tsîna ūhâs tsî ǃhūbaib ǁaegub ǃnâ ǁan hâsa nî ǁnāǂam. 13 Skebab tsî Dedanni di khoen tsî Tarsis di ǂharugu-aon tsî ǁîs ǂnamipe ǁgoe ǃādi din ge satsa nî dî: ‘ǁKhâuǁnâts nîsets go hā? ǁKhâuǁnâbasents nî tsîts ǀhaiǀurib tsî ǃhuniǀurib, ǀgoan tsî xūn tsî kai ǁkhâuǁnâs tsîna nî tanibēgats sa ǂnubisa go ǀhaoǀhao?’
14 “ǁNā-amaga khoenôa ǀgôatse kēbo, îts Goga mîba: Nētib ge ǃKhūb Eloba ra mî: Ti ǁaes Israels ga ǃnorasase ǁan ǁaeb aits ge nî hōǃâ, 15 tsîts ge sa hâǃkhaisa xu nî hā, ǃnū ǃkhaidi ǀapasǀkhāb dide xu kai ǂnubis toroǃkhamaogu ǀkha, hoagu hān ai ra ǃgapise; kaise ǂgui tsî ǀgaisa toroǂnubisa. 16 Sats ge ti ǁaes Israelsa nî ǁnāǂam, ǃâu-i ǃhūba ra ǃûǂam-i khami. ǀUni tsēdi ǃnâ ta ge ti ǁaes ǃoagu nî khâi kai tsi, o di ge ǁaede tita nî ǂan, sats Gogts ǃnâ-u ta ga ti ǃanusiba ǁîn mûdi aiǃâ ǂhaiǂhaio. 17 Nētib ge ǃKhūb ti Eloba ra mî: Sats xasa ǃgû-i ge tsēdi ǃnâ ta ge ti ǃgāgu, Israels kēbo-aogu ǃnâ-u ǃhoasa, ǁîgu ǁnā tsēdi ǃnâ gere kēboga ǁîn ǃoagu ta nî khâi kai tsisa?”
Elob ge Goga ra ǁkhara
18 “Gogi ga Israels ǃhūba ǁnāǂam tsēs aib ge ti ǁaiba nî khâi,”
tib ge ǃKhūb Eloba ra mî.19 “Ti ǁaib ǃnâ tsî ti ǂhubi ra ǀkhaoǂgaoxasib ǃnâ ta ge ge mî, ǁnātsēb kai ǃhūǂgubiba Israeli ǃnâ nî hâsa. 20 Hurib di ǁaun, ǀhomanin, ǀgurun tsî xamarin, ǂhanaben tsî ǃhūbaib ai hâ khoen tsîn hoan ge ti ǃaob xa nî ǀkhū. ǃHomgu ge nî aoǃkhupuhe, ǃgareǀuigu ge nî ǂkhū tsî gu ge ǂnubiǂgoagu hoaga ǃkhom tsî ǃhūb ai nî ǁnā. 21 Tita ge toroba Gogi ǃoagu ti ǃhomgu hoagu ai nî hā kai, tib ge ǃKhūb Eloba ra mî. Mâb hoab di gôab ge ǃgâsab âb ǃoagu nî hâ. 22 Tita ge ǁîba ǂhīǁōb tsî ǀaoǂnâxūs ǀkha nî ǀgoraǃgâ. Tita ge ǁîb tsî ǁîb di toroǂnubis tsî ǁîb ǀkha hâ ǂgui ǁaedi tsîn hoan ai ǀgaisa ǀnanub tsî ǃnareb, ǀaes tsî sulfuri tsîna nî ǀapi kai. 23 ǁNāti ta ge ǂgui ǁaedi mûǁae kaikaisen tsî nî ǂhaiǂhaisen, on ge tita a ǃKhū ǃkhaisa nî ǂan.”
© Khoekhoegowab Elobmîs © Bible Society in Namibia, 2020.
