Jerusalems ra ǁkharahe
1 Ob ge ǃKhūba ti ǂgaera ǃnâ ǃgari dommi ǀkha ǂgai tsî ge mî: “Sago ǃās di hîkākās ǃoa ǂhomisen hâgo, mâb hoab âgo hîkākās di ǁâtaniba ǃommi ǃnâ ūhâse, ǀgūse hā re!” 2 Sao rase ta ge ǃnani khoega ǀgapikab dao-ams ǀapasǀkhāb ǃoagu ǂnôasa xu gu ǃgoaxase ge mû, mâb hoab ǃgams di ǁâtaniba ǃommi âb ǃnâ ūhâse. ǁÎgu ǁaegub ge aoba ge hâ i tsaura ǃuri ǃkhaib ǀkha ge anasen hâ iba, xoaxuruba kamanab âb ai ūhâse. ǁÎgu ge ǂgâ tsî brons altars xōǀkha sī ge mâ. 3 Ob ge Israeli Elob di ǂkhaisiba hâ-aib ge i xeruba xu khâi tsî Tempeli di dao-ams ai sī ge mâ. Ob ge ǃKhūba tsaura ǃuri ǃkhaib ǀkha ge anasen hâ-i khoeb, xoaxuruba kamanab âb ai ge ūhâ iba ge ǂgai. 4 ǃKhūb ge ǁîb ǃoa ge mî: “Jerusalems ǃnâ-u ǃkharu, î hoaraga khoen ǁîs ǃnâ ra dīhe ui-uisasib xa ǀhaimâinǀom tsî ra ǃgaen di ǃūdi ai sao-e dī.”
5 Tita ra ǁnâu hîab ge ǃKhūba nau khoegu ǃoa ge mî: “ǁÎba sao î ǃāsa ǃgûǃnâ, î go khoena ǃgam. Sago mûs ge sâu tide, tsî go ge ǀkhom tide. 6 Kaira aogu, ǂkham khoegu tsî khoedi, ǀgôaron tsî tarekhoedi tsîn hoana ǃgam! Xawe saosa ǃūdi ai ūhâna tā tsâǀkhā. Ti Tempeli tawa tsoatsoa.” O gu ge kaikhoegu ti ommi aiǃâ ge hâ igu ǀkha ge tsoatsoa.
7 Ob ge ǁîgu ǃoa ge mî: “ǃGûǂoa, î omma ǀuriǀuri, î ai-omga ǃgamhe hân ǀkha ǀoaǀoa.” ǁNā-amaga gu ge ǃās ǃnâ ǃgûǂoa tsî gere ǃgam.
8 ǁÎgu ǃgamǂuis ǀkha ǀhabe tsî tita ǀguita ǃgau hâ hîa ta ge ǃoa rase ti ais ai ǁnāǁgoe tsî ge ǂgaiǂui: “Okha ǃKhū Elotse, Israeli di ûiǃgau hânats kha nî hîkākā, Jerusalems aits sa ǁaiba ra ǁhōǂuio?”
9 Ob ge ǁîba tita ǃoa ge mî: “Israeli tsî Judab khoen di ǁoreb ge ǃnāǂamsase a kai. ǃHūb ge ǀaoǂnâxūs xa ǀoa hâ tsî ǃās ge ǀhôagaoǁaxasigu xa ǀoa hâ; ǁîn ra mî amaga: ‘ǃKhūb ge ǃhūba ǀuru hâ, ǃKhūb ge mû tama hâ.’ 10 Xawe ti mûs ge ǁîna ǀkhom tide tamas ka io ǁîna sâu tide. Xawe ta ge tita ǁîna ǁîn di ǁoren ǃaroma nî mādawa-am.”
11 Ob ge tsaura ǃuri ǃkhaiba ge ana hâ i khoeb, xoaxuruba kamanab âb ai ge ūhâ iba ǂhôasa ǃKhūba ge oahā-ūba mî rase: “Tita ge mîmā tets go khami go dī.”
© Khoekhoegowab Elobmîs © Bible Society in Namibia, 2020.
