1 Paulub, Jesub Xristub* ǃaroma ǃkhōsabeb tsî Timoteub sada di ǃgâsab hâkha xu.
Filemonni, sikhom di ǀnamǀnamsa gurisa tsî sîsenǁare-aob ǃoa, 2 kerkheb hîa sa oms ǃnâ ra ǀhaob, sikhom di gagasi ǃgâsas Afias tsî ǁkhāti sikhom di horesa ǂgoms di ǃkhamaob, Arxipusi hân ǃoa.
3 Ab Elob sada ǁGûb tsî ǃKhūb Jesub Xristuba ǀkhommi tsî ǂkhîba mā du.
Filemonni di ǀnammi tsî ǂgoms
4 Mâ ta ga ǀgore ǃnās hoasa ta ge satsa ǀgoreba tsî Eloba ra gangan, 5 sa ǀnammi tsî ǂgoms ǃKhūb Jesub tsî ǁîb di ǃanunats ūba hâb xa ta ra ǁnâuo. 6 Ti ǀgores ge ǂgoms sida ǀkha du ra ǀgoragus nî mâ ǃgâi mās Xristuba da a mā ǁkhās hoas ǃnâ ǀgaisa. 7 Tita ǂûta tsîn ge kai ǃgâiaǂgaob tsî ǁkhaeǂgaoba sa ǀnamma xu ge hō, ǃanun di ǂgaogu ge sats ǃnâ-u khoakhoahe xui-ao, ti ǃgâsatse.
Paulub ge Filemonni tawa Onesimuba ra ǃhoaba
8 ǁNā-amaga ta ge kai ǁkhoasib Xristub ǃnâ ta ūhâb ǀkha ga mîmā tsi hâ tare-ets nî dī ǃkhaisa, 9 xawe ta ge satsa ta ūba hâ ǀnammi ǃaroma ra ǂgan tsi. Nēti nēsa tita, Pauluta, sa ǀhōsata, kaira hâ tsî nēsi ǃkhōsis ǃnâ Xristub Jesub ǃaroma hâ sîsabeta xu ūǃoa re. 10 O ta ge Onesimub hîa Xristub ǃnâ ti ôab; ǃkhōsis ǃnâ ta ge ǁîb di gagasi ǁgû kaib ǃaroma nē ǂgansa ra dī. 11 ǃKharu ge ǁaeb ǃnâ harebeoǃnâ ge ib, xawe nēsi sakhom hoakhoma harebeba hâba.
12 O ta ge nēsi ǁîba sats ǁga ra sî-oa, ǁîba ta kaise kai ǀnamma ti ǂgaob ǃnâ ūba hâse. 13 Tita tawa ta ge ǁîba goro ūhâ ǂgao, titab sa amǃnâs ai ǃkhōsis ǃnâ ta ǃGâiǂhôas ǃaroma hâ ǁaeb ǃnâ nî ǃoabase. 14 Xawe ta ge titats nî huise ǁgari tsi ǂgao tama hâ, tsî ta ge sa ǃgâisib nî satsa xu hâ ǃkhaisa ra ǂgao, î ta tā sa mā-ams ose xū-e dī.
15 ǀNîsib ge ǁîba ǂkhari ǁaeroba satsa xu go bē hâ i, sats nî ǀamose ǁîba ūhâse. 16 ǃAruǀî khoboses ose, xawe ǁnās xa ǃnāsase, ǀnamsa ǃgâsab ase. Tita ǃoab ge ǀō-aisa, mâtikō ǃnāsaseb satsa a ība ǁkhā, khoesise tsî ǁkhāti ǃKhūb ǃnâ.
17 Titats ga Xristub ǃaroma sa ǀhōsase mûo, titats ga ǁkhoreǁhare hâ khami Onesimuba ǁkhoreǁhare re. 18 Tsîb ga ǁîba satsa ǀhôagaoǃnâ hâ, tamas ka io surude hâo, tita ǃgôaba re. 19 Nēsa ta ge ti ǂhunuma ǃommi ǀkha ra xoa: Tita, Pauluta ge nî matare-oa tsi. (ǂHâbasa tama i kom hâo, tita nî satsa sa ûibats tita surude hâ ǃkhaisa ǂâiǂâiǃnâsa.) 20 Xuige ti ǃgâsatse ǃKhūb ǃaroma nēsa dība te re, îts ǁnās ǀkha khoakhoa te, Xristub ǃnâ sa gagasi ǃgâsata ase.
21 Sa ǁnâuǀnamxasib ai ta ra ǂgomǃgâ, ǂgan tsi ta ra-ets nî dī ǃkhaisa, se ta ge nēsa ra xoa, xawe ǁkhāti ǁnās xa ǃnāsasets nî dī ǃkhaisa ǂanse. 22 ǁKhā ǁaeb ai ǁkhāti ǃnā-om-e, hâǃnâ ta nîse ǂhomiba te, Elob nî sadu hoadu di ǀgoredi ǃnâ-u sado mā-oa te ǃkhaisa ta ra ǃâubasen xuige.
ǀUni tawededi
23 Epafrab hîa ǁîb tsîna Xristub Jesub di ǀons ǃaroma ǃkhō-oms ǃnâ tita ǀkha ǂnôab tsîn ge ra tawede tsi. 24 ǁKhāti gu ge ti sîsenǁare-aogu Markub, Aristarxub, Demasi tsî Lukab hâgu tsîna ra tawede tsi.
25 Ab ǀkhommi ǃKhūb Jesub Xristub diba sadu hoadu ǀkha hâ re.
© Khoekhoegowab Elobmîs © Bible Society in Namibia, 2020.
