1 Sîsenmā-aodo, sadu di ǃgāna ǂhanu tsî ǂhanu-ai ǀgaub ai sîsenū re, sadu tsîn ǀHonkhoeba ǀhommi ǃnâ ūhâ ǃkhais di ǂans ǀkha.
ǃAruǀî hâ ǁguiǂamdi
2 ǀGores ǃnâ hâhâ, î du gangans ǀkha ǁîs ǃnâ ǂkhaikari hâ. 3 Sige tsîna ǁkhāti ǀgoreba re, îb Eloba sige dao-am-e mîs ǃaroma ǁkhowa-amba, ǁîb ǃaroma ta a ǃkhōsabe Xristub* di ǂganǃgâsasiba ge nî ǃhoa ǁkhāse. 4 Î ta ǁîsa ǃhoa ta nîse i a ǂhâbasas kōse ǂanǂan.
5 Gā-aise tanisen re ǃauga hân ǃoagu, î du hoaǁae ǁaeba ǂhanuse sîsenū. 6 Hoaǁae ǃgâi ǃhoaǀgaub, ǂō-i ǀkha ǁkhoaǁkhoahe hâba ūhâ re, î du ǂan ǁkhā mâti du hoaraga khoena nî ǃeream ǃkhaisa.
ǀUni tawededi
7 Tixikub, ǀnamsa ǃgâsa tsî a ǂgomǂgomsa ǃoabaǁare-aob, ǃoaba-aob ǃKhūb di sîsenni ǃnâb ge hoaraga xūn tita ǀkha nî īna sado nî mîba. 8 ǁÎba ta ge sadu ǁga ge sî, sige hâ ǀgausa mîba du tsîb nî sado ǂgaoǂgaoǃnâse. 9 Onesimub, ǁnā ǂgomǂgomsa tsî ǀnamsa ǃgâsab sadu dib ǀkha, ǁîkha nî nēpa ra īn hoana ǂanǂan duse.
10 Aristarxub, tita ǀkha ǃkhō-oms ǃnâ hâb, tsî ǁkhāti Markub, Barnabab ǁnurib tsîn ge ra tawede du. (Sadu ge ǀnai Markub ga sadu tawa sī, o du nî ǁkhoreǁhare bi ǀgaus di ǁguiǂamde ge ǃkhōǃoa.) 11 Jesub, Justub tis tsîna ra ǂgaiheb tsîn ge ǁkhāti ra tawede du. Nēgu ge hūs di Jodeǁî sîsenǁare-aogu, tita ǀkha Elob Gaosib ǃaroma gere sîsenga tsî gu ge tita kai ǁkhaeǂgao-i ase ge ība i.
12 Epafrab, sadu di ǀguib, Xristub Jesub di sîsenaob tsîn ge ra tawede du. ǁÎb ge hoaǁae sado ǀgaisase Elob di hoaraga ǂâis ǃnâ du nî ǀomkhâi tsî ǁaposase mâse ra ǀgoreba. 13 Tita ge ǁîb di sîsenni sadu tsî Laodiseas tsî Hirapolis ǃnâ hâ khoen tsînab ra dībab xa aitsama a ǃkhō-am ǁkhā. 14 Lukab, sadu di ǀnamsa ǀaedī-aob tsî Demas hâkha tsîn ge ra tawede du.
15 Ti ǃgâi ǁkhorebade Laodiseas di ǂgomsaben tsî Nimfas tsî ǁîs di oms ǃnâ ra ǀhao kerkheb tsîna mā re. 16 Tsî sadu tawas ga nē sîǂkhanisa khomaihe ǃnās hoasa ǁapoǁapo re, Laodiseas kerkheb ǃnâs tsînas nî khomaihe ǃkhaisa. ǁKhāti Laodiseas kerkheb di sîǂkhanisa du nî khomai ǃkhais tsîna. 17 Î Arxipuba nēti mîba re: “ǃOabas ǃKhūb ǃnâts ge ǃkhōǃoasa dīǀoaǀoa re.”
18 Tita Pauluta ge ti ǂhunuma ǃommi ǀkha nēsa ra xoa: Tawedes tita Pauluta xu. ǂÂihō re ti ǃgae-ūdade.
ǀKhomma ab hâǀkhā du.
© Khoekhoegowab Elobmîs © Bible Society in Namibia, 2020.
