ǃNāsa ǃgôaǃgonhes Xristeǁîn dis
1 ǁNā ǁaeb ǃnâb ge gao-aob Herodeba ǀnîn kerkheb dina ge ǃgôaǃgontsoatsoa. 2 Tsîb ge Jakobub, Johaneb di ǃgâsaba gôab ǀkha ge ǃgam kai. 3 Tsî mâtikōse gu Jodeǁî ǂgaeǂgui-aoga nēs xa ǃgâibahe ǃkhaisab ge mû, ob ge Herodeba Petrub tsîna Pasxaǁâudīb* di ǁaeb ai ge ǃkhō. 4 Tsîb ge ǃkhō-oms ǃnâ ǂgā bi tsî haka ǃnandi, mâs hoas haka toroǃkhamaoga xu ge hâ ide ge ǃûi kai bi, khoen aiǃâb nî ǁîba Pasxaǁâudīb khaoǃgâ ǁnâuǃgâse. 5 Xawe Petrub ge ǃkhō-oms ǃnâ hâ i ǁaeb hoabab ge kerkheba ǂgaoba xu ǁîba Elob ǃoa gere ǀgoreba.
Petrub ge ǃkhō-omsa xu ra ǃnoraǃnorahe
6 Herodeb nî ǁnâuǃgâs ǃaroma ǂoaxa-ū bis aiǃâ ge hâ i tsuxubab ge Petruba ǀgam toro-aokha ǁaegu ǀgam ǀuriǃgae-ūdara ǀkha ǃgaehe hâse ge ǁomǁgoe i; ǀnîkha ge ganupe ǃkhō-oms di dao-ams tawa ge ǃûimâ i. 7 O i ge ǃnapetamase ǃKhūb di ǀhomǃgā-e ǂhai tsî Petrub aiǃâ ge mâ tsîb ge ǃnâba ǃkhō-oms di ǃnā-omsa ge ǃnâǃnâ. ǃHōs ai ǂnau tsî ǂkhaiǂkhai bi tsîb ge ǀhomǃgāba Petrub ǃoa “ǃHaese khâimâ!” ti ge mî. Tsî ra ge ǃomǃarora ai ge hâ i ǀuriǃgae-ūdara ge ǁnāǁgôa. 8 Tsîb ge ǀhomǃgāba Petrub ǁga ge mî: “Anasen îts ǀkhapura âtsa ǂgaeǂgā.” Tsî toab ge ob ge “Îts ǁkhāti sa anaǂamsaraba ana tsî sao te” ti ge mî.
9 Tsîb ge Petruba ǀhomǃgāba ǃkhō-oms di ǃnā-omsa xu ge saoǂoa. ǁÎb ge ǀhomǃgāb go dī-i a ama ǃkhaisa ge ǀū i tsî ǁhapob ra ti ge ǂâi hâ i. 10 Tsî kha ge ǂguro ǃûis tawa ǃkharu, ǀgamǁî ǃûis tawa ǃkharu tsî ǀams ai ǀuri dao-ams hîa aitsama daob ǀkhāb ǁga ra ǁkhowa-amsens tawa ge sī. Daos ge aitsama ǁkhowa-amsen, o kha ge ge ǂoa. Tsî ǃkharutoa tsî kha ge ǃgan-i ǃnâ sī ob ge ǀhomǃgāba ǁnātimîsi ge bē.
11 Petrub ge tare-i go ī ǃkhaisa ǂanǁapo, ob ge ǁîb ǃnâ ge ǂâi: “Amaseb ge ǃKhūba ǁîb di ǀhomǃgāba go sî, titab Herodeb di ǀgaib tsî hoaraga xūn, Jodeǁîn go tita ǀkha nî īse goro ǃâubasenna xu nî ǃnoraǃnorase.”
12 Tsî tare-i ǃnâb hâ ǃkhaisab ge sī mûǂan, ob ge Marias, Johaneb hîa Markub tis tsîna ǀon hâb îs di oms, ǂguin ge ǁîs ǃnâ ǀhao tsî gere ǀgores ǁga ge ǃgû. 13 Dao-ams tawab ge ǃgubu-am os ge Rodas ti ǀon hâ ǃgāsa ge sī, tari-i ra ǃgubu-am ǃkhaisas nî kōse. 14 ǁÎb di dommas ge ǁnâuǃā os ge ǁnātikōse ǃgâiaǂgao tsî dao-ams tsîna ǁkhowa-am tamase ǃkhoe-oa tsî hoana ge mîba: “Petrub ge dao-ams tawa mâ!” 15 On ge “Sas ge ǃkhaus hâ!” ti ǁîsa ge ǃeream. Tsî ǀûs oses ge Petrub di dommas go ǁnâuǃā ǃkhaisa mî on ge “Ob ge ǁnâi a ǁîb di ǀhomǃgā” ti ge mî.
16 Ob ge xawe Petruba ǀû tamase gere ǃgubu-am. Tsî dao-amsan ge sī ǁkhowa-am tsî ǁîba mû, on ge kaise ge burugâ. 17 Tsîb ge Petruba ǁîna ǃnōǃnō tsî mâtib go ǃKhūba ǃkhō-omsa xu a huiǂui bi ǃkhaisa ge mîba. Tsîb ge ǁîna ge mîba: “Jakobub tsî nau ǃgâsan tsîna ǁkhāti tare-i go ī ǃkhaisa ǁgamba re.” ǁNās khaoǃgâb ge ǀnî ǃkhai-i ǁga ge ǃgû.
18 ǁGoagab ge kai ǂnoagub di ǀgomma toroǃkhamaogu ǁaegu ge khâi, tare-i go Petrub ǀkha ī ǃkhais xa. 19 Ob ge Herodeba ǁîb nî ôahe ǃkhaisa ge mîmā, xawe gu ge hō bi tama ge i. Tsîb ge ǃûi-aoga dîǂuiǃnâ tsî ǃgamhe gu nî ǃkhaisa ge mîmā.
ǁNās khaoǃgâb ge Herodeba Judeaba xu ǃgû tsî ǁaero-e Kaesareas ǃnâ sī ge hâ.
Herodeb di ǁōb
20 Herodeb ge kaise Tirus tsî Sidons di khoen ǀkha ge ǁaixa on ge ǂnûǁkhaebaǃnansa ge sî, ǁîb ǀkha nî sī ǂkhîba dīse. Tsîn ge aibe Blastub, Herodeb di ǂammâisab hîa gao-ommi di ǃereamsa ge ūhâ iba ge gowadan, îb ǁîna hui tsîn ge Herodeb ǀkha ge ǀhao ǁkhā. 21 ǀHaon nî tsēs ge hā, ob ge Herodeba ǁîb di gaosi ǂamsaraba ǂgaeǂgā tsî ǀgoraǃgâǃnaos, ǁîb dis ai sī ǂnû tsî ǁîna gere gowaǀî. 22 On ge khoena “Amase nēb kom khoe-i di dom tama tsî a elo-i dio!” ti ge ǂgaiǂui.
23 Elobab ge ǃgôasiba mā tama i, xui-aob ge Herodeba ǀhomǃgāb ǃKhūb dib xa ǁnātimîsi ǂnauǁguihe tsîb ge ǂunin xa ǂûhe tsî ge ǁō.
24 Xawes ge Elob di mîsa ǃaruǀîǀgui ge khoraǂuisen tsîn ge ǂguina ge ǂgom.
25 Tsî kha ge Barnabab tsî Saulub tsîkha sîhe kha ge hâ i sîsenni ǀkha kha ge Jerusalems ǃnâ toa, o Johaneb, Markub tis tsîna ge ǀon hâ iba ǁîkha ǀkha ūsao tsî Antioxias ǁga ge oa.
© Khoekhoegowab Elobmîs © Bible Society in Namibia, 2020.
