ǃNona sari-aogu
1 ǃKhūb ge Abrahamma Mamres di aikehaidi tawa ge ǂhai. ǁNāpab Abrahamma ǁîb tentoms di ǂgâ-ams tawa, ǁîb a kaise ǀgamsa ǁaeb tsēs dib ai ǂnôa 2 hîab ge kōkhâib geo, ǃnona khoegu ǁîb ais ai mâga ge mû. ǁÎb ge ǁîgab ge mûo, ǁîga ge ǃkhoeǃoa. Tsîb ge Abrahamma ais âb ra ǃhūba tsâǀkhāse ǃhon 3 tsî ge mî: “ǃGôahesago, tā go toxopa ti oms tawa ǀkhī tamase ǃkharu re. 4 A ta ǁanǂaiǃnâ go nî ǁgam-e ǀkhī-ūba go, î go nē hais ǃnaka sâ re. 5 A ta ǁkhāti ǂûxū-e hā-ūba go re sorodi âgo go nî aiǃâb ǃoa garu ǃgûs âgo ǃaroma ǀgaiǀgaise. Ti oms tawa hās ǀkha go go tita ǃgôasiba mā xuige a ta ǃoaba go re.”
O gu ge “Ā, ǂhanu a, xuige ǁnāti dī re” ti ge mî.
6 Ob ge Abrahamma ǃnoesase tentoms ǃnâ sī ǂgâ tsî Sarasa ge mîba: “ǃHaese sa ǂoaǂamsa mel-e xu ū, î pere-i xa am re.” 7 Tsîb ge goman ǁga ǃkhoe tsî ǂoaǂamsa tsâun âb di ǀgui-e ū tsî ǃgāba ge mā, ǃhaeseb sī nē sari-aoga nî ǂhomibase. 8 ǁÎb ge âudai-i, ǀâdai-i tsî ǁgan-i tsîna hā-ū tsî khoega ge mâi-aiǃâ. Tsîb ge ǁîga ǃoaba tsî hais ǃnaka ǁîgu ra ǂû hîa ge mâ.
9 Tsî gu ge “Sa taras Sarasa mâpa hâ?” ti ge dî bi.
Ob ge Abrahamma “Tentoms ǃnâ hâ” ti ge ǃeream.
10 Ob ge ǁîgu di ǀguiba ge mî: “ǃGoaxa kurib di nē ǁaeb ai ta ga oahā, os ge sa taras, Sarasa aore ǀgôaba nî ūhâ.”
ǁNā ǁaeb ais ge Sarasa ǁîb ǃgâb ai, tentoms di ǂgâ-ams tawa mâ tsî gere ǃgâ. 11 Abrahammi tsî Saras hâra ge kaise ge kaira hâ i, tsîs ge Sarasa ǀgôa-es ga ǁora hâ ǁaeb tsîn xa ǀnai ge ǃkharuǀkhāhe hâ i. 12 Os ge Sarasa ǁîs ǃnâ âi tsî ge ǂâi: “Tita nētikōse kaira hâ ta, xare ta ǁomǁares di tura-e noxopa ūhâ? Tsî ǁnās ǀgui tamas, ti aob tsîn kom kaise kaira hâo.”
13 Ob ge ǃKhūba Abrahamma ge dî: “Tare-i ǃaromas Sarasa âi tsî ‘Amase ta kha nētikōse ta kaira hâ hîa ǀgôa-e ǁora ǁkhā?’ ti go mî. 14 Xū-i ǃKhūba ǃgomba-i xare-e kha hâ? ǀNai ta go mî khamis ge Sarasa ǃgoaxa kurib di nē ǁaeb ai ta ga oahā, o aoreǀgôaba nî ūhâ.”
15 Os ge Sarasa ǃaos gere xui-ao ǀūxū tsî “Âi tama ta ge go hâ i” ti ge mî.
Ob ge ǃKhūba “Hî-î, âis go” ti ge mî.
Abrahammi ge Sodomsa ra ǀkhomaba
16 O gu ge khoega ǂûtoa gu geo khâi tsî Abrahammi xa ǃgûǂuihe hâse ge ǃgû. Tsî gu ge Sodoms ai gu ra kōǁgôa ǃkhai-i tawa ge sī. 17 Ob ge ǃKhūba ge mî: “Tita ge tare-e ta ra dī ǂgao ǃkhaisa Abrahamma xu gaugau tide. 18 ǁÎb di surib ge kai tsî ǀgaisa ǁaese nî ī tsî ta ge ǁîb ǃnâ-u hoaraga ǁaede nî ǀkhae. 19 Tita ge ǁîba ge ǁhûiǂui ǁîb ôagu tsî suribab tita ǁnâuǀnam tsîn ǃgâi tsî ǂhanu-ai xūna nî dīse nî mîmāse. Tsîn ga ǁnāsa dī, o ta ge hoaraga xūn ǁîba ta ge mîmâibana nî dī.”
20 Tsîb ge ǃKhūba Abrahamma ge mîba: “ǁNāpan ge kaise ǁgaisi xūna Sodoms tsî Gomoras hâra xa ra ǃhoahe tsîb ge ǁîra ǁoreba kaise a kai. 21 ǁNā-amaga ta ge ǁgôa tsî nē hâ ǀhapiǂnûiǀkhādi a ama ǃkhaisa sī nî ǂanǂuikaisen.”
22 ǃKhūb ge Abrahammi ǀkha nau khoekha ge Sodoms ǁga ǃgû, o ge hâ-oa. 23 Ob ge Abrahamma ǃKhūba ge dî: “Ots kha amase ǂhanu-ain tsîna ǁnān hîa a ǂkhaban ǀkha nî hîkākā? 24 Korodisi ǂhanu-ai khoen ga ǁnā ǃās ǃnâ hâo, hoaraga ǃāsats nî hîkākā? ǁÎsats ǁnā korodisin ǃaroma ǁnâi sâu tide? 25 Amasets ge ǂhanu-aina ǂkhaban ǀkha a ǃgam ǁoa. ǁNās ge a īǁoa! Amasets kom toxopa ǁnāsa a dī ǁoao. Tsîts ǁnāsa nî dīs ka, on kom ǀhapiona ǀhapixan ǀkha ǀguitikōse nî ǁkharaheo. Ob kha hoaraga ǃhūbaib di ǀGoraǃgâ-aoba ǂhanuse ǁnâi dī tide?”
26 Ob ge ǃKhūba “Korodisi ǂhanu-ai khoena ta ga Sodoms ǃnâ hō, o ta ge ǁîn ǃaroma hoaraga ǃāsa nî sâu” ti ge mî.
27 Ob ge Abrahamma “Tsara tsî ta tsaos ǀguisa i, xawe ta ge ǁkhoasib, ǃKhūb ǀkha ǃhoas diba go ūhâ i. 28 On ga hakadisikoroǀa ǂhanu-ai khoen ǀguina hâ, ots kha koron ra korodisisa xu ǃnubu xui-ao hoaraga ǃāsa nî hîkākā?”
Ob ge ǃKhūba “Hakadisikoroǀa ǂhanu-ai khoena ta ga hō, o ta ge ǃāsa hîkākā tide” ti ge ǃeream bi.
29 Ob ge Abrahamma ǁkhawa “ǀNîsin ge hakadisi khoen ǀguina hâ” ti ge mî.
Ob ge “Hakadisi ǂhanu-ai khoen ga hâ, o ta ge ǃāsa hîkākā tide” ti ǃKhūb xa ge ǃereamhe.
30 ǃAruǀîb ge Abrahamma “Tā toxopa ǁkhawa ta ra ǃhoa ǃkhais xa ǁaixa re ǃKhūtse. O ǃnonadisin ǀguin ga hâo mâtis?” ti ge dî.
“Tita ge ǃnonadisin kao, ǃāsa hîkākā tide” tib ge ǁîba Abrahamma ge ǃeream.
31 Ob ge Abrahamma “ǁKhoasib ǃKhūb ǀkha ǃhoas diba ta ūhâ xui-ao ta ge ra dî. Ots ga ǀgamdisi khoen ǀguina hō, o mâtis?” ti ge dî.
Ob ge ǁîba Abrahamma ge ǃeream: “ǀGamdisi ǂhanu-ai khoen ga hâ, o ta ge ǃāsa hîkākā tide.”
32 Ob ge Abrahamma “Tā toxopa ǁaixa-ū te re ǃKhūtse. A ta ǀgui ǃnās ǀguisa noxopa dî re. O disin ǀguin ga ǂhanu-ai o mâtits nî dī?” ti ge dî.
Ob ge “Disi ǂhanu-ai khoen ga hâ o ta ge ǃāsa nî sâu” ti ge ǃeream bi. 33 Abrahammi ǀkhab ge ǃhoatoas khaoǃgâb ge ǃKhūba ge bē tsîb ge Abrahamma oms âb ǁga ge ǁaru.
© Khoekhoegowab Elobmîs © Bible Society in Namibia, 2020.
