1 “Tita ge ti sîsabeba nî sî, daobab nî ǂhomiba tese. Ob ge ǃKhūb hîa du ra ôaba ǃnapetamase Tempeli âb ǃoa nî hā. ǁNā sîsabeb ǃgaeǀhaos dib sadu ra mûǂuibab ge ra hā,”
tib ge ǃKhūb Hoaǀgaixaba ra mî. 2 Xawe tari-e ǁîb hās di tsēsa nî mâǃkharu ǁkhā? Tari-e ǁîb ga ǂhai, o nî mâ ǁkhā? ǁÎb ge ǀurin tsunitsuni-aob di ǀaes khami ī tsî ǁā-aob di ǀgaisa sē-i khami. 3 ǁÎb ge ǀhaiǀurib di tsunitsuni tsî ǃanuǃanu-ao-i khami ǂnû tsî Leviǁîga nî ǃanuǃanu, tsîb ge ǁîga ǃhuniǀurib khami nî ǃanuǃanu, o gu ge ǁîga ǂhanu ǁguibade ǃKhūba nî hā-ūba. 4 O di ge Judab tsî Jerusalems di ǁguibade ǃKhūba nî ǃgâiba, ǀnai di ge ǃkharu ge kurigu ǃnâ ī-i khami.
5 “Tita ge sado nî ǀgoraǃgâse sadu ǃoa nî hā, tsî ta ge ǁnātimîsi nî ǃkhō-am, ǃgai-aon, ǃgamekhôa-aon, ǂkhaba ǃkhō-amaon, sîsenaona mātares âna ra gāxaǃnân, ǃoataradi tsî ǃguniǀgôan tsî ǃhaokhoen tsîna ra ǀhôagaoǃnân tsî tita ǃaoǃgâ taman tsîn ǃoagu,”
tib ge ǃKhūb Hoaǀgaixaba ra mî.Disiǁîǃâsa mās
6 “Tita ǃKhūta ge ǀkharaǀkharasen tama hâ. ǁNā-amagas ge sadu Jakob surib didu hîkākāhe tamasa. 7 Sadu aboxagu di tsēde xu du ge ti ǂnûiǂgāde ǃharaxū tsî ǁîde ǃkhōǀgaipe tama hâ. Tita ǃoa ǃhobasen re, o ta ge tita sado ǃoa nî oaǀkhī, tib ge ǃKhūb Hoaǀgaixaba ra mî. Xawe du ge sado ‘Mâti da nî ǃhobasen’ ti ra mî. 8 Khoe-e Eloba gāxaǃnâ ǁkhā-e? Xawe du ge sado tita gāxaǃnâ tsî ‘Mâti da ra gāxaǃnâ tsi?’ ti ra dî. Disiǁîǃâs tsî ǁguibas tsîra ǃnâ du ge ǁnāsa ra dī. 9 ǀÂxareb ge sadu ai ǁgoe, tita du ra gāxaǃnâ amaga, sadu hoaraga ǁaes dido. 10 Hoaraga disiǁîǃâsa sâuǃnâ-omsa ǃoa hā-ū re, în ǂûna ti ommi ǃnâ hâ, î ǁnās ǀkha tita ǃâitsâ, tib ge ǃKhūb Hoaǀgaixaba ra mî. ǃÂitsâ te, î mû ise ta ǀhommi di mûǂuidaode ǁkhowa-am tsî ǃnāǂamsa ǀkhaeba ǁhōǂuiba du tidesa. 11 Tita ge ǂhomna nî ǁkhae, în sadu ǃhūb di ǂûna tā hîkākā, tsî sadu draibehaidi ge ǂûtanioǃnâ tide,”
tib ge ǃKhūb Hoaǀgaixaba ra mî.12 “O di ge ǁaedi hoade sado ǃgâiǃgâxa khoese nî ǃgapaǀî, sadu ǃhūb ǃgâi ǃhūse nî ī xui-ao,”
tib ge ǃKhūb Hoaǀgaixaba ra mî.Elob ge ǂgomǂgomsana ra mādawa-am
13 “Sadu ge ǁgaisi xūna tita xa ge ǃhoa,” tib ge ǃKhūba ra mî. “Xawe du ge ‘Tare-e da ge sats xa ǃhoa?’ ti ra dî. 14 Sadu ge ge mî: ‘Eloba ǃoabas ge a ǁau. Tare-e-i harebeba da hâ, nēsi da ga ǁîb di ǂgaoǀkhāde dīǀoaǀoas tamas ka io ǃoasaran ǃnâ ǃKhūb Hoaǀgaixab di ais aiǃâ ǃgûs tsîna? 15 ǀGapiǂâixa khoen a ǃgâiǃgâxasa da ge ra mû. Tsūdī-aon ge ra ǃgâiǃgâ; ǁîn ge Eloban ra ǃâitsâ, xawe ra ûiǂoa.’ ”
16 On ge ǁnān ǃKhūba ra ǃaoǃgâna ǁîǃnābe ge ǃhoa-ūgu tsîb ge ǃKhūba ǁnāsa ǃgâ tsî ge ǁnâu. O i ge ǁîb di ais aiǃâ ǂkhanis ǃnâ ge xoamâihe, ǁnān ǃKhūba ra ǃaoǃgâ tsî ǁîb ǀonsa ra ǃgôana. 17 “ǁÎn ge nî ti” tib ge ǃKhūb Hoaǀgaixaba ra mî. “ǁÎn ge tita ga hā tsēs ai nî ti ǃgomǀgausa ūhâxū kai. Tita ge ǁîna nî ǀkhomxaǃnâ, ǁgûb ra ǁîb ôab ǁîba ra ǃoababa ǀkhomxaǃnâ khami. 18 O du ge ǁkhawa ǃkharagagusiba nî mû, ǂhanu-ain tsî eloxoresan tsîn ǁaegu, Eloba ra ǃoaban tsî ǁîba ǃoaba taman tsîn ǁaegu.”
© Khoekhoegowab Elobmîs © Bible Society in Namibia, 2020.
