ǁNâuǀnamxasib ǀkhaegu
(Levitikus 26:3-13Deuteronomium 7:12-24)1 “ǃKhūb sadu Eloba du ga ǁnâuǀnam tsî ǁîb di mîmādi hoadi nētsē ta ra mā dude ǃkhōǀgaipe, ob ge ǁîba ǃhūbaib ai hâ ǃhaodi hoadi ǃgâ-ai nî kaikai du. 2 ǃKhūb sadu Eloba ǁnâuǀnam, o gu ge nē ǀkhaegu hoaga nî sadu di kai:
3 “ǃKhūb ge sadu ǃādi tsî ǃhanagu tsîna nî ǀkhae.
4 “ǃKhūb ge ǂgui ǀgôan, ǂâusa ǃhanaǂûn tsî ǂgui goman tsî ǀgoan ǀkha nî ǀkhae du.
5 “ǃKhūb ge sadu ǃhorob tsî ǁnāpa xu du ra aiǂhomi ǂûn tsîna nî ǀkhae.
6 “ǃKhūb ge dī du ra xū-i hoa-e nî ǀkhae.
7 “ǃKhūb ge sadu khākhoen ga ǁnāǂam du, o ǁîna nî dan. ǁÎn ge ǀgui ǀkhāba xu nî ǁnāǂam du, xawen ge ǁîna hoaǀkhāguǀî nî ǃkhoeni.
8 “ǃKhūb sadu Elob ge sadu sîsengu tsî ǃhorob xa ǀoa hâ sâuǃnâ-omgu tsîga nî ǀkhae. ǁÎb ge sadob nî mā ǃhūb ǃnâ nî ǀkhae du.
9 “ǃKhūb sadu Eloba du ga ǁnâuǀnam tsî ǁîb ra mîmā du xūn hoana dī, ob ge ǁîb ge mîmâi khami sado ǁîb di ǁaese nî dī. 10 On ge hoaraga khoen ǃhūbaib ai hâna ǃKhūb ge ǁîb ǁae kai du nîse ǁhûi du ǃkhaisa nî mû tsîn ge ǁîna nî ǃao du. 11 ǃKhūb ge ǂgui ǀgôan, ǂgui goman tsî ǃnāǂamsa ǃhanaǂûn tsîna sadu aboxagab ge mîmâiba ǃhūb, ūbasen du nîse ib ǃnâ nî mā du. 12 ǃKhūb ge ǀapiǁaeb ai ǁîb sâuǃnâǃkhaib ǀhommi ǃnâ hâba xu ǀnanuba sîǁnâ tsî sadu sîsenni hoaba nî ǀkhae. Nau ǁaedi tsîna du ge ǀkhupi ǁkhā, xawe du ge sado ǁîna xu ǀkhupi tide. 13 ǃKhūb sadu Elob ge nau ǁaedi di ǂgaeǂgui-aose nî dī du tsî ǁîdi di sao-aoses ose; nētsē ta ra mā du mîmādi hoadi, ǁîb dide du ga ǂgomǂgomsase ǃkhōǀgaipe tsî ǀkhara eloga ǀgoreǀî tama i, o du ge hoaǁae ǀkhaehesa ûiba nî ūhâ. 14 ǁÎb di mîmāde du ge tātsēs tsîna ǁnâuǀnamoǃnâ tide tamas ka io ǀkhara eloga ǀgoreǀî tide.
ǁNâuǀnamoǃnâsib ra ǃaroma xūn
(Levitikus 26:14-46)15 “Xawe du ga ǃKhūb sadu Eloba ǁnâuǀnam tama i tsî ǁîb di mîmādi tsî ǂnûiǂgādi hîa ta ra nētsē mā dude, on ge nē ra sao ǂkhaba xūna sadu ǀkha nî ī:
16 “ǃKhūb ge sadu ǃādi tsî ǃhanagu tsîna nî ǀâxare.
17 “ǃKhūb ge sadu ǃhanaǂûn tsî ǁnāpa xu du ra aiǂhomi ǂûn tsîna nî ǀâxare.
18 “ǃKhūb ge ǀoro ǀgôan, ǁgai ǃhanaǂûn tsî ǀoro goman tsî ǀgoan ǀguina du nî ūhâse nî ǀâxare du.
19 “ǃKhūb ge dī du ra xū-i hoa-e nî ǀâxare.
20 “ǂKhababa du ga dī, ob ge ǃKhūba ǀâxareb, danaǀgarusib tsî ǂâiǂhansens tsîna dī du ra xū-i hoa-i ǃnâ nî dī, sadu nî ǃhaese tsî hoaragase hîkākāhese. 21 ǃKhūb ge ǁōǁōsa tsûtsû-aide sadu ai nî sîǁnâ, hoaragaseb sado māhe tsî du nî ūbasense ī ǃhūba xu nî hîkākās kōse. 22 ǃKhūb ge sado ǂhīǁōs, xâiǁōs tsî ǁkhais ǀkha nî ǂnau; ǁîb ge ǀkhurub tsî ǀgamsa ǂoab tsîna sadu ǂûǃhanagu nî hîkākāhese nî sî. ǁŌ du nîs kōse gu ge nēti ī mâsiga sadu ǀkha nî hâ. 23 ǃKhūb ge ǀhommi-aiba brons-i khami ǀgamsase nî ūhâ, î-i tā ǀnanu-i xare-e ǀapi tsî ǃhūbaibab ge ǀuri-i khami nî karosa. 24 ǃKhūb ge ǀnanubab nî ǀapi kais xa ǁkhōǁkhōsa tsarab tsî ǃhūb tsîna sadu nî hîkākāhes kōse nî ǀapi kai.
25 “ǃKhūb ge sadu khākhoen ǃomgu ǃnâ nî māǁnâ du. ǁÎna du ge ǀgui ǀkhāba xu nî ǁnāǂam, xawe du ge hoa ǀkhāguǀî nî ǃkhoeni. Nau ǁaedi hoadi ge nē ǃnaeǃkhaisa diga mû, tare-i sadu ǀkha ge īsa, o kaise ǃaob xa nî xāǂgāhe. 26 Hoaraga ǀhomanin tsî ǁaixa ǀgurun tsîn ge sadu ǁō hâ sorode nî ǂû, xawen ge khoe-i xare-i xa ǃkhâibēhe tide. 27 ǃKhūb ge Egipteǁînab ge ǂnau-ū hâ i khami ī ǀhapin ǀkha nî ǂnau du, tsî sadu sorodi ge ǀhapin xa nî ǀoahe. ǂUnub tsî ǀkhonǁōb tsîn ge nî xāǂgā du, xawe du ge ǁîna nî ǂuru kai sōǀôa-e hō tide. 28 ǃKhūb ge ǃkhausib, ǂgīsib tsî danaǀgarusib tsîgu ǀkha nî ǂnau du. 29 ǂGī khoe-i ra tsēa ǁî-i ǂgīsib di ǃkhaenab ǃnâ tsananama khami du ge nî tsananama. ǃGâiǃgâ-e du hōǃâ tide. ǀÛ tamase du ge ǁgâiǀāhe tsî nî ǀhanahe, xawe-i ge khoe-i xare-i sado nî huihe hâ tide.
30 “Oaxaesats ge nî ǂnûiǃom, xaweb ge ǀnî khoeba ǁîs ǀkha nî ǃgame. Omsats nî om, xawets ǁîs ǃnâ ǁan tide. Draibeǃhanabats nî ǂgā, xawets ge ǁîb draibena tsâ tide. 31 Sa gomab ge sa mûǁae nî ǃgaoxadomhe, xawets ge ǁîb ǁgan-e tsâ tide. Sa dâukib ge sa mûǁae nî ǃnarihe, xawets ge ǁîba mā-oahe tide. Sa gūn ge sa khākhoena nî māhe, xawets ge khoe-i xare-i xa huihe tide. 32 Sadu ôadi tsî ôagu tsîn ge sadu mûǁae ǀkhara khoena nî māhe; tsēs hoasa du sadu ôan di oahās ai nî kōmâ, xawe du ge xū-i xare-e dī ǁkhā tide. 33 Sadu khākhoen hoan ge sadu aosenni ǀkha du ge ǂgā ǃhanaǂûn hoana nî ūbasen, tsî du ge sado ǁgâiǀāhe tsî tsūse nî ûi-ūhe. 34 Nē xūna du ga mû, o du ge nî ǃkhau. 35 ǃKhūb ge ǂuru tide ǀhapin ǀkha sadu ǁgoadi tsî ǀnūgu tsîna sadu ǂaiǃnāde xu sadu danas kōse nî ǂnau.
36 “ǃKhūb ge sadu tsî sadu ge ǁhûibasen gao-aob tsîdu hoado, sadu aboxagu tsî hâdu hoadu a ǀū ǃhao ǁaes tawa nî sī-ū. ǁNāpa du ge ǀkhara elogu, hain tsî ǀuin tsîna nî ǃoaba. 37 ǃKhūb nî sī-ū dupa di ge ǁaede ǃhōs, âiǂuis tsî mîǁgaiǁgais ǃnâ ǀgui nî ūhâ du.
38 “ǂGui ǃkhomna du nî ǃhana, xawe du ge ǀorose ǀgui nî ǃgao, ǂhomn nî sadu ǃhanaǂûna hapu xui-ao. 39 Draibeǃhanaga du ǂgā tsî nî ǃûiǃgâ, xawe du ge ǁîn di ǂauxûi-e ā tamas ka io draibena ǃgao tide, ǂunigu ǁîna nî hapu xui-ao. 40 Sadu ǀkharib hoab ǃnâ du ge ǀkherahaide nî ūhâ, xawe du ge sadu sorode ǂkhaus ǃaroma ǀkhera-oli-e ūhâ tide, ǀkheraǂûdi nî ǁnāǁgôa xui-ao. 41 ǀGôagu tsî ǀgôade du ge nî ūhâ, xawen ge ǁîna sadu di tide, ǁîn nî ǃkhōsis ǃnâ ūhe xui-ao. 42 Xoxon di ǂhoms ge sadu ǃhūb di hain hoana nî xāǂgā.
43 “Sadu ǁaegu ǁan hâ ǃhaokhoen ge sadu ǂamai, on ra mâǂoa o nî mâǂoa, xawe du ge sado, o du ra ǃnakab ǁga ǁgôa o nî ǁgôa. 44 ǁÎn ge mari-e nî ǀkhupi du, xawe du ge sado ǁîna ǀkhupi ǁkhā tide. ǁÎn ge nî dana, xawe sadu ge ǂareb ase nî ī.
45 “Nē ǀâxaregu hoagu ge ǃKhūb sadu Eloba du ǁnâuǀnam tama i tsî ǁîb di mîmādi tsî ǂnûiǂgādi tsîna ǃkhōǀgaipe tama xui-ao, sadu nî hîkākāhes kōse sadu ǂama nî hā. 46 ǁÎgu ge sadu tsî sadu surib tsîn ǁaegu saose tsî buruxa ǁgauǁgaudi ase hoaǁae ǃkhâikhoms ase nî hâ. 47 Sadu ge ǃKhūb sadu Elob ge hoaraga xūn ǀkha ǀkhae du xawe, ǁîba koas tsî ǃgâiaǂgaob tsîn ǀkha ǃoaba tama ge i. 48 ǁNā-amaga du ge sadu khākhoen ǃKhūb ge sadu ǃoagu a sîna, ǃâs tsî ǁgâs, ǀōǀkhāsib tsî xū-e ūhâ tama is ǃnâ nî ǃoaba. ǀUri jokhoesab ge ǁîba sadu ǃaodi ai, sadu nî hîkākāhes kōse nî ǁgui. 49 ǃKhūb ge ǁnâuǃā tama du hâ gowaba ūhâ ǁaesa ǃnūseba xu, ǃhūbaib di ǀamsa xu, sados nî ǃhaese ǃariǃkhās khami ǁgôaxaǃgâse nî hā-ū. 50 ǁÎn ge ǀkhom-i ose ǂkhamn tsî kain tsîna orase nî ûi-ū. 51 ǁÎn ge sadu goman di ǃkhommi tsî sadu ǃhūb di ǂûn tsîn hoana sadu nî hîkākāhes kōse nî hîǀhuru. ǃHoro-i, ǂauxûi-i, ǀkhera-oli-i, tamas ka io goman tsî ǀgoan di ǂguiǂguisen-i xare-i ge hâ tide, sadu nî ǁnās xa ǃaromahe hâse ǁōtoas kōse. 52 ǁÎn ge ǃKhūb sadu Elob nî mā du ǃhūb di ǃādi hoadi ǀgapi tsî ǀgaisa ǂnubiǂgoagu hîa du ǂgomǃgâ-ai hâgu tsîn nî ǁnās kōse nî ǁnāǂam du.
53 “Sadu khākhoen ga ǁnāǂam tsî ǁgâiǀā du, o du ge sadu ôagu tsî ôadi ǃKhūb sadu Elob ge mā dun di ǁgan-e nî ǂû. 54-55 Kaise tsamtsiǃnâ tsî ǃgamǃgamsenxa khoeb sadu ǁaegu hâb tsîn ge ǁîb ǃgâsab, tamas ka io taras kaiseb a ǀnams tamas ka io ǁîb ôa-i hîa ûiǃgau hâ-i tsîna ǀkhom tide. ǁÎb di ǂhunuma ǀgôan di ǁgan-i hîab ra ǂû-eb ge ǁîna au tide, îb tā ǁîn ǁgan-i xa toaxūhe. Nēs ge sadu khākhoen ga sadu ǃādi ǃnâ ǁnāǂam tsî ǁgâiǀā du, o nî ī. 56-57 Kaise tsamtsiǃnâ xawe ǀgapiǂâixa khoes, ǁîs ǂais tsîna ǃhūb ai dā tides ge ǁîs aob, kaises a ǀnammi tamas ka io ôasab tamas ka io ôasas tsîna ǀkhom tide. ǁNātikōse ǃâ tsîs ge ǁîsa ǀase ǃnae hâ ǀgôaro-i âs tsî ǀnai ǃnae hâ ôasan âs di ǁgan-i tsîna ǀhôagaose nî ǂû. Nēs ge sadu khākhoen ga sadu ǃādi ǃnâ ǁnāǂam tsî ǁgâiǀā du, o nî ī.
58 “Nē ǂkhanis ǃnâ xoasa mîmādi hoade du ga ǂōrisase ǁnâuǀnam tama i tsî ǃKhūb sadu Elob di ǂkhaisa tsî ǃnâu ǀonsa ǃaoǃgâ tama i, 59 ob ge ǃKhūba tātsē ǂuru tsî bē tide ǂhīǁōgu tsî kai tsî gaxuǃnâ ǂōǂōsigu tsîgu ǀkha sadu tsî sadu surib tsîna nî ǁkhara. 60 ǁÎb ge Egipteb ǃnâ du gere mû tsûtsû-ain hîa ge kaise ǃaoǃaosa in hoana sadu ai nî sîǁnâ, tsîn ge ǁîna tātsē ǂuru tide. 61 ǃKhūb ge nē ǂhanub di ǂkhanis ǃnâ xoahe tama ǀaesenain tsî ǂōǂōsigu tsîna hîkākāhe du nîs kōse sadu ai nî sîǁnâ. 62 ǀHommi di ǀgamiron khami du ge ǂgui i, xaweb ge sadu ǃgôaba nî ǁgôaxa, ǃKhūb sadu Eloba du ge ǁnâuǀnam tama hâ i xui-ao. 63 ǃKhūb ge sadob gere ǃgâidī tsî ǂguiǂgui, o ǃgâiaǂgao khamib ge ǁîba tsūǃōba sadu ai hā kais tsî sado hîkākās ǃaroma nî ǃgâiaǂgao. ǃHūb hîa du ūbasen du nîse ra ǂgâxaǃnâba xu du ge nî ǃhomǂuihe.
64 “ǃKhūb ge nau ǃhaodi hoadi ǃnâ nî ǀgaruǀgaru du, nē ǀams ǃhūbaib disa xu naus kōse; ǁnāpa du ge sadu tamas ka io sadu aboxagu tsîn ge ǀū i elogu, hain tsî ǀuin tsîn ǀkha kurusaga nî ǀgoreǀî. 65 ǁNā ǃhaodi ǁaegu du ge ǂkhî-i tamas ka io du sadu ǂais tsîna nî dā-ai ǃkhai-e hō tide. ǁNāpab ge ǃKhūba sâoǃnâ ǂgaogu, ǃâubasenoǃnâ mûdi tsî kā ra ûib tsîna nî mā du. 66 Hoaǁae du ge ǂōǂōsib ǃnâ nî ûi. Tsēb tsî tsuxuba du ge ǃaob ǃnâ ûi tsî ûihâb âdo ǁōb ǀgūse ǀgui nî hâ. 67 ǁGoa-i ka, o du ge nî mî: ‘Ae ǃui-i ge ga!’ ǃUi-i ka, o du ge nî mî: ‘Ae, ǁgoa-i ge ka!’ Nēs ge ǃaob tsî ǁkhōǁkhōsasib hîa du nî mûba xusa. 68 ǃKhūb ge kai ǂōǂōsib ǃnâ sado doe-omdi ai Egipteb ǁga, ǁnā daob tātsēs tsîna du ǁkhawa mû tideba-u nî sī-ū. ǁNāpa du ge ǁî-aitsama khobodu ase, aore tsî tarese sadu khākhoen ai nî ǁamaxūsen, xawe i ge khoe-i xare-e ǁama du tide.”
© Khoekhoegowab Elobmîs © Bible Society in Namibia, 2020.
