Deuteronomium 11 - Khoekhoegowab New Translation 2020 (KKG20)

ǃKhūb di kaisib

1 “ǃKhūb sadu Eloba ǀnam, î hoaraga ǂnûiǂgādi tsî mîmādi âba ǁnâuǀnam. 2 Nētsē ǂâihō re mâtib ge ǃKhūba sadu ǂûdu ge nēsa mû tsî ge hōǃâ, xawe sadu ôan ose: ǁÎb di kaisib, ǁîb ǀgaisa dīgu, ǁîb buruxa dīn, 3 tsî ǁîb buruxa saodi Egipteb ǃnâb ge gao-aob Faraob tsî ǁîb hoaraga ǃhūb ǃoagu dīn hoan xa. 4 Mâtib ge ǃKhūba saoǃgonhe du gere, o Egipteb di toroǃkhamaogu, ǁîgu hāgu tsî torokunidi tsîn hoana ǀApahurib ǃnâ āǁō kai tsî hîkākā ǃkhaisa du ge ge mû. 5 Nēpa du nî hās aiǃâ du ge taren hoanab ǃKhūba ǃgaroǃhūb ǃnâ sado ge dība ǃkhaisa ge ǂan i. 6 ǂÂihō re tare-eb ge ǁîba Eliab, Rubenni suriba xu hâb di ôakha Datanni tsî Abiram hâkha ǀkha Israelǁîn hoan di mûǁae dī ǃkhaisa; mâtib ge ǃhūba ǁkhowa-amsen tsî ǁîkha, ǁîkha omarira, tentomdi, tsî ǁîkha ǃgān tsî ǀgoan tsîn hoan ǀkha haraǂgāsa. 7 Nē kai buruxa dīn hoanab ge ǃKhūba sadu mûǁae ge dī.

Mîmâisa ǃhūb ǀkhaegu

8 “Nētsē ta go mā du mîmādi hoade ǃkhōǀgaipe, î du ǀgai tsî ǃhūb hîa du nî ǁkhâuǁnâb ǃnâ ǂgâ tsî ǁîba ūbasen. 9 ǁNāti du ga dī, o du ge ǂûtanixa ǃhūb ǃKhūb ge sadu aboxagu tsî ǁîgu surib tsîga mîmâibab ǃnâ gaxuse nî ûi. 10 ǁNā ǃhūb hîa du nî ūbasenni ge Egipteb hîa du ge hāxub, sadu ǃkhomna du gere tsoroǃnâ tsî ǃgomse ǂnâb, ǂûǃhanab tawas khami ī tama hâ. 11 Xawe ǁnā ǃhūb hîa du nî sī ūbasenni ge ǃhomgu tsî ǃgoaǃnāga ūhâ tsî ǀhommi di ǀnanub xa ra ǀapi-aihe. 12 Nē ǃhūb ge ǃKhūb sadu Elob xa ra kōǃgâhe; kurib di tsoatsoasa xu kurib di ǀams kōses ge ǁîb di mûsa ǁîb ai nî ǃammâisa.

13 “ǁNā-amaga nētsē ta go mîmā du mîmāde ǁnâuǀnam; ǃKhūb sadu Eloba ǀnam, î ǁîba sadu ǂgaob tsî ǀoms hoas ǀkha ǀgoreǀî. 14 ǁNāti du ga dī, ob ge ǁîba ǂhanu ǁaeb ai ǁhaoǁaeb tsî ǁkhunab tsîkha di ǀnanuba sadu ǃhūb ǃnâ nî ǀapi kai, sadu ǃhorob, ǂauxûib tsî ǀkhera-oli-i tsîna du nî ǀhaoǀhaobasense. 15 Sadu goman ǃaromab ge ǃam ǀgâna nî ǁhao kai tsî du ge ǂâusa ǂûna nî ūhâ. 16 Tā ǂgaeǂhapu kaisen tsî ǀkhara eloga ǃoaba tsî ǀgoreǀî. 17 ǁNāti du ga dī, ob ge ǃKhūb di ǁaiba ǁkhôasa ǀaeb khami sadu ai ǁgôaxa tsî ǀhomma ǀapib tidese nî ǂganam; ǃhūb ge nî ǂûtanioǃnâ, tsî du ge ǃKhūb ge ǃgâi ǃhūba mā du, xawe ǃhaese nî ǁō.

18 “Nē mîmāde ǂâis ǃnâ ūhâ, î sadu ǂgaob tsî ǀoms tsîn ǃnâ ǃkhōǀgaipe. ǁÎde sadu ǁôakha ai ǃgae, î ǂâiǂâisaos ase sadu ǃūdi ai tani. 19 ǁÎde hoaǁae sadu ǀgôana ǁkhāǁkhā tsî ǁguiǃgâba, nēsits ga oms ai hâs, daob aits ga hâs, sâts kas tsî sîsenni ǃnâts ga hâs hoasa. 20 ǁÎde sa oms dao-amhaikha tsî ǂgâ-amdi ai xoamâi re. 21 ǁNāti du ga dī, on ge sadu ôana ǃKhūb ge sadu aboxaga mîmâiba ǃhūb ǃnâ gaxuse, ǀhommi tsî ǃhūbaib tsîkha hâs kōse nî ûi.

22 “Kaise du ge ǂōrisase ǃKhūb sadu Elob ra mîmā du mîmādi hoade nî ǃkhōǀgaipe. ǁÎba ǀnam, ǁîb daogu hoaga sao, î ǁîb tawa hâǃari. 23 O du ge sadu aiǃâ hâ ǁaedi hoade sauruǂui tsî sadu ǂûdu xa kai tsî ǀgaisa ǁaedi di ǃhūba nî ūbasen. 24 Mâ ǃhūb hîa du ra dā-aib hoab ge nî sadu di; sadu ǀkharib ge ǃkhawagasǀkhāb di ǃgaroǃhūba xu ǀapasǀkhāb Libanonǃhomgu dib kōse tsî aiǂoasǀkhāb Eufratǃāb diba xu huriǂoasǀkhāb Mediteraneahurib dib kōse nî khoraǂuisen. 25 Khoe-i xare-i ge sadu ǃoagu mâ ǁkhā tide. ǃKhūb sadu Elob ge mîmâib ge khami sadu nî ǃaohega, ǃhūba ǃaob tsî ǀkhūb xa nî ǀoa kai.

26 “Mû, tita ge nētsē ǀkhaeb tsî ǀâxareb tsîkha ra mâi-aiǃâ du; 27 ǀkhaeba, ǃKhūb sadu Elob di mîmādi, nētsē ta ra mîmā dude du ga ǃkhōǀgaipeo, 28 xawe ǀâxareba, nē mîmāde du ga ǁnâuǀnamoǃnâ tsî nētsē ta go mîmā du daoba xu dabasen tsî ǀkhara elogu, tātsēs tsîna du ge ǀgoreǀî tama hâ iga ǀgoreǀîo. 29 ǃKhūb ga ǃhūb hîa du nî ūbasenni ǃnâ ǂgaeǂguiǂgā du, o du ge Gerisimǃhomma xu ǀkhaeba gowaǂui tsî Ebalǃhomma xu ǀâxareba nî gowaǂui. 30 (Sadu a ǂanse kha ge nē ǃhomkha, huriǂoasǀkhāb Jordanǃāb dib Kanaanǁîn, Jordanǃgoaǃnāb ǃnâ ge ǁan hâ in di ǀkharib ǃnâ ǁgoe. ǁÎn ge huriǂoasǀkhāb ǁga, Mores di aikehaidi ǀgūse tsî Gilgalsa xu ǃnū tamase ge hâ i.) 31 Sadu ge Jordanǃāba ǃgâu tsî ǃKhūb sadu Elob ge mā du ǃhūb ǃnâ ǂgâ tsî ǁîba nî ūbasen, 32 tsî du ge hoaraga mîmādi tsî ǂnûiǂgādi hîa ta nētsē ra mā dude ǂōrisase nî ǃkhōǀgaipe.”