Numeri 29 - Khoekhoegowab New Translation 2020 (KKG20)

ǀAsa Kurib ǁÂudīb di ǁguibadi

1 ǂGuro tsēs hûǁî ǁkhâb dis ai du ge eloǃoabas ǃaroma nî ǀhao, tsî sîsen-i xare-e dī tide. ǁNā tsēs ai di ge xâiǁnâde nî xâihe. 2 Khauǁguibas, ǃgâi ǁamaba ūhâs, ǃKhūba ǃgâibasa ǁguiba: ǀGui ūo ǂkham ǁgōb, ūo baib tsî hû ǀgui kurixa ūo ǁkhaogu tsîga. 3 ǀGausa ǃhoroǁguibas, mel-i hîa oli-i ǀkha habasa-i; ǃnona kiloxramgu mel-e mâ ǁgōb hoab ǃaroma, ǀgam kiloxramkha baib ǀkha, 4 tsî ǀgui kiloxramma mâ ǁkhaob hoab ǀkha ǁguiba. 5 ǁKhāti ǀgui piriba ǁoreǁguibas ǃaroma khoen di ǂkhîbagus ǁāxasib ǃaroma ǁguiba. 6 Nē xūna ǁnaetisa khauǁguibas xōǀkhā ǂguro tsēs ǁkhâb dis ai ǃhoroǁguibas ǀkha ǁguiba, tsî tsēkorobe khauǁguibasa ǁîs di ǃhoro tsî ǂauxûiǁguibas tsîra ǀkha. Nē ǂûǁguibadi, ǃgâi ǁamaba ūhâdi ge ǃKhūba nî ǃgâiba.

ǂKhîbagus Tsēs di ǁguibadi

(Levitikus 23:26-32)

7 Disiǁî tsēs hûǁî ǁkhâb dis ai eloǃoabas ǃaroma ǀhao, xawe tā ǂû-e ǂû tamas ka io sîsen-i xare-e dī. 8 Khauǁguibas, ǃgâi ǁamaba ūhâs, ǃKhūba ǃgâibasa ǁguiba: ǀGui ūo ǂkham ǁgōb, ūo baib tsî hû ǀgui kurixa ūo ǁkhaogu tsîga. 9 ǀGausa ǃhoroǁguibas, mel-i hîa ǀkhera-oli-i ǀkha habasa-i; ǃnona kiloxramgu mel-e mâ ǁgōb hoab ǃaroma, ǀgam kiloxramkha baib ǀkha, 10 tsî ǀgui kiloxramma mâ ǁkhaob hoab ǀkha ǁguiba. 11 ǁKhāti ǀgui piriba ǁoreǁguibas ǃaroma ǁguiba, khoen di ǂkhîbagus ǁāxasib ǃaroma ra ǁguibahe pirib xōǀkhā; tsî tsēkorobe khauǁguibasa ǁîs di ǃhoro- tsî ǂauxûiǁguibas tsîra ǀkha.

Tentomdi ǁÂudīb di ǁguibadi

(Levitikus 23:33-44)

12 Eloǃoabas ǃaroma disikoroǀaǁî tsēs hûǁî ǁkhâb dis ai ǀhao. Nē ǁâudība hû tsēdi ǁaeba ǃKhūb di ǃgôasib ǃoa tsēdī, xawe tā sîsen-i xare-e dī. 13 ǁNā tsēs ai ǂûǁguibas, ǃgâi ǁamaba ūhâs, ǃKhūba ǃgâibasa ǁguiba: Disiǃnonaǀa ūo ǂkham ǁgōgu, ǀgam ūo baikha tsî disihakaǀa ǀgui kurixa ūo ǁkhaogu tsîga. 14 ǀGausa ǃhoroǁguibas, mel-i hîa ǀkhera-oli-i ǀkha habasa-i; ǃnona kiloxramgu mel-e mâ ǁgōb hoab ǃaroma, ǀgam kiloxramkha mâ baib hoab ǀkha, 15 tsî ǀgui kiloxramma mâ ǁkhaob hoab ǀkha, ǂhâbasa ǂauxûiǁguibadi ǀkha ǁguiba. 16 ǁKhāti ǀgui piriba ǁoreǁguibas ǃaroma ǁguiba. Nē xūn xōǀkhā tsēkorobe khauǁguibasa ǁîs di ǃhoro- tsî ǂauxûiǁguibas tsîra ǀkha ǁguiba.

17 ǀGamǁî tsēs ai disiǀgamǀa ū-o ǂkham ǁgōgu, ǀgam ūo baikha tsî disihakaǀa ǀgui kurixa ūo ǁkhaogu tsîga ǁguiba. 18-19 ǁÎga ǂguro tsēs ǃaroma xoaǁguisa ǁguibadi ǀkha ǁguiba.

20 ǃNonaǁî tsēs ai disiǀguiǀa ūo ǂkham ǁgōgu, ǀgam ūo baikha tsî disihakaǀa ǀgui kurixa ūo ǁkhaogu tsîga ǁguiba. 21-22 ǁÎga ǂguro tsēs ǃaroma xoaǁguisa ǁguibadi ǀkha ǁguiba.

23 Hakaǁî tsēs ai disi ūo ǂkham ǁgōgu, ǀgam ūo baikha tsî disihakaǀa ǀgui kurixa ūo ǁkhaogu tsîga ǁguiba. 24-25 ǁÎga ǂguro tsēs ǃaroma xoaǁguisa ǁguibadi ǀkha ǁguiba.

26 Koroǁî tsēs ai khoese ū-o ǂkham ǁgōgu, ǀgam ūo baikha tsî disihakaǀa ǀgui kurixa ūo ǁkhaogu tsîga ǁguiba. 27-28 ǁÎga ǂguro tsēs ǃaroma xoaǁguisa ǁguibadi ǀkha ǁguiba.

29 ǃNaniǁî tsēs ai ǁkhaisa ū-o ǂkham ǁgōgu, ǀgam ūo baikha tsî disihakaǀa ǀgui kurixa ū-o ǁkhaogu tsîga ǁguiba. 30-31 ǁÎga ǂguro tsēs ǃaroma xoaǁguisa ǁguibadi ǀkha ǁguiba.

32 Hûǁî tsēs ai hû ū-o ǂkham ǁgōgu, ǀgam ū-o baikha tsî disihakaǀa ǀgui kurixa ū-o ǁkhaogu tsîga ǁguiba. 33-34 ǁÎga ǂguro tsēs ǃaroma xoaǁguisa ǁguibadi ǀkha ǁguiba.

35 ǁKhaisaǁî tsēs ai eloǃoabas ǃaroma ǀhao, xawe tā sîsen-i xare-e dī. 36 Khauǁguibasa ǃKhūb di ǃgôasib ǃaroma, ǂûǁguibas ǃgâi ǁamaba ūhâs, ǃKhūba ǃgâibasa ǁguiba: ǀGui ūo ǂkham ǁgōb, ū-o baib tsî hû ǀgui kurixa ū-o ǁkhaogu tsîga. 37-38 ǁÎga ǂguro tsēs ǃaroma xoaǁguisa ǁguibadi ǀkha ǁguiba.

39 Nēgu ge ǁgaragu khauǁguibadi, ǃhoroǁguibadi, ǂauxûiǁguibadi tsî ǂkhîbagus ǁguibadi tsîdi ǃKhūb di ǃgôasib ǃaroma mîǁguisa ǁâudīgu ǃaroma nî ǁnâuǀnamhega. Nē ǁguibadi ge nūs dīǀoaǀoas tamas ka io ǃnorasa ǁguibadi xōǀkhā nî dīhe ǁguibade.

40 ǁNātib ge Moseba hoaraga xūn ǃKhūb ge mîmā bina ǁîna ge mîba.