Disi mîmādi
(Eksodus 20:1-17)1 Moseb ge hoaraga Israelǁîna ǂgaiǀhao tsî ǁîn ǃoa ge mî: “Israelǁîdo, nētsē ta sado ra mā ǂnûiǂgādi tsî mîmādi tsîna ǃgâ re. ǁÎde du ge ǁkhāǁkhāsen, ǁnâuǀnam tsî ǁnās ǃoa nî ûi. 2 ǃKhūb sada Elob ge Sinaiǃhommi ai ǃgaeǀhaosa, 3 sada aboxagu ǀguigu ǀkhas ose, xawe sada hoada hîa nētsēs tsîna ûi hâda ǀkha ge dī. 4 ǁNā ǃhommi aib ge ǃKhūba aisa xu ais ǁga ǁhabu ra ǀaeba xu sadu ǀkha gere ǃhoa. 5 ǁNā ǁaeb ai ta ge ǁaegumâ-aose ǃKhūb tsî sadu ǁaegu ge hâ i, ǃKhūb mîsa sado mîbas ǀkha; sadu gere ǀaesa ǃao tsî du ge ǃhommi ai ǂoa ǁoa i xui-ao.
“ǃKhūb ge ge mî: 6 ‘Tita ge ǃKhūta sa Elota, Egipteb di khobosisa xu ge ǂgaeǂguiǂui tsi ta.
7 “ ‘ǀKhara elogats ge ti aiǃâ ǀgoreǀî tide.
8 “ ‘ǃGaoǂuihe hâ ī-ets ge dībasen tide, ǀhommi ǀgapise i ga hâs, ǃhūbaib ai i ga hâs, ǃhūbaib ǃnaka hâ ǁgamgu ǃnâ i ga hâ xawes tsîna. 9 ǁÎn aiǃâts ge ǃhonǁgoa tsî ǁîna ǀgoreǀî tide; tita ǃKhūta sa Elota ge tauxa Elota, ǁgûn di ǁorena ǀgôan tawa, ǃnonaǁî tsî hakaǁî ôananôagub ǁkhan te hân dib kōse ra ôaǃnâ ta. 10 Xawe ta ge ǀkhomxaǂgaosiba tita ǀnam tsî ti mîmāde ra ǁnâuǀnamhâhâ ǀoadisin ǃoagu nî ǁgauǂui.
11 “ ‘ǃKhūb sa Elob ǀonsats ge ǁause ǂgaiǀhuru tide, ǃKhūb ǁkhara tamase hâ kai tide ǁnā-i ǁîb ǀonsa ra ǂgaiǀhuru-e xui-ao.
12 “ ‘Sâtsēsa khai î ǁîsa ǃanuse ūhâ, tita ǃKhūta sadu Elota ge mîmā du khami. 13 ǃNani tsēde sîsen tsî du ge sadu sîsenni hoaba nî dītoa, 14 xawe hûǁî tsēs ge ti ǃgôasib ǃaroma sâhe tsî nî khaihe. ǁNā tsēs ai i ge khoe-i xare-e sîsen tide: Sats, sa ôan, sa ǃgā-i, sa ǀgoan tamas ka io sa ǃhūb ǃnâ ǁan hâ ǃhaokhoe-i kas hoasa. Sa ǃgān ge sats ǁkhāts khami nî sâ. 15 Egipteb ǃnâ du ge khobo i ǃkhaisa ǂâihō re, tsî tita ǃKhūta sadu Elota ge ti kai ǀgaib tsî ǁkhāsiba xu sado ǃnoraǃnorasa. ǁNā-amaga ta ge Sâtsēsa du nî khai ǃkhaisa ra mîmā du.
16 “ ‘Sa îb tsî sa îs tsîra ǃgôa, tita ǃKhūta sa Elota ge mîmā du khami, î du ǃgâise tsî ǂomxase tita ge mā du ǃhūb ǃnâ ûi.
17 “ ‘ǃGamts ge tide.
18 “ ‘ǃGamekhôats ge tide.
19 “ ‘ǃNarits ge tide.
20 “ ‘Khoe-i xare-ets ge ǂkhabase ǂgā-am tide.
21 “ ‘Tā sa ǀgūkhoeb tarasa tura; tā sa ǀgūkhoeb oms, ǃhūb, ǃgān, goman, dâukin, tamas ka io ǁîb di xū-i hoa-e tura.’
22 “ǃKhūb ge nē mîmādi hoade, hoaraga ǀhûhâsib âdo ǃgāsase du ra ǁnâuse, ǃhommi tawa du ǀhao hâ hîa ge mā. ǁÎb ge ǃgari dommi ǀkha ǁhabu ra ǀaes tsî ǃkhae ǃâus tsîra xu gere ǃhoase nē mîmādi ǀguide, xū-i tsîna ǀaro tamase ge mā. ǁNās khaoǃgâb ge ǁîba mîmāde ǀgam ǀuiǂgapakha ǃnâ xoaǂgā tsî tita ge mā.
Israelǁîn ǃaob xa ra ǃkhōhe
(Eksodus 20:18-21)23 “ǃHommi gere ǂhubi tsî du ge ǃkhaenasa xu domma ǁnâu, o gu ge sadu ǂgaeǂgui-aogu tsî ǁaedi di ǂgaeǂgui-aogu tsî danakhoegu tsîga tita tawa hā 24 tsî ge mî: ‘ǃKhūb sida Elob ge ǁîb kaisib tsî ǂkhaisib tsîna ǀaesa xub ge ǃhoa ǃkhais ǀkha ge ǁgau da. Nētsē da ge Elob khoe-i ǀkha ra ǃhoa, xawe i ǁî-e ra ûi ǃkhaisa go mû. 25 Tare-i ǃaroma da nēsi ǁnâi ǁōba nî māsen? Sada ge a ǂan ǃKhūb sida Elob di domma da ga ǁkhawa a ǁnâu, o da nî ǁō ǃkhaisa. ǁNā kai ǀaeb xa da nî hîkākāhe xui-ao. 26 Tari-e ǀnai ǃKhūb di domma ǁhabu ra ǀaesa xu ǁnâu tsî ge ûiǃgau? 27 Mosetse, ǃKhūb sada Elob tawa ǀgūse sī, îts ǁîb ra mî xūn hoana ǃgâ. ǁNās khaoǃgâ oaǀkhī, îts ǁîb gere mî xūn hoana hā mîba da, o da ge ǃgâ tsî nî ǁnâuǀnam.’
28 “ǃKhūb ge nēsab ge ǁnâu, o tita ǃoa ge mî: ‘Nē khoen go mî xūna ta ge go ǁnâu, tsî ǁîn ge a ǂhanu. 29 An ǁîna hoaǁae ǁnātikō ǃgôasiba ūhâba te tsî ti mîmādi hoade ǁnâuǀnam, ǁîn tsî ǁîn surib tsîn ǃgâi ûiba ǀamos kōse nî ūhâse. 30 ǃGû, î ǁîna sī mîba, în ǁîn tentomdi tawa oasī. 31 Xawe Mosetse, satsa tita tawa hâ, î ta ti ǂhanugu tsî mîmādi tsîn hoana mā tsi. Khoena ǁîn xa ǁkhāǁkhā, în hoaǁae ǁîna ǁnâuǀnam ǁnā ǃhūb hîa ta nî ǁîna māb ǃnâ.’
32 “Kaise du ge ǂōrisase ǃKhūb sadu Elob ra mîmā du xūn hoana nî dī. Tā ǀgui ǃnās tsîna ǁîb di mîmāde ǁnâuǀnamoǃnâ. 33 Hoaraga mîmāde ǁnâuǀnam, î-i sadu ǀkha ǃgâise ǃgû, î du ǁkhāti ǁnā ǃhūb hîa du nî sī ǁanǃnâb ǃnâ ǂomxase ûi.”
© Khoekhoegowab Elobmîs © Bible Society in Namibia, 2020.
