Hebreǁîn 12 - Khoekhoegowab New Translation 2020 (KKG20)

Elob sada ǁGûb

1 Nētikō kai ǂnubis di ǃkhō-amaona da sada ǂnamipe ūhâ amaga, a da mâ ǃgom-i hoa-i tsî ǁoreb hîa sada ai ra ǂaeba dībē, tsî sada aiǃâ ǁgoe ǃkhoeǀnûgusa ǁaposa mâǃkharus ǀkha ǃkhoe. 2 Î da Jesub ǂgoms di tsoatsoa tsî dītoa-aob ai mûdi âda ǃammâi. ǃGâiaǂgaob ǁîbab ǃâu hâb ǃaromab ge ǃgâuhaib* di ǁōba tani tsî taosib tsîna ge ǁauǃgôa. Tsîb ge nēsi Elob trons di amǀkhāb tawa sī ǂnôa.

3 ǂÂihō re mâ ǀgaus aib ge Jesuba ǁkhōǁkhōsa khākhoesib ǁîb ǃoagun ge ǁore-aona ūhâ iba tanisa, î du tā sadu ǀomdi ǃnâ ǂkhabuǂâi tsî ǃan. 4 Sadu ǃkhams ǁoreb ǃoagu nēsis kōse hâs ge noxopa ǁōba ǃaroma tama hâ. 5 Tsî ǀgôadu aseb ge Eloba ǀgaiǀgai-ū du ǁnamasa du kha ge ǀuru? Nēti ra mîsa:

“ǃKhūb di ǁkharaba tā ǂkharise ǃgôa,

î tā ǂkhabuǂâi, ǁîb xats ga ǁkharaheo;

6 ǃKhūb ra ǀnammi a i hoa-e ǁnama

tsî ǃkhōǃoab ra-i hoa-e ǂgōǀau xuige.”

7 ǂGōǀausa ǁkhāǁkhākhâis ase taniǀnam, Elob sado ǀgôan ase ra sîsenū xui-ao. ǁGû-i xa ǂgōǀauhe tama ǀgôa-e hâ-e? 8 Hoa ǀgôan di ǂgōǀaus ǃnâ du ga ǃâ tama io, o du ge ama ǀgôan Elob din ase ǃgapaǀîhe tide. 9 ǃAruǀî da ge ǃhūbaisi ǁgûgu ǂgōǀau da gere gu, ǃgôasiba da gere māga ge ūhâ i. Mâtikō ǃnāsase da kha ǁnâi nî mâsenxa sada ǀhomsi ǁGûb ǃnaka māǁnâsensa, ûiba hōs ǃaroma? 10 Sada ǃhūbaisi ǁgûgu ge ǃnubu ǁaerob ǀguiba ǁîga i a ǃgâiba khami gere ǂgōǀau da, xaweb ge Eloba sada ǃgâib ǃoa tsî ǁîb di ǃanusib ǃnâ da nî amǃnâxase ra ǂgōǀau da. 11 ǂGōǀaus ge hoaǁae ǃgâiaǂgaoba ra hā-ū khami ī tama hâ tsî tsûsasib xas tsîna hâǃnâhe. Xawe nēn hoan khaoǃgâ i ge ǁnān hîa nēs ǃnâ-u ra ǃkharuna ǂkhîb di ǂûb ǂhanu-aisib diba ra hā-ūba.

Mîmādi tsî ǃkhâikhomdi

12 ǁNā-amaga ǂkhabusa ǃomga ūkhâi, î ǀkhū ra ǁgoade ǀgaiǀgai. 13 Î sadu ǂaide ǂhanu ǂgaroga dība, îdi ǃhora-i di uniǁaede tā ǃoe, xawe ǂgauǂgauhe.

14 Hoa khoen ǀkha du nî ǂkhîb ǃnâ ûi ǃkhais tsî ǃanusib, ǁîb ose i khoe-i xare-e ǃKhūba mû tideba ǁgūba. 15 Kōǃgâ, î-i tā khoe-i xare-e Elob di ǀkhomma ǂoaǃnâ. A i khoe-i xare-e tā au hai-i, ǃīǂoaxa-i kao ǁî-i di ǃgāb ǀkha ǃgomsiga ǃaroma tsî ǂguina ra ǀuriǀuri-i khami ī. 16 ǁKhāti kōǃgâ, î-i tā khoe-i xare-e xorexūsa tamas ka io eloxoresa, Esaub hîa ǁîb di ǂguroǃnaeǂhanuba ǃores di ǂû-i ai ge ǁamaxūb khami. 17 Egab gere ǀkhaeba ǀumi ǂgao, xui-aob ge ǁîba ǂharahe ǃkhaisa du ge a ǂan; ǁgamron ǀkhab ge ǃhobasensa ôa-am, xaweb ge ǃhausens di soa-e hō tama i xui-ao.

18 Sadu ge tsâǀkhāhe ǁkhā ǃhom-i ǀaes ǀkha ra ǂhubi-i, ǃkhaeb, ǃkhaenab tsî ǁgaoǂoab, 19 xâiǁnâs di ǀōb tsî mîdi di ǀōb tawa hā tama hâ. ǁNān hîa ge ǁnâun ge xū-i xare-i ǁîn ǃoa mîhe tidesa ge ǀkhoma. 20 ǁÎn ge mîmās hîa “Ûitsama xū-i ka xawe i nē ǃhomma ga tsâǀkhā-i hoa-e nî ǀuiǁhomǃanhe” ti hâsa tani ǁoa i xui-ao. 21 ǁNātikōses ge nē ǁgauǁgausa ge ǃaoǃaosa i tsîb ge Moseba “ǃAo tsî ta ra ǀkhū” ti ge ǂgaiǂui.

22 Xawe du ge sado Sionǃhommi tsî ûitsama Elob di ǃās, ǀhomsi Jerusalems, ǁîs di ǂnubis ǀhomǃgāgu dâxa ǀhûs, 23 tsî ǂguroǃnaesan hîa ǁîn di ǀonde ǀhommi ǃnâ xoamâihe hân, Elob hoan di ǀGoraǃgâ-aob tsî dītoahe hâ ǂhanu-ain di gagadi di ǀhaos tawa ge sī. 24 Tsî Jesub, ǀasa ǃgaeǀhaos di ǁaegumâ-aob tsî ǀgapi-ais di ǀaob hîa Abeli di ǀaob xa ǃnāsase ǃgâi xūna ra ǃhoab tawa.

25 ǂAnbasen re, î du tā sadu ǀkha ra ǃhoaba ǂhara. ǁNān Elob ge Moseb ǃnâ-u ǁîn ǃoa ǃhūbaib ai a ǃhoa, o ge ǃgâ ǂgao tama hâ in tsîn ge ge ǃkhoeni ǁoa i. Mâ ǃēsa da kha ǁnâi ūhâ, ǁnāb ǀhomma xu ra ǃhoaba da ga ǁâba māo? 26 ǁNā ǁaeb aib ge Elob di domma ǃhūbaiba ge ǁnobeǁnobe. Xawe nēsib ge ra mîmâi: “ǀGui ǃnāsa ta ge ǁkhawa ǃhūbaib ǀguiba ǁnobeǁnobe tide xawe ǁkhāti ǀhommi tsîna.” 27 Os ge ǁnā mîs “ǀGui ǃnāsa” ti ra mîsa, kuruhe ge xūn ǀnai ra ǁnobeǁnobesenn nî hoaragase ūbēhe tsîn nî ǁnobeǁoasana hâhâ ǃkhaisa ra ǁgauǂui.

28 ǁNā-amaga, ǁnobeǁoasa gaosiba da ge ǃkhōǃoa xuige a da ǀkhommi, ǁîb ǃnâ-u da Eloba ǃgôasib tsî ǃaoǃgâb ǀkha ūǃoasa ǀgaub ǃnâ ra ǀgoreǀîba gangans ǀkha ǃkhōǀgara, 29 sada di Elob hîkākā ra ǀaese ī xuige.