Israelǁîn ge ǃKhūba nî ǁnâuǀnam
1 Moseb ge ǃaruǀî Israelǁîn ǃoa ge mî: “Hoaraga mîmādi tsî ǂnûiǂgādi hîa ta ra ǁkhāǁkhā dude ǁnâuǀnam, o du ge ǃKhūb sadu aboxagu di Elob ge mā du ǃhūb ǃnâ sī nî ǁan. 2 Tā nē ta ra mîmā du ǂnûiǂgādi ai xū-e ǀaro tamas ka io ūbē. ǃKhūb sadu Elob di mîmādi hîa ta ge mā dude ǁnâuǀnam. 3 Sadu ǂûdu ge aitsama tare-eb ge ǃKhūba Baal-Peorǃhommi ai a dīsa ge mû. ǃKhūb sadu Elob ge Baal-Peora gere ǀgoreǀî-i hoa-e sadu ǁaeguba xu ge hîkākā; 4 xawe sadu hîa ǃKhūb sadu Elob ǃnâ ge ǂgomǂgomsa idu ge nētsēs tsîna hoatsama ûitsama.
5 “ǃKhūb ti Elob ge mîmā te khami ta ge hoaraga ǂnûiǂgāde ge ǁkhāǁkhā du. ǁÎde ǁnā ǃhūb hîa du nî ǁnāǂam tsî ūbasenni ǃnâ sī ǁnâuǀnam. 6 ǁÎde ǂgomǂgomsase ǃkhōǀgara, nēs nî nau ǃhaode mâtikōse du a gā-ai tsî ǁnâuǃāxa ǃkhaisa ǁgau xuige. Nē ǂnûiǂgādi xan ga ǁnâu, on ge ǁîna nî mî: ‘Tarekōses kha nē kai ǁaesa ǁnâuǃāxa tsî a gā-ai!’
7 “Mâ kai ǃhao-i di elo-e kha ǁnâi ǁîn tawa, ǃKhūb sada Elob sada tawa ǂgaiǀî bi da ka ǃnās hoasa hâ khami ǀgūse hâ? 8 Mâtikōse iga ǃhao-e kai tsî ǁkhā, xawe i ge ǃhao-e ǀkhai, nētsē ta go ǁkhāǁkhā du khami ī ǂhanu-ai ǂnûiǂgāde ūhâ-e. 9 ǂAnbasen î ǂōrisase ǃûisen, î du tā ûi du hâ hîa sadu mûdi ǀkha du gere mû xūna ǀuru, tamas ka io ǁnâuǀnamoǃnâ. Sadu ǀgôan tsî ǁnuriǀgôan tsîna 10 ǃKhūb sadu Elob aiǃâ du ge Sinaiǃhommi tawa mâ i tsēs, ǁîs aib ge tita ǃoa nēti a mîs xa mîba re: ‘Khoena ǂgaiǀhao. Tita ra mî xūnan nî ǁnâu ǃkhaisa ta ge ra ǂgao, în ûin hâs kōse tita ǁnâuǀnamhâhâ tsî ǁîn ǀgôan tsîna tita ǃgôa tsî ǁnâuǀnamsa ǁkhāǁkhā.’
11 “Sadu ǀgôana mâti du ge ǃgû tsî ǀhommi kōse gere ǁhabu ǀaeb tsî ǃkhae ǃâus tsîn xa ǃgū-aihe hâ ǃhommi di ǂai-am mâ i ǃkhaisa mîba. 12 Mâtib ǃKhūba ǁhabu ra ǀaeba xu gere ǃhoas, mâti du gere dommi âba ǁnâu tsî xawe khoe-i xare-e mû tama hâ isa ǁîna mîba. 13 ǁÎb ge mâti du ga dī o du ǁîb ge sadu ǀkha dī ǃgaeǀhaosa nî ǃkhōǀgara ǃkhaisa ge mîba du; Disi Mîmādi, ǀgam ǀuiǂgapakha aib ge xoade du ge nî ǁnâuǀnam. 14 ǃKhūb ti Elob ge mîmā te khami ta ge hoaraga ǂnûiǂgāde ge ǁkhāǁkhā du. ǁÎde ǁnā ǃhūb hîa du nî ǁnāǂam tsî ūbasenni ǃnâ sī ǁnâuǀnam.
ǁGôa-elogu ǃoagu hâ ǃkhâikhoms
15 “ǂAnbasen î ǂōrisase ǃûisen! ǃKhūb ge sadu ǀkha Sinaiǃhommi ai ǁhabu ra ǀaeba xu gere ǃhoa, o du ge mû bi tama ge hâ i. 16 Tā ǁgôa-elo-e mâǃnôa ī-i ǀgui-i ǃnâs ka xawe kuru tsî ǁî-aitsama ǀhapiǀhapisen, nēsi i ga tarare tamas ka io aore, 17 ǃhūbaib di ǀguruǃnôa-i tamas ka io ǀhommi di aniǃnôa-i kas, 18 tsî ǃhūb ai ra ǂhana ǀgurun tsî xoxon tamas ka io ǁgammi di ǁauǃnôan ka xawes tsîna. 19 Tā dītsâ tsî ǀhommiǀî du ga kōkhâi tsî mû xūn: Sores, ǁkhâb, ǀgamirodi tsî ǀnî ǀhommi ǂnubis ka xawe ǀgoreǀî. ǃKhūb sadu Elob ge ǁîna nau hoaraga khoen ǃhūbaib din xan nî ǀgoreǀîhese ge mā. 20 Xawe sadob ge ǃKhūba Egipteb, ǂhubi ra ǀuri-ǁganoms khami ge ī iba xu ge ore. ǁÎb ge nētsē i ī khami, ǁîb di ūhâxū kai du nîga Egipteba xu ge ǂgaeǂguiǂui du. 21 Sadu ǃaromas ge ǃKhūb ge tita ǀkha ǁaixa tsî nūs ǀkha Jordanǃāba ta ǃgâu tide tsî ǂûtanixa ǃhūb, ǃKhūb sadu Elob nî sado ǀumis ase māb ǃnâ ta ǂgâ tide ǃkhaisa a mîǀguisa. 22 Tita ge nē ǃhūb ǃnâ nî ǁō tsî tātsēs tsîna Jordanǃāba ǃgâu tide, xawe sadu ge ǃāba ǃgâu tsî ǂûtanixa ǃhūba nî ūbasense i. 23 ǂAnbasen î ǂōrisase ǃûisen, î du tā ǃKhūb sadu Elob ge sadu ǀkha dī ǃgaeǀhaosa ǀuru. ǁÎb mîmāsa ǁnâuǀnam, î du tā ǁgôa-elo-i xare-e kurubasen, 24 ǃKhūb sadu Elob ǂhubiǂui ra ǀaeb khami ī tsî ǁîb ǃoagu khâikhâisen-i xare-e mā-am tide xuige.
25 “Gaxu ǁaeba du ga ǃhūb ǃnâ ǁan tsî ǀgôan tsî ǁnuriǀgôan tsîna ūhâ, o tā ǁî-aitsama ǁgôa-elo-i xare-e, mâ ī-i ǀgui-i ka xawe kurubasen; o du ge ǃKhūb sadu Elob mûǁae ǁore tsî ǁîba nî ǁaiǁai. 26 Nētsē ta ge ǀhommi tsî ǃhūbaib tsîkha ǀhûǀguitimî-aokha ase sadu ǃoagu ra ǂgai, tita du ga ǁnâuǀnam tama io, o du ge kaise ǃhaese ǃhūbaiba xu nî kā. Jordanǃāba ǃgâutoa, tsî du ge gaxuses tsîna ūbasen du ge ǃhūb ǃnâ ǁan tamase, kaise ǃhaese ǀgui-i tsîn ǃgau tamase nî hîkākāhe. 27 ǃKhūb ge nau ǃhaodi ǃnâ nî ǀgaruǀgaru du, tsîn ge kaise ǀoro khoen ǀguina nî ǃgau. 28 ǁNāpa du ge ǁgôa-elogu, khoen xa kuruhe hâgu: Hain tsî ǀuina xu kurusa elogu, mû, ǁnâu, ǂû tsî ǃkhapa ǁoaga nî ǀgoreǀî. 29 Xawe ǁnāpa hâse du ga ǃKhūb sadu Eloba ǂgaiǀî tsî ǁîba ǂgaob tsî ǀoms tsîn hoan ǀkha a ôa, ob ge ǁîba nî ǁnâu-am du. 30 ǁNāpa du ga ǃgomsib ǃnâ ǂgâ tsî nē xūn hoana hāǂam du, o du ge ǀams ai ǃKhūb sadu Elob ǁga oahā tsî ǁîba nî ǁnâuǀnam. 31 ǁÎb ge ǀkhomxaǃnâ Eloba. ǁÎb ge sado ǁnāǃgâ, tamas ka io hîkākā tide tsîb ge ǁîb ǂûb ge sadu aboxagu ǀkha nū ǃgaeǀhaosa ǀuru tide.
Israelǁîn ǀō-aisa aiǂhanub
32 “Moseb ge ǃaruǀî Israelǁîn ǃoa ge mî: ‘ǃKharu ge ǁaeb xa ǂâiǂâisen, ǁnā ǁaeb, sadu ǃnaes aiǃâ ge hâ ib, Elob ge khoeba ǃhūbaib ai kuru tsēs ǁga ǂâi-oa. Hoaraga ǃhūbaiba ôaǂkhū re. Nēti ī buruxa ǃnaeǃkhai-e ǀnai ī-i ge hâ i? Tamas ka io khoe-e xare ǀnai nēti ī xū-e ǁnâu-i ge hâ i? 33 Nau khoena mâtin ǁîn di elo-e ǁhabu ra ǀaeb di ǁaeguba xu ra ǃhoa ǃkhaisa xare ǁnâu tsî ûin ge, sadu ge ǁnâu tsî ûi khami? 34 ǀNî elo-e hâ-e khâimâ tsî ǀnî ǃhaode xu khoena sī ǁî-i dise ge ūbasen-e, ǃKhūb sadu Elob ge Egipteb ǃnâ sado dība khami? Sadu mûǁaeb ge ǁîba kai ǀgaib tsî ǁkhāsiba gere sîsenū; ǁîb ge tsûtsû-aidi tsî torob tsîna gere hā kai, saodi tsî buruxa dīna gere dī, tsî ǃhuriǃhurisa xūna gere ī kai. 35 ǃKhūb ge nē xūna sadu mûǁae gere ī kai, î du ǂanǁapo ǁîb ǀguib ǀguri a Elo, tsî i ǀkhara elo-e a ǀkhai ǃkhaisa. 36 ǀHomma xub ge ǁîba dommi âba ge ǁnâu kai du, sadob nî ǁgauǃnâse; tsî ǃhūbaib ge sado ǁîb di ǁhabu ra ǃanu kai ǀaeba ge mû kai, tsîb ge ǁnāpa xu sadu ǀkha ge ǃhoa. 37 Sadu aboxagab ge ǀnam i xui-aob ge sadu suriba ge ǁhûiǂui, tsî ǁîb di kai ǀgaiba xus ge sadob ge Egipteba xu a ǂgaeǂguiǂuisa. 38 ǁÎb ge sadu xa kai tsî ǀgaisa ǁaede sadu daoba xu gere sauruǂui, sado ǂgâ-ū tsîb nî ǁîn ǃhūba mā duse, nētsēs kōse sadu di ǃhūb ase ǂansaba. 39 ǁNā-amaga nētsēsa ǃkhōmâi, î tātsē tā ǀuru: ǃKhūb ge ǀhommi tsî ǃhūbaib tsîkha hoakha ǃnâ a Elo. ǀKhara elo-i ge a ǀkhai. 40 ǁÎb di ǂnûiǂgādi tsî mîmādi nētsē ta sadu ǃgâib ǃaroma ra mîmā dude ǃkhōǀgaipe, o i ge sadu tsî sadu surib tsîn ǀkha ǃgâise nî ǃgû. Sadu ge gaxuse ǃKhūb sadu Elob ǀamosib kōse sado ǀumis ase nî mā du ǃhūb ǃnâ nî ǁan.’ ”
ǁHaiǁhâǀîǃādi
41 ǁNās khaoǃgâb ge Moseba ǃnona ǃādi Jordanǃāb aiǂoasǀkhāb ai ǁgoede ge ǁhûi, 42 î-i khoe-i hîa ga ǁî-i khākhoe tama ǀgūkhoe-e ǀūǂamse ǃgam-e ǁnāǀî ǁhaiǁhâ ǃnorasasib ǃaroma tsî tā ǃgamhe. ǁÎ-i ge nē ǃnona ǃādi di ǀguis ǁga ǁhaiǁhâ ǁkhā. 43 Rubenni di surib ǃaroma, Besers ǃgaroǃhūb di ǀgapi ǁgoeǃkhaib ai ǁgoes; Gadi di surib ǃaroma, Ramots Gileadǀkharib ǃnâ ǁgoes; tsî Manaseb surib ǃaroma, Golans Basanǀkharib ǃnâ ǁgoesa.
ǃKhūb ǂhanub mâi-aiǃâhes
44 Moseb ge Elob di ǂhanuba Israelǁîna ge mā. 45-46 Nēs ge ǁîna Egipteba xun ge doeǂoas khaoǃgâ, aiǂoasǀkhāb Jordanǃāb di ǃgoaǃnāb Bet-Peors ǃoagu ǁgoeb ǃnâ nē ǀhûǀguitimîdi tsî ǂhanuga Moseb xa ge māhe. Nēs ge Amorǁîn di gao-aob Sihonni, Hesbons ǃnâ ge ǂgaeǂgui-ao ib di ǀkharib ǃnâ ge isa. Moseb tsî Israelǁîn tsîn ge Egipteba xun ge ǂoaxa, o Sihonna ge ǃkhamdan. 47 ǁÎn ge Sihonni di ǃhūb tsî gao-aob Ogi Basans dib, ǁîb tsîn ge Amorǁîn gao-ao ib di ǃhūb, Jordanǃāb di aiǂoasǀkhāb ai ǁgoeb tsîkha ge ūbasen. 48 Nē ǃhūb ge Aroers Arnonǃāb di ǃgoaǃnāb ǀgūse ǁgoe ǀkharib di ǀapasǀkhāba xu Sirionǃhommi, ǁnāb ge Hermonǃhomma, kōse ra sī. 49 Hoaraga ǀkharib aiǂoasǀkhāb Jordanǃāb dib ai ǁgoeb, ǃkhawagasǀkhāb ǂŌxahurib dib kōse tsî aiǂoasǀkhāb Pisgaǃhommi ǂai-ammi kōse ra sīb tsîna ǃkhōǂgā hâ.
© Khoekhoegowab Elobmîs © Bible Society in Namibia, 2020.
