Eksodus 21 - Khoekhoegowab New Translation 2020 (KKG20)

Hebreǁî khobon nî ûi-ūǃnâhe ǁgaragu

1 “Nē ra saogu ge ǁgaragu Israelǁîn nî ǁgui-aiǃâhega: 2 Hebreǁî khobobats ga ǁama, ob ge ǃnani kuriga satsa ǃoaba tsî hûǁî kurib ai marioǃnâse nî ǃnoraǃnorahe. 3 ǃGame tamab hâseb ga sa khobo kai, ob ge ǁkhāti ǃgame tamase satsa xu nî ǃgû. Xawe ǃgameb hâseb ga sa khobo kai, ob ge taras âb ǀkha nî ǃnoraǃnorahe. 4 Tsî ǁîb ǀhonkhoeb ga ǁîba tarasa mā tsîs ga ǁîsa ǁîba ǀgôagu tamas ka io ǀgôade a ǁorabao, on ge taras tsî ǀgôan tsîna a ǀhonkhoeb di, tsîb ge khoeba ǁîna ǁnāxū tsî ǀguri nî ǃnoraǃnorahe. 5 Xaweb ga khoboba ǁîb ǀhonkhoeb, taras tsî ǀgôanab ǀnam, tsîb ǃnoraǃnorahe ǂgao tama ti ǁapoǁapo, 6 ob ge ǀhonkhoeba ǁîba Elob ra ǀgoreǀîhe ǃkhais tawa sī-ū, tsî dao-ams tamas ka io dao-ams di haigu tawa mâ kai tsî ǁîb ǂgaesa ǀā ǀurib ǀkha nî ǃkhāǃkharu. Nēs ge nē khobob nî ǀhonkhoeb âba ûihâb hoaragaba ǃoaba ti ra ǂâibasen.

7 “Aob ga ǁîb ôasa khobos ase ǁamaxū, os ge ǁîsa khobob khami ǃnoraǃnorahes di aiǂhanuba ūhâ tama hâ. 8 ǁÎsa taras ase ra ǂgao khoeb ais ga ǁamaxūhe tsîb ga ǂgao si tama i, os ge ǁîsa ǁgûb ai nî ǁamaxū-oahe. ǁÎs di ǀhonkhoeb ge ǁîsa ǃhaokhoegu ai a ǁamaxū ǁoa, ǁîsab go ǂhanuoǃnâse ûi-ū xui-ao. 9 Aob ga khobosa ǁîb ôaba taras ase nî māse ǁama, ob ge ǁîsa ǁîb ǂhunuma ôas ase nî ǃgapaǀî. 10 Aob ga ǀgamǁî tarasa ū, ob ge ǂguro taras di ǂûn, saran tsî ǂhanugu tsîna ǀoroǀoro tide. 11 Nē ǁgui-aideb ga dīǀoaǀoa tama i, ob ge ǁîsa marioǃnâse nî ǃnoraǃnora.

ǂKhabadīgu ǃoagu hâ ǁgaragu

12 “Khoe-e ra ǃgam khoe-i tsîn ge nî ǃgamhe. 13 Xawe i ga khoe-e ǀūǂamse nau khoe-e ǃgam, o-i ge tita nî ǁî-e ǁhûiǂuiba ǃkhais ǁga nî ǃgû. ǁNāpa i ge ǁî-e ǃnorasase nî hâ. 14 Xawe i ga khoe-e ǂanapega nau khoe-e ǃgam, o-i ge ǁî-i tsîna nî ǃgamhe, ti altars tawa i ga ǁkhaubahes ǃaroma sī xawe.

15 “ǁÎ-i îb tamas ka io îsa ga ǂnau khoe-i ge nî ǃgamhe.

16 “Nau khoe-e ga ǁamaxū tamas ka io khobose ūhâs ǃaroma ǁgariǃgû-ū khoe-i hoa-i ge nî ǃgamhe.

17 “ǁÎ-i îb tamas ka io îsa ga ǀâxare khoe-i hoa-i ge nî ǃgamhe.

18 “Khoen ga ǂnoagu tsî i ga ǀgui-e nau-e ǀui-i tamas ka io ǃoms ǀkha ǂnau tsî-i ga ǁnā khoe-e ǁō tama i tsî ǀaeǁgoeo, 19 tsî ǃgâise i ga tsâo, khâi tsî ǁgâibasenhaib â-i ǀkha ǃauga ǂoaxa, o-i ge ǁnā khoe-e ge ǂnau hâ-i khoe-e ǁkharahe tide, xawe i ge ǁnā khoe-i ge ǂoaǃnâ ǁaeba matare tsî ǁnā khoe-i nî ǂurus kōse ǁî-e nî mâǃgâ.

20 “ǀHonkhoe-i ga ǁî-i khobo-e haib ǀkha ǂnau, tsî i ga ǁî-e ǁō, o-i ge ǁnāti ī ǀhonkhoe-e nî ǁkharahe. 21 Xawe i ga khobo-e tsēs tamas ka io ǀgam tsēra khaoǃgâ ǁō tamase a khâi, o-i ge ǀhonkhoe-e ǁkharahe tide, ǁnā khobo-i a ǁî-i di ūhâxū xui-ao.

22 “ǀNî khoegu ga ǃkham tsî ǀgamǀkhā tarasa ǁnāti ī ǃkhams ǃnâ tsûtsû, tsî i ga ǀgôaro-e ǁaeb aiǃâ ǃnae tsî ǁîsa ǃaruǀî ǀnî ǀgau-i ai tsûtsûhe tama i, ob ge ǁnāb hîa ge ǁîsa tsûtsûba marisi ǁkharaba taras di aob xa ǀgoraǃgâ-aogu di mā-ams ǀkha nî ǁgui-aihe. 23 Xawes nî taras ǂûsa tsûtsûhes kao, ob ge ǁkharaba ûib ǃaroma ûib, 24 mûs ǃaroma mûs, ǁgûb ǃaroma ǁgûb, ǃommi ǃaroma ǃommi, ǂais ǃaroma ǂais, 25 ǂhubihes ǃaroma ǂhubihes, ǀhapis ǃaroma ǀhapis tsî ǂnauǃhonab ǃaroma ǂnauǃhonab ti nî hâ.

26 “ǀHonkhoeb ga ǁîb di khobob tamas ka io khobos di mûsa ǂnauǂui, ob ge matares ase ǁî-e khobosisa xu nî ǃnoraǃnora. 27 Tsîb ga khobo-i di ǁgûba a ǂnauǁnâ, ob ge matares ase ǁî-e khobosisa xu nî ǃnoraǃnora.

ǀHonkhoegu di ǃereamxasib

28 “ǁGōb ga khoe-e ǁnâkha ǀkha ǃkhāǃano, ob ge ǁnā ǁgōba ǀuiǁhomǃanhe tsî ǁîb di ǁgan-e ǂûhe tide; xaweb ge ǁîb ǀhonkhoeba ǁkharahe tide. 29 Xaweb ga ǁgōba ǁnaetisase khoeǃkhāǃan-ao tsî ǀhonkhoeb âb tsîna ǀnai ǃkhâikhomhe tsî xawe ǁîba ǂganammâi tama io, ob ge ǁnāti ī ǁgōba ǀuiǁhomǃanhe tsî ǁkhāti ǁîb ǀhonkhoeb tsîna nî ǃgamhe. 30 ǀHonkhoeb ge ǁîb ûiba sâus ǃaroma, ǁgui-aiheb ka ǁkharamaris hoaragasa nî matare. 31 Khoeb di ôas tamas ka io ôabab ga ǁgōba ǃkhāǃan, o gu ge ǁkhā ǁgaragu ǀguiga ra saohe. 32 ǁGōb ga khobob tamas ka io khobosa ǃkhāǃan, ob ge ǁîb ǀhonkhoeba khobo-i di ǀhonkhoeba ǃnonadisi ǀhaiǀuride nî matare tsîb ge ǁgōba nî ǀuiǁhomǃanhe.

33 “Khoe-i ga tsausa ǁkhowa-amsase ǁnāxū, tamas ka io khao tsî ǃgū-ai tamase ǁnāxū, tsî-i ga ǁgō-i tamas ka io dâuki-e ǁnāpa a ǁnāǂgâ, 34 ob ge tsaus ǀhonkhoeba ǁnāǂgâ go ǁgōb tamas ka io dâukib di ǀhonkhoeba ǂoaǃnâs ai marisise nî mâǃgâ. ǁÎb ge ǁgōb tamas ka io dâukib ǀhonkhoeba matare tsî ǁgan-e a ūbasen ǁkhā. 35 ǀNî khoeb ǁgōb ga nau khoeb ǁgōba ǃkhāǃan, o kha ge ǁnā ûitsama ǁgōba ǁamaxū tsî marisa nî ǀgoragu; tsî ǃkhāǃanhe ga ǁgōb di ǁgan-i tsîna kha ge nî ǀgoragu. 36 Xaweb ga ǁgōba ǁnaetisase ǃkhamxa ǁgōse ǂansa, tsî ǀhonkhoeb âb tsîna ǁîba ǃgaemâi tama i, ob ge ǁîba ǃkhāǃanhe go ǁgōb di ǀhonkhoeba ûitsama ǁgōba nî mā, xaweb ge ǁō go ǁgōb di ǁgan-e a ūbasen ǁkhā.