Stefanub di gowaǀîs
1 Ob ge ǀgapipristera* Stefanuba ge dî: “Sats xa ra mîhen hoana kha ama?”
2 Ob ge Stefanuba nēti ge ǃeream: “ǁGûgo tsî ǃgâsago, ǃgâise go ǃgâ te re. Sada Elob, ǂkhaisib dib ge sada aboxab Abrahamma Mesopotamiab ǃnâ Harans ǁgab nî does aiǃâ ge ǂhai. 3 Tsîb ge ǁîb ǃoa ge mî ‘Sa ǃhūb tsî sa ǀaokhoena ǁnāxū, î ǁnā ǃhūb tita nî ǁgau tsiba ǃoa ǃgû.’ 4 Ob ge Abrahamma Xaldeaǃhūba xu doeǂoa tsî Harans ǃnâ sī ge ǁan, ǁîb îb di ǁōb kōse. ǁNāpa xub ge Eloba ǁîba nē du nēsi ǁanǃnâ hâ ǃhūb ǁga ge ūhā. 5 Xaweb ge ǃKhūba Abrahamma ǀumi-i xare-e mā tama ge i, ǂaiǂhabab di ǃhūǃâ-i kōses tsîna. Xaweb ge Eloba ge mîmâi hâ i, ǁîb tsî ǁîb di ǀumi-ao-i tsînab nî nē ǃhūǃâsa mā ǃkhaisa, ǀgôa-i tsînab Abrahamma ganupe ūhâ tama hâ hîa. 6 Tsîb ge Eloba ǁkhāti ge mîba bi ǁîb di surib nî hakakaidisi kurigu di ǁaeba khobosis ǃnâ, ǃhao ǃhūb ǃnâ hâ ǃkhaisa. 7 ‘Xawe tita ge ǁkhāti ǁnā ǁaes, ǁîn nî ǃoabasa nî ǀgoraǃgâ tsîn ge ǁîna ǀams ai ǂoaxa tsî tita ǁnā ǃhūb ǃnâ nî ǀgoreǀî.’ 8 ǁKhātib ge Eloba Abrahamma ǃgaos* di ǃgaeǀhaosa ge mā. Tsîb ge Abrahammi ôab Isaka ǁkhaisa tsēxab geo ge ǃgaohe. Isaki ge Jakoba ge ǃgao tsîb ge Jakoba ǁîb di disiǀgamǀa ǀgôagu ega ge Israeli di aboxa kaiga ge ǃgao.
9 “Tsî gu ge Jakob di ôaga kaise ǁîgu di ǃgâsab Josefa gere suri, ega gu ge Egipteb di khobose ǁamaxū bis kōse. Xaweb ge Eloba ǁîb ǀkha ge hâ i, 10 tsî nēb ge hâǃnâ i ǁgâiǀāga xu ge huiǂui bi. ǁKhātib ge Eloba Josefa gā-aisiba ge mā, Egipteb di gao-aob Faraob aiǃâ, tsîb ge Faraoba ǁîba hoaraga Egipteb tsî ǁîb di gao-ommi mûǂamaose ge mâi. 11 Egipteb tsî Kanaanǃhūb tsîkha ǃnâb ge kai ǃâtsūǀkhāba ge hā. Tsîb ge kai tsūǀkhāba sada aboxaga ge hāǂam, ǂâu hâ ǂû-i tsîna gu ge hō ǁoase. 12 Xawe Jakob ge Egipteb noxopa ǂâu hâ ǃhoroba ūhâ ǃkhaisa ǁnâu, ob ge ǁîb ôaga ǁama gu sī nîse ge sî. 13 ǀGamǁî ǃnāsa gu ge sī, ob ge Josefa ǃgâsagu âba ǁîb a tari ǃkhaisa mîba tsî ǁîga Faraob tawa ge mâi-aiǃâ. 14 Ob ge Josefa ǁîb îb, Jakob tsî khoexakhoen âba ge sî, ǁîn nî Egipteb ǃoa ǀkhī-ūhe ǃkhaisa; ǁîn ge ǁaubexa ge hûdisikoroǀa i. 15 Tsîb ge Jakoba Egipteb ǁga ǃgû tsî ǁnāpa sī ge ǁō tsî ǁnās ǁkhās xase ǁîb ôagu tsîna. 16 Hoagu ge Abrahammi ge Hamori di ôagu tawa ǁama hâ i ǀhobas ǃnâ, Sexems tawa ge ǁkhōhe.
17 “Tsî Elob ge Abrahamma mîmâiba hâ i mîmâis di ǁaeb ra ǀoa khamib ge sada khoen di ǃgôaba Egipteb ǃnâ kaise ge ǀarosen. 18 ǁNā ǁaeb ai i ge ǀnî gao-ao-e Egipteb ǃnâ ge mâihe, Josefi xa ge xū-i xare-e ǀū i-e. 19 ǁÎb ge sada di aboxana tsūse ge sîsenū tsî ǁîna gere ǁgari ǁîn di ôaronan nî omde xu aoǂuisa, ǁōn nîse. 20 ǁNā ǁaeb ǃnâb ge Moseba ge ǃnae tsîb ge kaise Elob mûǁae ge îsa i, tsîb ge ǃnona ǁkhâgu di ǁaeba ǁgûb oms ǃnâ ge kaikaihe. 21 Tsî aoxūheb ge os ge Faraob di ôasa ǁîba hō tsî ǁîs ôase ge kaikai. 22 Tsîb ge Moseba Egipteǁîn di hoaraga gā-aisiba ge ǁkhāǁkhāhe tsîb ge ge ǀgai, sîsengu tsî mîb geren hoan ǃnâ. 23 Tsîb ge Moseba hakadisi kurixab geo ǁîb di ǀaokhoen, ǃgâsa Israelǁîna sī sarisa ǁîb ǂgaob ǃnâ ge ǁkhore. 24 Tsîb ge ǁnāb ge sari hâ i ǁaeb ǃnâ Egipteǁîb hîa ra Israelǁîba ǃgâi tamase ûi-ūba ge mû. Ob ge Moseba nē khoeba huis ǀkha ǃkhoeǁnâ-am tsî Egipteǁîba ǀkhao tsî ge ǃgam. 25 Moseb ge ge ǂâi hâ i, Elob ge ǁîba ǁînab nî orese sî ǃkhaisan ge ǁîb ǂûb di khoena ǂan i ti, xawen ge ge ǁnâuǃā tama hâ i. 26 Tsî sao ra tsēb ge ǁkhawa ǁîna sari, ob ge ǀgam Israelǁîkha hîa ǁîǃnābe ra ǃkhamkha ge mû. ǁÎb ge ǁîkha ǁaegu ǂkhîbagusa gere dītsâ tsîb ge ‘Ti khoekho, sakho ge khoeǃgâgukho, tare-i ǃaroma kho ǁîǃnābe ra ǃkham?’ ti ǁîkha ge dî. 27 Ob ge ǁnā khoeb hîa ge ǃkhamsa tsoatsoaba Moseba ǂhābē tsî ge dî: ‘Tari-e satsa ǂgaeǂgui-aose tsî ǀgoraǃgâ-aose sida ǂama ge mâi? 28 ǁArits go Egipteǁîba ǃgam khamits tita tsîna ra ǃgam ǂgao?’ 29 Tsî nēsab ge ǁnâu, ob ge Moseba Midianǃhūb ǃoa ǃhū tsî ǁnāpa sī ge hâ. ǁNāpab ge ǀgam ǀgôakha ge ǁorabahe.
30 “Hakadisi kurigu khaoǃgâb ge Moseba Sinaiǃhommi ǀgūse khau ra ǁkhūhais di ǁhabub ǃnâ ǀhomǃgā-i xa ge ǂhaihe. 31 Nēsab ge mû, ob ge Moseba kaise nē-i nî tare i ǃkhaisa ge buru. Tsî ǂanǂui nîseb ge mâǀgū, ob ge ǃKhūb di dommi hîa ǁîba ǂgai tsî 32 ‘Tita ge sa îgu, Abrahammi, Isaki tsî Jakob tsîgu di Elota’ ti ra mîba ge ǁnâu. Kaiseb ge Ob ge Moseba ǃaob xa ǀkhū tsî kōs tsîna dītsâ tama ge i. 33 Ob ge ǃKhūba ǁîb ǃoa ge mî: ‘ǀKhapura âtsa ǂgaeǂui, ǁnāts mâ-ai ǃhūs a ǃanu ǃhū xuige. 34 Ti ǁaes ra Egipteb ǃnâ ǃgomma tsâ ǀgausa ta ge go mû. ǁÎn di āsa ǁnâu tsî ta ge go hā, ǁîna ta nî orese tsî ta ge satsa Egipteb ǃoa ra sî.’
35 “Tsîb ge Eloba ǁkhā Moseb khoen xa ge ‘Satsa tari-i xa sida ǂama ǂgaeǂgui-ao tsî ǀgoraǃgâ-aose ge mâihe?’ ti a dîheba ge sî. ǁÎb ge ǁnā ǀhomǃgāb khau ra hais ǃnâ-u ge ǁîba ǂhaib ǃnâ-u ǂgaeǂgui-aose tsî ore-aose ge sîhe. 36 Tsîb ge ǂgui buruxa sîsengu tsî saodi Egipteb ǃnâ tsî ǀApahurib tawa tsî ǃgaroǃhūb ǃnâb ge hakadisi kuriga dīn ǀkha ǁîna ge ǂgaeǂguiǂui. 37 Xaweb ge Moseb ǂûba ǁkhāti Israelǁîna ge mîba hâ i: ‘Elob ge sadu ǂûdo xu tita khami ī kēbo-aoba nî ǁhûiǂui.’ 38 Moseb ge ǁnāb ǁîn ǀkha ge ǃgaroǃhūb ǃnâ hâ iba. ǁÎb ge ǁnāpa sida aboxagu ǀkha ge hâ i tsî ǁkhāti ǁnā ǀhomǃgāb Sinaiǃhommi ai ge ǁîb ǀkha ǃhoa tsî sidab nî ǂanǂan ûitsama mîde mā bib ǀkha.
39 “Xawen ge sada aboxana Moseba ǁnâuǀnamsa ge mâǃoa tsîn ge ǂgaogu ân ǃnâ Egipteb ǁga ge oa. 40 Tsîn ge ǁîna Aronna ge mîba: ‘Sada nî ǂgaeǂgui eloga kuruba da re, Moseb hîa Egipteba xu ge ǂgaeǂguiǂui dab go tare-i xa hāǂamhe ǃkhaisa da ǀū xuige.’ 41 Tsîn ge tsâu-i di ība ūhâ ǁgôa-elo-e ǃhuniǀuriba xu ge kurubasen, ǁguibade mā tsîn ge nēn go ǃomgu ǀkha kuru ǁgôa-elob ân ǃnâ gere ǃgâiaǂgao. 42 Ob ge Eloba ǁîn ai ǁâb âba dawa tsî ǁîna sores, ǁkhâb tsî ǀhommi di ǀgamiroden nî ǀgoreǀîse ge ǁnāxū. Kēbo-aogu di ǂkhanis ǃnâ i a xoamâisa khami:
“ ‘Israeli dido! Ti tama ta ge
ûitsamaxūna ǂā tsî du ge
hakadisi kuriga ǃgaroǃhūb ǃnâ
ǁguibas ase gere hā-ūba ta.
43 ǁGôa-elob Moloxi di tentomsa du ge gere tanima,
tsî Refanni, sadu di ǀgamiro-elob di īgu
ǀgoreǀî nîse du ge dīga.
ǁNā-amaga ta ge sado ǃkhōsis ǃnâ ra sîbē,
Babilons nauǀkhāb kōse.’
44 “Sada di aboxan ge ǀhûǀguis di Tentommi Moseb ge Elob xa ǁgauhe ǀapeǁguib ai ge kuruheba ǃgaroǃhūb ǃnâ gere tanima. Tentommi hîa Moseb ge Elob xa ǁgauhe…gere tanima. 45 Ega gu ge sada di aboxaga nē tentomma ǁîgu di aboxaga xu ge hō. ǁÎgu ge Josuab ǀkha Elob ge ǁîgu ǃaroma ǀūbena ǃhaeǂuixū ǃhūb ǃnâ tentomma ge taniǂgā. Tsîb ge gao-aob Davidi ǁaeb kōse ǁnāpa gere sîsenūhe. 46 Tsî Elob ge Jakob ǃnâ ǃgâiǃgâibasensa ūhâ i xui-aob ge ǁîba ge ǂgan, ǃoabaǃnâ om-e ǁîba ombasa. 47 Xaweb ge ega Salomoba nē omma ǁîba ge omba.
48 “Xaweb ge Hoan xa ǀGapi Eloba khoen xa ǂnubihe hâ om-i ǃnâ ǁan tama hâ, kēbo-aoba ra mî khami:
49 “ ‘ǀHommi ge a ti tron,
tsî ǃhūbaib ge a ti ǂaira di dā-aiǃnao.
Mâti ī omma du kha sado tita nî ǂnubiba?
Tsî mâsa kha ti sâb di ǃkhai?
tib ge ǃKhūba ra mî.
50 Tita ge hoaraga xūn
ǀhommi ǃnâ tsî
ǃhūbaib ai hâna ge kuru.’
51 “Sa ǃnâudanaxado! Sadu ge ǂgaogu âdu ǃnâ ǀūbe tsî ǃAnu Gagaba ra mâǃoa sadu di aboxagu ge aiǃâ gere dī khami? 52 Kēbo-ao-e hâ-e sadu di aboxagu xa ge ǃgôaǃgonhe tama hâ i-e? ǁÎn kom ǁnātikōse ī tsî ǁnān hîa ǂHanu-aib, Xristub,* hîa sadu xa ǀapexūhe tsî ge ǃgamheb di hāsa ge aimûǀgarun tsîna ge ǃgamo. 53 Tsî du kom ǀhomǃgān ǃnâ-u Elob di ǂhanuba ǃkhōǃoa tsî xawe ǁîsa ǁnâuǀnam tama ge io.”
Stefanub ge ra ǀuiǁhomhe
54 Tsî Stefanuba gu ge ǁnâu, o gu ge kaise ǂkhîoǃnâ tsî ǁîb ǃoagu ǁaib ǃnâ ge ǁaninǁgû. 55 Xaweb ge Stefanuba ǃAnu Gagab xa ǀoa hâse, ǀhommi ǃoa ge kōkhâi tsî Elob di ǂkhaisiba ge mû tsî Jesuba amǀkhāb ǁôab Elob dib tawa mâse. 56 Tsîb ge ǁîgu ǃoa ge mî: “Mû, tita ge ǀhomma ǁkhowa-amsen hâse ra mû tsî Khoen Ôaba, amǀkhāb ǁôab Elob dib tawa mâse!”
57 On ge ǃgari dommi ǀkha ǂgai, ǂgaedi âna ǁgâiǂgan tsî ǀhû hâse ǁîba ge ǃkhoeǂnôa. 58 ǃĀsa xu ǃkharaǂui bi tsîn ge ge ǀuiǁhom bi. ǁÎb ǃoagu gere ǃkhō-amn ge anaǂamsaran âna ǂgaeǂui tsî Saulub ti ge ǀon hâ i ǂkham khoeb di ǂai-am ge ǁgui. 59 Xaweb ge Stefanuba ǀuiǁhomheb ra hîa ge ǀgore: “ǃKhū Jesutse, ti gagasa ǃkhōǃoa re!” 60 ǁGoara ai ǁnāǁgoe tsîb ge ǃgari dommi ǀkha “ǃKhūtse, tā ǁîna nē ǁoreba ǃgôaba re!” ti ǂgaiǂui tsî ǁnā mîdi ǀkha ge ǁō.
© Khoekhoegowab Elobmîs © Bible Society in Namibia, 2020.
