ǃKhūb ge ǁaede ra ǀgoraǃgâ
1 Nētib ge ǃKhūba ra mî: “ǀHommi ge a ti tron tsî ǃhūbaib ge a ti ǂaiǃnao. Mâti ī om-e du tita nî omba tsî mâsa ti sâǃkhaisa? 2 Nē xūn hoan ge ti ǃommi xa ge kuruhe tsî ǁnā-amagan ge nē xūn hoana a ti, tib ge ǃKhūba ra mî. Xawe nēn ge kōǀî ta nîna, ǁnān ǃgamǃgamsen hân tsî khôaǂkhūsa gagasa ūhân, tsî ti mîsa ra ǃaoǃgân tsîna. 3 Gomaba ra ǂā-i hoa-i ge khoe-e ra ǃgam-i khami ī; ǁkhao-e ra ǁguiba-i ge ari-i ǃaosa ra khôa-i khami-ī; ǃhoroǁguibasa ra ǁguiba-i hoa-i ge hāgū-i ǀaoba ra ǁguiba-i khami ī; ǂâiǂâisens ǁguibas ǃgâihamxūn disa ra ǁguiba-i hoa-i ge ǁgôa-elo-e ra ǀkhae-i khami ī. Nēn ge ǁîn daoga ǁhûiǂuibasen hâna tsîn ge ǁîn ui-uisasib ǃnân ra ǃgâiaǂgao. 4 Tita ge ǁîna ǁkharasa ge ǁhûibasen tsî ǁîn ra ǃao-e ǁîn ǂama nî hā kai; ǂgai ta ka, xawe-i khoe-i xare-e ǃeream tama xui-ao, ǃhoa ta ge, on ge ǁîna ǃgâ tama ge i. Xawe ǁîn ge ti mûǁae a ǂkhabana ge dī tsî tita ǃgâiba tamana ge ǁhûiǂuibasen.”
5 ǃKhūb di mîsa ǃgâ re, sadu mîs âba ra ǃaoǃgâdo: Sadu ǂhunuma khoen sado ǁkhan hân tsî ti ǀons ǃaroma sado ra ǂharan ge ge mî: “Ab ǃKhūba ǂkhaiǂkhaihe, sa ǃgâiaǂgaoba ta nî mûse,” xawen ge ǁîna nî taotaohe. 6 ǃĀsa xu hâ ǂkhupiba ǃgâ re! Tempela xu hâ domma! ǃKhūb di dommi, ǁîb khākhoena ra mādaba-amma!
7 “ǁÎs ge ǁoratsûb aiǃâ ge ǁora; ǁîs di ǁoratsûb aiǃâs ge ǁîsa ǀgôaroba ge ǁora. 8 Tari-e ǁnāti ī xū-e ge ǁnâu? Tari-e ǁnāti-ī xū-e ge mû? ǃHū-e ǀgui tsēs ǃnâ ǃnae ǁkhā-e? ǁAe-e ǀgui ǃnās ǃnâ ǁorahe ǁkhā-e? Xawes ge Sionsa ǃhaese ǁoratsûb ǃnâ ǁîs ôana ge ǁora. 9 ǁHāsa ǁkhowa-am tsî ta kha ǁora kai tide?”
tib ge ǃKhūba ra mî.10 ǃGâiaǂgao re Jerusalems ǀkha,
î ǁîs ǀkha dâǀhao re,
ǁîsa a ǀnamdu hoado.
ǁÎs ǀkha du ǃgâiaǂgaoxase dâ re,
sadu ǁîs ǂama gere ǃoado.
11 Dai tsî du nî ǁâse,
ǁîs di ǁkhaeǂgao ra samra xa.
ǂÂu hâse du dai tsî nî ǃgâiǃgâisense,
ǁîs di ǃnāǂamsa ǂkhaisib xa.
12 Nētib ge ǃKhūba ra mî: “Tita ge ǂkhîba ǃāb khami ǁîs ǃoa nî hā kai tsî ǁaedi di ǃkhūsiba dâuǂam ra ǃāb khami; o du ge nî dai tsî dai ra ǀgôaro-i khami ǃomkha âs ai tanihe tsî ǁgoara ai nî ǃgaerohe. 13 ǁGûs ǀgôaro-i âsa ra kōǃgâ khami ta ge tita sado nî kōǃgâ, tsî du ge Jerusalems ǃnâ nî kōǃgâhe.” 14 Nēsa du ga mû, ob ge sadu ǂgaoba nî dâ; sadu ǂkhōn ge ǀgân khami nî ǀomkhâi. O i ge nî ǂansa ǃKhūb di ǃommi ǁîb ǃgāgu ǀkha hâsa tsîb ǁîb di ǁaiba khākhoen âb ǂama hâsa.
15 ǃKhūb ge ǀaes ǃnâ nî hā tsî ǁîb di torokunidi ge ǁgaoǂgoas khami nî ī, ǁaib âbab ǀkhaob ǀkha nî ǂhaiǂhaise tsî ǁkharab âba ǀaeǁhabugu ǀkha. 16 ǀAes tsî gôab tsîra ǀkhab ge ǃKhūba hoaraga khoesiba nî ǁkhara, tsî ǁîb xa ǃgamhe hân ge kaise nî ǂgui.
17 ǁNān ǁî-aitsama khaisen tsî ra ǃanuǃanusenn ǃhanagu ǃnân nî ǂgâse, ǁnāb ǃhanab ǁaegub ǃnâ mâba ra ǁgaeǁgaese, tsî hāgūǁgan-i, ui-uisa xūn tsî durun tsîna ra ǂûn hoan ge nî hîkākāhe,
tib ge ǃKhūba ra mî.18 Tita ge ǁîn sîsengu tsî ǂâide a ǂan tsî ta ge hoaraga ǃhaodi tsî gowaga nî ǀhaoǀhao tsîn ge ti ǂkhaisiba hā nî mû, 19 tsî ta ge sao-e ǁîn ǃnâ nî dī. Tsî ta ge ûiǃgau gena nau ǃhaode ǃoa nî sî, Tarsis, Puti tsî Ludi tsîgu khāde ra ǁkhâugu ǃoa, Tubali tsî Javanni ǃoa, ǃnūse ǁgoe huri-am ǃhūgu noxopa ti gomma ǁnâu tama tsî ti ǂkhaisiba mû tamade ǃoa. ǁÎn ge ti ǂkhaisiba ǁnā ǃhaodi ǃnâ nî aoǁnâ. 20 Tsîn ge sadu ǃgâsan hoana hoaraga ǃhaode xu ǃKhūb di ǁguibas ase nî hā-ū, hān tsî kunidi, tani-aixūn tsî mulin tsî ǃnain tsîn ai, ti ǃanu ǃhomma ǃoa Jerusalems ǁga, Israelǁîn ǃhoroba ǃanu xapadi ǃnâ Tempela ǃoa ra hā-ū khami,
tib ge ǃKhūba ra mî.21 ǀNîgu ǁîn diga ta ge pristerse tsî Leviǁîse nî mâi,
tib ge ǃKhūba ra mî.22 ǀAsa ǀhommi tsî ǀasa ǃhūbaib tsîkha hîa ta nî kurukha ti aiǃâ nî mâǀgaras ǁkhās khamib ge sadu ôananôagub tsî ǀons tsîna nî hâhâ. 23 Tsîn ge hoatsama mâ ǀAsa ǁKhâb Kaitsēs hoas tsî mâ Sabattsēs hoas ai tita hā nî ǀgoreǀî,
tib ge ǃKhūba ra mî.24 Tsîn ge ǂoa tsî tita ǃoagu ge khâikhâisen khoen di ǁō hâ sorode nî mû; ǁîn di ǂunin ǁō tide tsî ǁîn di ǀaes ǀarihe tide xui-ao. Tsî ǁîn ge mâ khoe-i hoa-e ui-uisase nî iba.© Khoekhoegowab Elobmîs © Bible Society in Namibia, 2020.
