Pristergu di ǃâs
1 “Leviǁî pristergu ge ǃhūǃâ-i xare-e ǀumis ase Israeli ǃnâ ǃkhōǃoa tide; xawe gu ge mādi tsî ǁguibadi ǃKhūb ra ǁguibahede xu nî ûi. 2 ǁÎgu ge nau ǁaedi khami ǃhūǃâ-e ǀumi tide, tsî ǃKhūb pristergu a xui-ao, ǁîb ra ǁguibahe xūn ai aiǂhanuba ǃKhūb ge mîmâi khami ūhâ.
3 “Goma-i tamas ka io ǀgoa-i ga ǁguibahe, o gu ge pristerga ǁnāpa xu ǁkhûib, ǃnanikha tsî ǁkhoms tsîna nî māhe. 4 ǁKhāti gu ge ǁîga ǂguro ǃâs ǃhoro-i, ǂauxûi-i, ǀkhera-oli-i tsî gūǀûn tsîn disa nî ǃkhōǃoa. 5 ǃKhūb ge Leviǁîna nau ǁaedi hoade xu, ǁîban nî hoaǁae ǃoabase ge ǁhûiǂui.
6 “Leviǁî-i hîa ga Israeli ǃnâ hâ ǃādi hoade xu ǃKhūb ge ǀgoreǀî-aiheb nîse ǁhûiǂui ǀō-aisa ǃkhais ǁga hā-i hoa-i 7 ge prister-i ase ǃKhūb ǁî-i Eloba nau Leviǁîgu hîa ǁîba ǀnai ra ǃoabagu khami a ǀgoreǀî ǁkhā. 8 ǁNāti ī Leviǁîgu ge nau Leviǁîgu ra hō ǂûǃnôan ǀguina nî hō, nēsi gu ga mâtikō ǀumisa ūhâ xawes tsîna.
Tā ǃhao ǁnaetiga sao
9 “ǃKhūb sadu Elob nî mā duse i ǃhūb ǃnâ du ga ǂgâ, o tā ui-uisa ǁnaetigu ǁnāpa hâ ǃhaodi diga sao. 10 Tā sadu ôana ǀaes ǃnâ altardi ai ǁguiba; î tān khoena ǀkhūs, tamas ka io ǃgaidīb, tamas ka io ǃgoaxaǁaeba aimûǀgarus di ǀgaigu, 11 tamas ka io ǃgaixa ǀkhūs, tamas ka io gagadi ǀkha ǃhoas, tamas ka io ǁō hân di gagadi ai ǀape-ôa. 12 ǃKhūb sadu Elob ge nēti ī ui-uisa xūna ra dī khoena a ǃhuisa, ǁnā-amagab ge sadu ra ǀgū khami ǁîna ǃhūba xu ra sauruǂui. 13 ǃKhūb sadu Elob mûǁae hoaragase ǂgomǂgomsa.”
Kēbo-ao-e sîs mîmâis
14 Ob ge Moseba ge mî: “ǃKhūb sadu Elob nî mā du tsî du nî ūbasense i ǃhūb ǃnân ge ǁnā ǃhūb di khoena ǀkhū-aon tsî ǃgaidī-aon di ǀapemāsa ge sao, xaweb ge ǃKhūb sadu Eloba ǁnāsa dīsa mā-am du tama hâ. 15 ǁÎb ge tita khami ī kēbo-aoba sadu ǁaeguba xu sado nî sîba tsî du ge ǁîba nî ǁnâuǀnam.
16 “Sinaiǃhommi tawa du ge ǀhao hâ i, o du ge ǃKhūb sadu Elob domma du ǁkhawa ǁnâu ǂgao tama tsî ǁîb ǁhabu ra ǁaiba du ǁkhawa mû ǂgao tama ti gere ǀkhoma, ǁō du nîsa du gere ǃao xui-ao. 17 ǁNā-amagab ge ǃKhūba tita ǃoa ge mî: ‘ǂHanuse go ǀkhoma khoen ge. 18 Sats khami ī kēbo-ao-e ta ge ǁîn ǁaeguba xu nî sî; tita ge ǁî-e nî mîba tare-e-i nî mîsa, tsî ǁî-i ge khoena tita ge mîmān hoana nî mîba. 19 ǁÎ-i ge ti ǀons ǃnâ nî ǃhoa, tsî ǁî-e ǁnâuǀnam tama khoe-i hoa-i ge tita xa nî ǁkharahe. 20 Kēbo-ao-i ga tita xa i mî kaihe tama xū-e ti ǀons ǃnâ mî, o-i ge ǁî-e nî ǃgamhe. ǁKhāti i ga ǁî-e ǀkhara elogu ǀondi ǃnâ ǃhoa, o-i ge nî ǃgamhe.’
21 “Xawets ga sats ǂûts ǃnâ mîo: ‘Mâti ta kha nî ǂan nē mîdi ǃKhūba xu hâ tamasa?’ 22 Kēbo-ao-i ga ǃKhūb di ǀons ǃnâ ǃhoa tsî ǁî-i go mîn ga ama tama i, o i ge ǃKhūb di mî tama hâ. ǁNāti ī kēbo-aob ge ǁîba xu ge ǃhoa tsî a ǃaohe ǁoa.”
© Khoekhoegowab Elobmîs © Bible Society in Namibia, 2020.
