Tires gao-aob ǃoagu hâ kēbos
1 ǃKhūb di mîs ge tita ǃoa ge hā: 2 “Khoenôa ǀgôatse,” “Tires gao-aob ǃoa mî: Nētib ge ǃKhūb Eloba ra mî: Sa ǂgaob a ǂnīsa, tsîts ge mî xui-ao: ‘Tita ge a elo; tita ge elogu ǂnû-aiǃnaos ai ǂnôa, hurigu di ǁaegub ǃnâ.’ Xawets ge khoes ǀguisa ī tsî elo tama hâ, sa ǂâisats ga elo-i ǂâis ǀkha ǀgopeǀnō xawes tsîna. 3 Mû, sats ge Danieli xa a gā-ai; sats tawa i ge xū-e ǂganǃgâsa tama hâ. 4 Sa gā-aisib tsî ǁnâuǃāb ǀkhats ge ǃkhūsiba aitsama ge hōbasen, tsî ǃhuniǀurib tsî ǀhaiǀurib tsîkha sâuǃnâ-omgu ǃnâ ge ǀhaoǀhao. 5 Sa kai gā-aisib ǂharugub ǃnâts ūhâb ǀkhats ge sa ǃkhūsiba ge ǀaroǃnâ tsîb ge sa ǂgaoba ǃkhūsib âts ǃnâ ge ǂnīsa.
6 “ǁNā-amagab ge ǃKhūb Eloba nēti ra mî: Sa ǂâisats ra elo-i ǂâis ǀkha ǀgopeǀnō xui-ao, 7 ta ge ǃhaokhoena sats ǃoagu nî hā-ū, ǁîdi îbe a ǁkhōǁkhōsa ǁaede. Sa gā-aisib ge ǀkhī-ū îsasib ǃoagu di ge ǁîde gôaba nî ūkhâi tsî sa ǂkhaisiba nî ǀuriǀuri. 8 ǁÎdi ge āb ǃnâ nî ǂgaeǁnâ tsi tsîts ge ǂkhabadīb ǁōba hurib ǁaegub ǃnâ nî ǁō. 9 Noxopats nî mî: ‘Tita ge elota’, ti, satsa ra ǃgamn di mûǁae, xawets khoes ǀguisa ī tsî elo tama hîa, ǁnān satsa tsui hân di ǃomǁaets hâ hîa? 10 Sats ge ǃgaohe tama i di ǁōba, ǃhaokhoen di ǃomǁae nî ǁō; tita go ǃhoa xui-ao,”
tib ge ǃKhūb Eloba ra mî.Tires gao-aob di ǁnās
11 ǃAruǀîs ge ǃKhūb di mîsa tita ǃoa ge hā: 12 “Khoenôa ǀgôatse, Tires gao-aob ǃaroma ǃgaetsana-e ǁnae, î ǁîb ǃoa mî: Nētib ge ǃKhūb Eloba ra mî: ‘Sats ge hoa ǃgâi xūn di aiǁgau ge itsa, sats ge gā-aisib xa ǀoa tsî îsasib ǃnâ a dīǀoaǀoasa. 13 Sats ge Elob di ǃhanab, Edenni ǃnâ ge hâ i; mâ ǃgomǀgausa ǀuis hoas ge ge sa ǃgū-aixū i: Sardisǀuidi, topas, diamantǀuidi, turkoes, sardoniksǀuidi, jaspisǀuidi, safir, robain, smaraxǀuidi tsî ǃhuniǀurib ǂnûǃkhaidi tsî ǀuide xu ǃgaoǂuisa xūn tsîna. Sats ge kuruhe tsēs ain ge ǁîna ge ǂhomisa i. 14 ǀNausa xerub ǃûi-aose hâ, hîa ta ge ge mâi tsi; sats ge Elob di ǃanu ǃhommi ai ge hâ; sats ge ǀaexa ǀuidi ǁaegu gere ǃgû. 15 Sats ge sa ǃgûdaogu ǃnâ kuruhets ge tsēsa xu a ǀhapio, ǁoreb ge sats ǃnâ a hōhes kōse. 16 Sa ǂharugub di ǃnāǂamsasib ǃnâts ge ǂkhabadīb xa ge ǀoahe, tsîts ge ge ǁore. ǁNā-amaga ta ge ǃanuoǃnâ xū-i ase satsa Elob ǃhomma xu ge sauruǁnâ tsîb ge ǃûi-ao xeruba ǀaexa ǀuidi ǁaeguba xu ge sauruǂui tsi. 17 Sa îsasib ge sa ǂgaoba ge ǂnīsa kai. Sa ǂkhaisib ǃaromats ge sa gā-aisiba ge gâre kai. Tita ge ǃhūb ai ge aoxū tsi; tita ge gao-aogu mûǁae ge ǂhai kai, îgu satsa kō ǁkhāse. 18 ǂHanuoǃnâsib sa ǂharugub dib ge sa ǁorena ǂguiǂgui tsî ǁnās ǀkha sa ǃanusiga ge ǀuriǀuri. ǁNā-amaga ta ge ǀaesa sa ǁaeguba xu ge ūǂui; ǁîs ge ge ǂhubiǂui tsi tsî ǃhūbaib ai hoaraga khoen di mûǁae ge tsaotsao kai tsi. 19 Hoaraga khoen hîa ǁaedi ǃnâ satsa a ǂann ge ge burugâ; sa ǀams ge kaise ǃhuriǃhurisase ra hā tsî ǃaruǀî ǀamos kōse hâ tide.’ ”
Sidons ǃoagu hâ kēbos
20 ǃKhūb di mîs ge tita ǃoa ge hā: 21 “Khoenôa ǀgôatse, sa aisa Sidons ǃoa dawa, î ǁîs ǃoagu kēbo 22 tsî mî: ‘Nētib ge ǃKhūb Eloba ra mî: Sidonse, tita ge sas ǃoagu hâ tsî ta ge sas ǁaegu ti ǂkhaisiba nî hō. ǁÎs ǃnâ ta ga ti ǀgoraǃgâsa dī, on ge ǁîna tita a ǃKhū ǃkhaisa nî ǂan, tsî ta ge ti ǃanusiba ǁîs ǃnâ nî ǁapoǁapo. 23 Tita ge ǂhīǁōba ǁîs ǃnâ sîǂgā tsî ǀaoǂnâxūsa ǁîs ǃgangu ǃnâ, tsîn ge ǁō hâna ǁîs ǁaegu nî ǁnā, gôab ǀkha hoa ǀkhāga xu ǁnāǂamhe hâna. Tsîn ge ǁîna tita a ǃKhū ǃkhaisa nî ǂan.’ ”
Israeli ge nî ǀkhaehe
24 ǃKhūb ge ge mî: “Israeli ommi ge ǃaruǀî ǁkhawa ǁîna gere sorab ǀkha ûi-ū ǀgūkhoen, ǁîn ǁaegun ge hâ ina xu ǀā ǁkhūn tamas ka io tsûtsû ra ǀkhininina hō tide. ǁÎn ge tita a ǃKhū Elo ǃkhaisa nî ǂan.”
25 Nētib ge ǃKhūb Eloba ra mî: “Tita ga Israeli omma ǁîn ǀgaruǀgaruǃnâhe hâ ǁaede xu a ǀhaoǀhao, tsî ǁaedi mûǁae ti ǃanusiba ǁîn ǃnâ a ǁapoǁapo, on ge ǁîn di ǂhunuma ǃhūb tita ge ti ǃgāb Jakoba māb ǃnâ sī nî ǁan. 26 ǁÎn ge ǁîb ǃnâ ǃnorasase nî ǁan tsî omde om tsî draibeǃhanaga nî ǂgā. ǁÎn ge ǃnorasase nî ǁan, tita ga ǁîna gere sorab ǀkha ûi-ū ǀgūkhoen ǁîn dina ǀgoraǃgâ ǃnūbai. On ge ǁîna tita a ǃKhū, ǁîn di Elota ǃkhaisa.”
© Khoekhoegowab Elobmîs © Bible Society in Namibia, 2020.
