Tires ǃoagu hâ kēbos
1 Disiǀguiǀaǁî kurib ǃnâ, ǂguro tsēs ǁkhâb dis ais ge ǃKhūb di mîsa tita ǃoa ge hā: 2 “Khoenôa ǀgôatse, Tires ge Jerusalems xa ge mî: ‘Ā, khoen di dao-ams ge ge khôahe, ǁîs ge tita ai ge ǁkhowa-amsen. Tita ge nēsi nî ǃkhū, ǁîs go nēsi a hîkākāheo.’
3 “ǁNā-amagab ge ǃKhūb Eloba nēti ra mî: ‘Mû, Tirese, tita ge sas ǃoagu hâ! Tita ge ǂgui ǁaede sas ǃoagu nî khâikhâi, hurib ra ǁîb ǃgabiga khâikhâi khami. 4 ǁÎdi ge Tires ǂnubiǂgoaga hîkākā tsî ǁîs ǂgō-omga nî khôaǁnâ. Tita ge ǁîsa ti ǃhūba ūǀhana tsî ǀkhai-ai ǃgareǀuib ase ǀgui nî dī. 5 ǁÎs ge hurib ǁaegu nî hâ, ǀûidi ra khoraǂuihe ǃās ase. Tita ge go ǃhoa, tib ge ǃKhūb Eloba ra mî. ǁÎs ge ǁaedi xa nî ǃnariǂuiǃnâhe. 6 Tsî ǁîs ǃgâsa ǃādi ǃhūb ǃnâ hâdi ge gôab ǀkha nî ǃgamǂuiǃnâhe. On ge tita a ǃKhū ǃkhaisa nî ǂan.’ ”
7 Nētib ra ǃKhūb Eloba mî xui-ao: “Tires ǃoagu ta ge ǀapasǀkhāba xu gao-aob Nebukadnesari Babilons diba, ǁîb hān, kunidi, ǃgapi-aogu tsî kai tsî ǀgaisa toroǂnubis tsîn ǀkha nî ǀkhī-ū. 8 Sa ǃgâsa ǃādi ǃhūb ǃnâ hâde ta ge gôab ǀkha nî hîkākā. ǁÎb ge ǁnāǂams ǃaroma ǂgō-omga sas ǃoagu ǂnubi, ǁkhuiba ǃās di ǂnubiǂgoab xōǀkhā ǁhankhâi tsî ǁkhaubasens ǃaroma kai ǁkhaukhōga sas ǃoagu nî ūkhâi. 9 ǁÎb toroǃkhamaogu ge haiǃgaogu ǀkha sa ǂnubiǂgoaba khôa tsî ǃōdi ǀkha sa ǂgō-omga nî khôaǁnâ. 10 Hān di ǂguisiba xu ra khâi tsarab ge sasa nî ǃgū-ai. ǃGapi-aogu, ǀnūdi tsî kunidi di ǂkhupib ge sa ǂnubiǂgoaga nî ǂgubi kai, ǁîb ga ǀnai hîkākāhe hâ ǃās ǃnâs khami sas ǃnâ ǂgâxao. 11 ǁÎb hāgu di ǁkhoradi ǀkhab ge sa ǃgangu hoaga nî dāǂkhū. ǁÎb ge sa khoen hoana gôab ǃnâ nî ǃkharu kai tsî sa ǀgaisa ǂgurihaigu hoagu ge nî ǁnāǁgoe. 12 ǁÎgu ge sa ǃkhūsiba ǃnari tsî sa ǁamaǂharugu xūn hoana nî ǁkhâuǁnâ. ǁÎgu ge sa ǂnubiǂgoaga khôaǁnâ tsî sa îsa omdi hoade nî hîkākā. ǁÎgu ge sa ǀuin, ǃnaon tsî ǃhūb tsîna hurib ǃnâ nî aoǂgā. 13 Sa ǁnaeb di ǀōba ta ge nî ǃnō kai. Sa harpdi ǀōb ge ǃaruǀî ǁnâuhe tide. 14 ǃGareǀuib ǀguiba ta ge nî ǃgau, ǀûidi ǁnāpa nî ǃāhese. ǁKhawas ge sasa ǂnubihe tide, tita ǃKhūta go ǃhoa xui-ao,”
tib ge ǃKhūb Eloba ra mî.15 Nētib ge ǃKhūb Eloba Tires ǃoa ra mî: “ǃNāǃnuide kha ǀkhū tide sa ǁnās di ǀōb xa, ǁnān tsuihe hân ga ǃgae ǃnubai, ǃgamǂuis ga sa ǃnâ aiǃgûo? 16 O gu ge hoaraga gaogu hurib diga tronde xu nî ǁgôa. ǁÎgu ge ǁîgu gaosaraga ǁhû tsî îsase ǂomsa ǂamsaraga nî ǂgaeǂui. ǁÎgu ge ǁî-aitsama ǃhurib ǀkha anasen tsî ǃhūb ai nî ǂnû. ǁÎgu ge ǃhuri hâse ǀgui nî hâ tsî ǃhurigâb ǀkha ǀgui sasa nî kō. 17 Tsî ǁîgu ge ǃgaetsanasa sas xa ǁnae tsî nēti nî mî:
“Mâtis kha nēti huriga xu nî kā?
ǂAnsa ǃā ge ise,
hurib ai ǁkhāsib ǀkha ge ǁgoe ise,
sas tsî sa ǁanǂgāsaben hoan ǀkha.
Hurib ǀnomam ge ǁan hâ in di ǃhurise!
18 Nēsi sa ǁnās di tsēs ai
di ge ǃnāǃnuide ra ǀkhū.
Hurib ǃnâ ǂnôa ǃnāǃnuidi
ge sa ǁnās xa ra burugâ.”
19 Nētib ra ǃKhūb Eloba mî xui-ao: “Tita ga ǃū-aisa ǃās ase dī si, ǃādi ǁanǃnâhe tama hâdi khami, ǃgamsiba ta ga sa ǂamai hā-ūo, tsî kai ǁgamgu ga ǃgū-ai sio, 20 o ta ge sasa nî ǁgôa-ū, ǀnai ge ǁgôa khoen hâ āb ǃnâ, hukas di khoen ǁga tsî ta ge ǃnakab di ǃhūb ǃnâ nî ǁan kai du, ǀnai ge hîkākāhen ǁaegu, ǁnān ǀnai ge āb ǃnâ ǁgôan ǀkha. Sas ǁkhawa ǁanǃnâhe tide, tamas ka io ûitsaman di ǃhūb ǃnâ hâǃkhai-e ūhâ tidese. 21 ǃHuriǃhurisa ǀams tawa ta ge sasa nî ǀkhī-ū tsîs ge ǃaruǀî hâ tide. Ôahes ka, xawes ge ǁkhawa hōhe tide,”
tib ge ǃKhūb Eloba ra mî.© Khoekhoegowab Elobmîs © Bible Society in Namibia, 2020.
