ǂGuroǃnaesagu ge ǃKhūba ra khaibahe
1 ǃKhūb ge Moseb ǃoa ge mî: 2 “Hoaraga ǂguroǃnaesagu Israelǁîn digu tsî ǁîn di ǀgoan tsî goman digu hoaga ti ǃgôasib ǃaroma khai. ǁNā ǂguroǃnaesagu hoagu a ti xuige.”
Khūkhū-e ūhâ tama pere-i ǁâudīb
3 Moseb ge ǁaes ǃoa ge mî: “ǁNā tsēs, ǁîs ai du ge Egipteb, khobosis ǃnâ du ge ūhâhe hâ-iba xu ǃnoraǃnorahes xa ǂâiǂâisen re. Nēs ge tsēs ǃKhūb ge ǁîb di ǀgaisa ǃommi ǀkha ǂgaeǂguiǂui dusa. Tā khūkhū-e ūhâ xū-i xare-e ǂû. 4 Nē tsēs hîa du ra Egipteba xu ǂoas ge ǂguro ǁkhâb, Abib disa. 5 Nē tsēsa du ge mâ kurib hoaba ǃKhūb ga Kanaanǁîn, Hetǁîn, Amorǁîn, Hivǁîn tsî Jebusǁîn di ǃhūb, ǃkhū hâ tsî ǂûtanixab hîab ge ǁîba sadu aboxaga nūs ǀkha mîmâibab tawa ǁîb xa ǂgaeǂguisīhe, o nî tsēdī. 6 Hû tsēdi ǀgaiba du ge khūkhū-e ūhâ tama pere-e nî ǂû. Tsî hûǁî tsēs ai du ge ǃKhūba nî ǀgoreǀî. 7 Hû tsēdi ǀgaiba du ge khūkhū-i ǀkha dīhe hâ pere-e ǂû tide; sadu di ǀkharib ǃnâ i ge khūkhū-i tamas ka io khūkhū-i ǀkha amhe hâ pere-i xare-e hōhe tide. 8 Tsî sadu suriba ǁnā tsēs ai nēti mîba re: ‘ǃKhūb ge Egipteba xu ǂgaeǂguiǂui da xui-ao da ge nē tsēsa ǁîb ǃgôasib ǃoa ra tsēdī.’ 9 Nē ǁâudīb ge sadu ǃomgu tsî ǃūdi ai ǂâiǂâisao-i ase nî ī; î du ǃKhūb di ǂhanuba hoaǁae ǂan tsî ǁkhāǁkhāgu. ǃKhūb ge ǁîb di ǀgaisa ǃommi ǀkha Egipteba xu ǂgaeǂguiǂui du xui-ao. 10 Nē tsēsa mîmâisa ǁaeb kurib dib ai, kurikorobe tsēdī re.
ǂGuroǃnaesagu xa hâ ǁgaragu
11 “ǃKhūb ga sadu tsî sadu aboxagab ge nūs ǀkha mîmâiba khami Kanaanǁîn di ǃhūb kōse ǂgaeǂgui tsî ǁîba mā duo, 12 o du ge ǂguroǃnaesagu Israelǁîn digu tsî ǁîn di ǀgoan tsî goman digu hoaga ǃKhūb di ǃgôasib ǃoa nî khai. ǁNā ǂguroǃnaesagu hoagu a ǃKhūb di xui-ao. 13 Xawe du ge mâ ǂguroǃnaesab hoab dâuki-i diba ǁkhaob ǀkha nî ǁamaǃkhuni, tsîts ga ǁamaǃkhuni ǂgao tama i, ots ge ǁîb di ǃaosa nî khôa. Mâ ǂguroǃnaesab khoen dib hoab tsîn ge ǁkhāti nî ǁamaǃkhunihe. 14 Tsî ǃgoaxaǁaeb ǃnâb ga sadu suriba ‘Tare-i ǃaroma du nē ǁâudība ra tsēdī?’ ti a dî du, o du ge ‘ǃKhūb ge ǁîb ǀgaisa ǃommi ǀkha sida Egipteba xu ge ǂgaeǂguiǂui’ ” ti nî ǃeream. 15 Faraob ge ǂgaob âba karokaro tsî Israelǁîna ǃnoraǃnora ǂgao tama i, ob ge ǃKhūba mâ ǂguroǃnaesab Egipteǁîn dib tsî ǁîn di ǀgoan tsî goman tsîn digu hoaga ge ǃgam. ǁNā-amaga da ge mâ ǂguroǃnaesab ǀgoan tsîn goman tsîn dib hoaba ǃKhūba ra ǁguiba, xawe Israelǁîn di ǂguroǃnaesagu hoagu ge ǁkhaob tamas ka io pirirob ǀkha nî ǁamaǃkhunihe. 16 Nē ǁâudīb ge sadu ǃomgu tsî ǃūdi ai ǂâiǂâisao-i ase nî ī; ǃKhūb ge ǁîb di ǀgaisa ǃommi ǀkha Egipteba xu ǂgaeǂguiǂui da xui-ao.
Elob ge Israelǁîna Egipteba xu ra ǂgaeǂguiǂui
17 Faraob ge Israelǁîna ǃnoraǃnoras khaoǃgâb ge Eloba ǁîna Filisteǁîn ǃhūb ǃnâ-u ra ǃkharu ǃnubu daoba-u ǂgaeǂgui tama ge i, ǁîb ǂûb ǃnâb ge nēti ǂâi xui-ao: “ǁÎn di khākhoen xan ga ǁnāǂamhe, on ge ǁîna ǂâi-unuǃgâ tsî Egipteb ǁga a oa ǁkhā.” 18 ǁNā-amagab ge Eloba ǁîna ǀkhara daob ǃgaroǃhūb ǃnâ-u, ǀApahurib ǁga garub ai ge ǃgûǂnami-ū. Tsîn ge Israelǁîna Egipteba xu ǁâtanisase ge ǂoa.
19 Tsî Moseb ge Josefi ge Israelǁîn xa nūs ǀkha mîmâibahe hâ i khami Josefi di ǁō hâ ǂkhōga ǁîna ge ūsao kai. Nētib ge Josefa mî hâ i xui-ao: “Elob ge sado nî ore, tsîb ga ǃnoraǃnora duo, o ti ǂkhōgu tsîna ūsao re.”
20 Israelǁîn ge Sukotsa xu dāǁnâ tsî Etams, ǃgaroǃhūb ǀams tawa sī hâǃkhaiba ge ǂnaumâi. 21 Israelǁîn nî tsēs tsî tsuxuba ǃgû ǁkhāseb ge ǃKhūba ǁîna tsēa kai ǃâus ǀkha tsî tsuxub ǃnâ khau ra ǀaes ǀkha gere ǂgaeǂgui. 22 Hoaǁaeb ge ǃKhūba kai ǃâus tsî khau ra ǀaes tsîra ǃnâ ǁîn ǀkha ge hâ i.
© Khoekhoegowab Elobmîs © Bible Society in Namibia, 2020.
