Gā-aisiba ǃkhōǀkhās
1 Gā-aisi tamaba ǂgaiǂui raba,
tsî ǁnâuǃā tamaba ǁîb domma ra ǁnâu kaiba?
2 ǁÎb ge daob xōǀkhā ǁgoe ǃnâugu ai,
tsî daogu ǀgoradi tawa mâǃhūs âba ra ū;
3 ǃās di ǂgâ-amdi tawa
tsî dao-amdi tawab ge mâ tsî ra ǂgaiǂui:
4 “Khoedo, sado ta ge ra ǂgai;
ûitsama khoen hoana ta ge ra ǂgai.
5 Sa ǁauxūdo, gā-aisiba hō re;
sa gâredo, ǁnâuǃāba hō re.
6 ǃGâ te re, ǃgâi xūna ta nî ǃhoa xuige,
tsî ǂhanu xūn ǀguin ge ti amǁgaukha-u nî ǂoaxa.
7 Ti ams ge amaba nî ǃhoa,
ti amǁgaukha ui-uisasiba ǁkhan hâ amaga.
8 Ti ams di mîdi hoadi ge a ǂhanu-ai;
ǂhumi-i tamas ka io ǀhôagaosi-i ge ǁîdi ǃnâ a ǀkhai.
9 ǁNâuǃāxa khoen ǃaroma di ge ǁîde a ǃgāsa
tsî ǂansa ūhân ǃaroma di ge a ǂhanu.
10 ǀHaiǀuribats nî ūs xa ti ǁgauǃnâsa ūǃoa,
ǃhuniǀurib ǃās ǃnâ ǂansa ǁhûibasen.
11 “Gā-aisib ǃgomǀgausa ǀuin xa ǂoaǂamsa xui-ao
tsî sats ra ǁkhore xūn hoan ge ǁîb ǀkha ǀguirohe ǁoa.
12 Tita gā-aisita ge ǁnâuǃāba ūhâ
tsî tita ge ǂans tsî ǀgoraǃgâǁkhāsib tsîra ūhâ.
13 ǃKhūba ǃaoǃgâs ge ǂkhababa ǁkhansa.
Tita ge ǁîǁâsens tsî ǁîǃgôasens,
ǂkhaba daogu tsî ǀhôagao ǃhoa-ain tsîna ǃhuisa.
14 Tita ge ǃgâi ǀapes tsî ǀoasa gā-aisib tsîra ūhâ;
tita ge ǁnâuǃāb tsî ǀgaib tsîkha ūhâ.
15 Tita ge gao-aoga ra ǂgaeǂgui kai
tsî ǂgaeǂgui-aoga ǂhanu-aisiba ra dī kai.
16 Tita ge gaoǀgôaga ra ǂgaeǂgui kai
tsî ǂamkhoegu tsî ǂgaeǂguigu hoaga.
17 Tita ǀnamna ta ge a ǀnam
tsî tita ra ôan ge amase nî hō te.
18 ǃKhūsib tsî ǃgôasib tsîkha ge tita tawa hâ,
hâhâ ra ǃkhūsib tsî ǁuib tsîkha.
19 Tita ra mā ǁuib ge ǂoaǂamsa ǃhuniǀurib xa a ǃgâi,
ǂoaǂamsasets ǁhûiǂui hâ ǀhaiǀurib xa.
20 ǂHanu-aisib daob ǃnâ ta ge ra ǃgû,
ǃgangu ǂhanu-ai khoen digu ǃnâ.
21 Tita a ǀnamna ta ge ra ǃkhū kai
tsî ta ge ǁîn sâuǃnâ-omga ra ǀoaǀoa.
22 “ǃKhūb ge kurus âb di tsoatsoas ǃnâ tita ge kuru,
kuru ge xūn hoan aiǃâb ge tita ge ǂnubi.
23 ǀNai ta ge tsoatsoas ǃnâ ge ǁgaumâihe,
ǃhūbaib di tsoatsoas aiǃâ.
24 Kai ǁgamgu nî hās aiǃâ ta ge ge hâ i,
ǀaudi ǁgam-i xa nî ǀoaǀoahes aiǃâ.
25 ǃHomgu nî kuruhes aiǃâ ta ge ge hâ i,
ǃnâugu nî ǃgaoǃgaohes aiǃâ ta ge ge ǃnae.
26 ǃHūbaib ǂgāgu âb ǀkhab nî kuruhes aiǃâ,
tamas ka io ǂguro ǃhū-eb nî kurus aiǃâ.
27 ǀHommab ge ǂnubi, o ta ge ǁnāpa ge hâ i,
ǃāǂuisabab ge hurib ǂamai a ǃāǂuis tsîna.
28 ǃĀǂuisabab ge ǀgapise ǁaposase a ǂnubio,
hurib di ǀaudeb ge ǀgaisase dâuǂoaxa kaio.
29 Huribab ge ǁkhaeǂnamib âba kuruba, o ta ge ge hâ i,
ǁgamgu ǁîb tawa ǃkharu tidese;
ǃhūbaib ǃgaoǃgaogab ge ǁgui ǁaeb ai.
30 Tita ge dana xūkuru-aob khami ǁîb ǀgūse ge hâ i,
tsēkorobe ta ge ge ǁîb ǃgâiaǂgao i,
hoaǁae ǁîb aiǃâ ra dâse.
31 Hoaraga ǃhūbaib ǃnâ ra dâse
tsî khoesib ǂama ra ǃgâiaǂgaose.
32 “Xawe nēsi ti ôado ǃgâ te re,
ǀkhaehen ge hâ ǁnān ti daoga ra ǃkhōǀgaipena.
33 Ti ǁgauǃnâsa ǁnâuǀnam, î gā-ai
î ǁîsa tā ǁnāxū.
34 ǀKhaehe i ge hâ, ǁnā-i tita ra ǃgâ-e;
tsēkorobe ti ǂgâ-amdi tawa ra hâ-i,
ti dao-amdi tawa ra ǃâu-e.
35 Tita ra hō-i ge ûiba ra hō
tsî ǃKhūba xu ǀkhomma nî ǃkhōǃoa.
36 Xawe tita ga ǂoaǃnâ-i ge aitsama ra ǂkhôasen,
tita ǁkhan hân hoan ge ǁōba a ǀnam.”
© Khoekhoegowab Elobmîs © Bible Society in Namibia, 2020.
