Hûǁî ǂganamxūs ra ǁkhowa-amhe
1 ǁKhaob ge hûǁî ǂganamxūsa ǁkhowa-am, ob ge ǁaubexa ǃkhare iri di ǁaeba ǃnōba ǀhommi ǃnâ ge hâ. 2 Tsî ta ge hû ǀhomǃgāgu Elob trons aiǃâ mâga ge mû tsî gu ge ǁîga hû xâiǁnâde ge māhe.
3 Tsîb ge ǀnî ǀhomǃgāb hîa ǃhuniǀuri ǃgâihamxūn xapasa ǃomǁae ūhâba hā tsî altars tawa ge mâ. ǁÎb ge ǂgui ǃgâihamxūna ge māhe, hoa ǃanun di ǀgoredi ǀkhab nî ǁîna ǃhuniǀuri altars ai, trons aiǃâ ǁguibase. 4 Tsîb ge ǀanni ǃgâihamxūn diba ǀgoredi ǃanun didi ǀkha ǀhomǃgāb ǃomma xu Elob aiǃâ ge ǃapa. 5 ǁNās khaoǃgâb ge ǀhomǃgāba ǃgâihamxūn di xapasa ū tsî altarsa xu hâ ǀaes ǀkha ǀoaǀoa tsî ǃhūbaib ai ge aoǁnâ. Tsî gu ge ǃgurub, ǂkhupib, napab tsî ǃhūǂgubib tsîga ge hâ.
Xâiǁnâdi
6 O gu ge ǁnā ǁaeb ai hû ǀhomǃgāgu hû xâiǁnâde ge ūhâ iga xâi nîse ge ǂhomisen.
7 ǂGuro ǀhomǃgāb ge ǁîb di xâiǁnâsa xâi, o ra ge ǀaes tsî ǃnareb hîa ǀaob ǀkha habasara ǃhūbaib ai ge ǁnā. Tsîb ge ǃnonaǁîǃâb ǃhūbaib diba ge ǂhubiǂui, haidi di ǃnonaǁîǃâb tsî ǁkhāti hoaraga ǃam ǀgâb ge ge ǂhubiǂui.
8 Tsî ǀgamǁî ǀhomǃgāb ge ǁîb di xâiǁnâsa xâi, o i ge khau ra ǃhom-i khami ī xū-e hurib ǃnâ ge aoǂgāhe. Tsîb ge ǃnonaǁîǃâb hurib diba ge ǀao kai, 9 ǃnonaǁîǃâb hurib ǃnâ hâ ûitsama xūn dib ge ge ǁō tsî ǃnonaǁîǃâb doe-omdi dib ge ge hîkākāhe.
10 Tsî ǃnonaǁî ǀhomǃgāb ge ǁîb di xâiǁnâsa xâi, o i ge kai ǀgamiro-i ǃamǀaes xase ra ǃnâ-e ǀhomma xu ǃnonaǁîǃâb ǃāgu tsî ǁgamǀaudi dib ai ge ǁnā. 11 ǁNā ǀgamiros ge Alsem ti ge ǀon hâ i. ǃNonaǁîǃâb nē ǁgam-i dib ge ge au tsîn ge ǂgui khoen ǁî-e ge āna ge ǁō, ǁgam-i ge au-auhe amaga.
12 Tsîb ge hakaǁî ǀhomǃgāba ge ǁîb di xâiǁnâsa ge xâi. Tsîb ge ǃnonaǁîǃâb sores dib, ǃnonaǁîǃâb ǁkhâb dib tsî ǃnonaǁîǃâb ǀgamiron diba ge ǂnauhe; ǃnonaǁîǃâb ân nî ǃkhaeǃkhaehe tsîb tsēs di ǃnonaǁîǃâba ǃnâ tidese tsî ǁnās ǁkhās xase tsuxuba.
13 Tsî ta ge kō tsî ge ǁnâu, ǃariǃkhās ǀhommi ǁaegub ǃnâ ǁkhana tsî nēti ra mî ǃkhaisa: “Tsūba, tsūba, tsūba ǁnān ǃhūbaib ai ǁan hâna, noxopa gu ǃnona ǀhomǃgāgu nî xâi, xâiǁnâdi di ǀōba ǃgau hâ xui-ao!”
© Khoekhoegowab Elobmîs © Bible Society in Namibia, 2020.
