Salomob di ǂamkhoegu
1 Salomob ge hoaraga Israeli ǂama ge gao-ao i, 2 tsî nēgu ge ge ǁîb di ǂamkhoe i:
Sadoki ôab, Asariab ge ge prister i.
3 Sisab ôakha, Elihorefi tsî Ahiab tsîkha ge ge xoa-ao i.
Ahiludi ôab, Josafati ge ge xoaǁguigu mûǂamao i.
4 Jojadab ôab, Benajab ge ge toroǂnubis ǃkhōdana-ao i.
Sadoki tsî Abiatari tsîkha ge ge prister i.
5 Natanni ôab, Asariab ge ge ǀkharisi ǂgaeǂgui-aogu di dana i.
Natanni ôab, Sabudi ge prister tsî ge gao-aob di ǀapemā-ao i.
6 Ahisari ge ge gao-ommi mûǂamao i.
Abdab ôab, Adonirammi ge ge ǁgarisîsenni mûǂamao i.
7 Salomob ge disiǀgamǀa ǂgaeǂgui-aogu ǀkharigu diga Israeli hoab ǃnâ ge ǁgaumâi. ǁÎgu ge gao-aob tsî ǁîb omaris di ǂûn ǂama ǃereamsa nî tani, mâb hoaba ǀgui ǁkhâb kurib dib di ǂûn ǂama. 8 Nēdi ge ǁîgu di ǀonde:
Benhura, Efraimǃhomgu ǀkharib ǃnâ.
9 Bendekera, Makas, Salbims, Bet-Semes, Elons tsî Bet-Hanans tsîdi ǃnâ.
10 Benheseda, Arubots tsî Sokos tsî Heferǀkharib hoab ǃnâ.
11 Benabinadaba, Dors di ǀkharib hoab ǃnâ; Salomob ôas Tafats ge ge ǁîb tara i.
12 Ahiludi ôab Baanaba, Tanaks, Megidos tsî Betsans ǀgūse ǁgoe ǀkharib hoaba Saretans kōse Jesreels ǃkhawagas ǃnâ; ǁnās ge Betsansa xu Abel-Meholas tsî Jokmeams kōsesa.
13 Bengebera, Ramots Gileadi ǃnâ ǂnôas ǃnâ; ǁîs xōǀkhā Manaseb ôa Jairi ǃārodi Gileadi ǃnâ hâdi tsî Argobǀkharib Basanni ǃnâ ǂnôas tsî ǃnanidisi kai ǃādi ǂnubiǂgoaga ūhâ tsî dao-amdi âdi brons ǂganamūdaga ūhâdi tsîna.
14 Idob ôab Ahinadaba, Mahanaims ǃnâ.
15 Ahimaasa, Naftalib ǀkharib ǃnâ; ǁîb on ge Salomob ôas Basematsa tarase ge ūhâ i.
16 Husaib ôab Baanaba, Aseri ǃnâ tsî Alots ǃnâ.
17 Paruaxi ôab Josafata, Isaskari ǀkharib ǃnâ.
18 Elab ôab Simeiba, Benjaminni ǀkharib ǃnâ.
19 Urib ôab Gebera, Gilead ǀkharib, ǂguro ge Amorǁîn gao-aob Sihonni tsî Basanni gao-aob Ogi tsîkha di ib ǃnâ.
Nēgu xōǀkhāb ge ǀgui gowoniab ǀguiba hoaraga ǃhūb ǂama ge hâ i.
Salomob gaosib di ǃkhūsib
20 Judab tsî Israeli tsîkha khoen ge hurib amǃgâ ǁgoe ǃhūb kōse ge ǂgui i; ǁîn ge ǂû tsî ā tsî ǃgâiǃgâxase ge ûi hâ i. 21 Salomob ge Eufratǃāba xu Filisteǁîn di ǀkharib tsî Egipteb di ǃhūǀgoras kōse ǁgoe gaosigu hoaga ge gaoǂam hâ i. ǁÎn ge ǁîba ǁgui-aimarisa gere matare tsî ǁîba ûib hâs kōse gere ǃoaba.
22 Salomob di tsēkorobe ǂûn ge; koroǀoadisi litergu tsaura mel-i tsî disiǀoadisi litergu ǀkhora mel-i, 23 disi kaukauhe hâ goman, ǀgamdisi goman tsî ǀguikaidisi gūn tsîna ge i, ǁkhaman, ǁgûn, ǀgaen tsî kaukausa anin tsîn xōǀkhā.
24 Salomob ge hoaraga ǃhūb Eufrati huriǂoasǀkhāb ai, Tifsagsa xu Gasas kōse ǁgoeba ge gaoǂam hâ i. Eufrati huriǂoasǀkhāb di gao-aogu hoagu ge ǁîb ǃnaka ge hâ i, tsîb ge xōǀkhā ǁgoe ǃhūgu ǀkha ǂkhîb ǃnâ ge ûi hâ i. 25 Salomob ûi hâs kōsen ge Judab tsî Israeli tsîkha khoena hoaraga ǃhūb ǃnâ ǃnorasase ge ǁan hâ i; mâ omaris hoas ge ǁîs draibehais tsî ǀnomahais ǁîs ǃnakan nî ǂnûsa ge ūhâ i.
26 Salomob ge hakadisiǀoadisi hāgu, torokunide ra ǂgaegu tsî disiǀgamǀaǀoadisi ǃgapihāgu tsîna ge ūhâ i. 27 ǁÎb di disiǀgamǀa ǂamkhoegu ge mâb hoaba ǁîb di ǁkhâb ai, gao-aob Salomob tsî ǁîb gao-ommi din tsîna ǂûna gere hā-ūba. ǁÎgu ge gere kōǃgâ, î-i tā xū-i xare-e tôasi. 28 ǁÎgu ge ǁkhāti ǃhoroǀgân tsî ǂnâsa ǀgân tsîna, ǂhâbahen gere ǃkhaidi hoadi ai ǃgapihāgu tsî kunihāgu tsîna gere sī-ūba.
29 Elob ge Salomoba kai gā-aisib tsî ǁnâuǃāb tsîna ge mā, ǁîb di ǂans ge hurib amǃgâ ǁgoe ǃhūb kōse ge kai i. 30 Salomob ge aiǂoas di khoen tsî Egipteb di khoen tsîn hoan ǃgâ-ai ge gā-ai i. 31 ǁÎb ge hoaraga khoen xa ǃnāsase ge gā-ai i. ǁÎb ge Esraǁîb, Etanni tsî Maholi ôagu Hemanni, Kalkoli tsî Dardab tsîgu ǃgâ-ai ge gā-ai i. ǁÎb ge xōǀkhā ǁgoe ǃhūgu hoagu ǃnâ kaise ge ǂansa. 32 ǁÎb ge ǃnonaǀoadisi ǂkhoamîde ǃamǁare tsî ǀguiǀoadisis xa ǃnāsa ǁnaetsanade ge xoa. 33 Tsîb ge ǁkhāti hain tsî ǁharen xa ge ǃhoa, sederhais, Libanonni ai mâsa xu hisopi ǂnubiǂgoab ai ra ǀommi kōse. ǁÎb ge xamarin, anin, ǂhanaben tsî ǁaun xa ge ǃhoa. 34 Hoa ǃkhaina xu gu ge gao-aogu, ǁîb gā-aisib xa gere ǁnâuga, Salomob gā-aisiban sī nî ǃgâga khoena gere sî.
© Khoekhoegowab Elobmîs © Bible Society in Namibia, 2020.
