ǀŌ-aisa ǃkhais ǀgoreǀîs dis
1 Moseb ge ǃaruǀî Israelǁîn ǃoa ge mî: “Nēdi ge mîmādi tsî ǂnûiǂgādi hîa du ǃKhūb sadu aboxagu di Elob ge sado mā ǃhūb ǃnâ du ǁan hâs kōse ǂōrisase nî ǃkhōǀgaipede. 2 ǁNā ǃhūb hîa du nî ūbasenni ǃnâ du nî doeǁgaǂui ǁaedi gere ǁîn di eloga ǀgoreǀî ǃkhaigu hoaga hîkākā: Nēsi i ga ǀgapi ǃhomgu tsî ǃnâugu ai hâs tamas ka io ǃam haidi ǃnaka hâs hoasa. 3 ǁÎn di altarde khôaǁnâ, î ǁîn di ǃnâu ǀuiǂgurihaiga ǃârodi ǃnâ khôaǃā. ǁÎn di elos Aseras di īga ǂhubiǂui, î ǁîn di ǁgôa-eloga ǁhāǁnâ, ǁkhawa gu ǁnā ǃkhaigu ai ǀgoreǀîhe tidese. 4 Tā ǃKhūb sadu Eloba nē khoen gere ǁîn eloga ǀgoreǀî khami ǀgoreǀî. 5 Hoaraga ǀkharigu Israelǁîn ǁaedi diga xub ge ǃKhūba ǀō-aisa ǃkhais, ǁîb di ǀons nî ǀgoreǀî tsî ǃoaba-aihesa nî ǁhûiǂui. ǁNā ǃkhaisa ôaǂui tsî du ge ǃKhūba ǁnāpa ǀgoreǀî, 6 khauǁguibadi tsî nau ǁguibade ǁguibas ǃaroma sī-ū, sadu disiǁîǃâdi tsî mādi, ǃKhūba du ra mîmâiba mādi, māsenxa ǁguibadi tsî ǂguroǃnaesagu, sadu goman tsî ǀgoan digu tsîna ǁguibas ǃaroma ǁnāpa nî sī-ū. 7 ǁNāpa du ge sadu tsî sadu omaridi tsîna ǃKhūb sadu Elob, sado ge ǀkhaeb di mûǁae ǂû tsî dī du ge ǃgâin ǃaroma nî ǃgâiaǂgao.
8 “Tā nētsē du ra dī khami dī, tsî mâ-i hoa-e ǁî-i ǂâisa sao tsî ǂgao-i ra khami ǀgoreǀî; 9 ǃKhūb ge mîmâiba du ǃhūb, ǂkhîb ǃnâ du nî ûib ǃnâ du noxopa ǂgâ tama xuige. 10 Jordanǃāba du ga ǃgâu, o du ge ǃKhūb sadu Elob ge ǀumis ase mā du ǃhūba ūbasen tsî ǂkhîb ǃnâ nî ǁan. ǁÎb ge khākhoen hoana nî ǁkhaebēba du. 11 ǃKhūb ge ǀō-aisa ǃkhais, ǁîb di ǀons nî ǀgoreǀî tsî ǃoaba-aihesa nî ǁhûiǂui. ǁNāpa du ge tita ge mîmā du ǁguibade nî sī-ū: Khauǁguibadi tsî nau ǁguibade, sadu disiǁîǃâdi tsî mādi ǃKhūba du ge mîmâibadi tsîna. 12 ǁNāpa du ge ǃKhūb sadu Elob mûǁae, sadu tsî sadu ôan, sadu ǃgān tsî Leviǁîn, sadu ǃādi ǃnâ ǁan hân hoan ǀkha nî ǃgâiaǂgao; xawe du nî ǂans ge Leviǁîn ǃhū-i xare-e ǀumis ase ūhâ tidesa. 13 ǂAnbasen î du tā sadu ra ǂgao ǃkhai-i hoa-i ai ǁguibade sī ǁguiba. 14 Hoaraga ǀkharigu Israelǁîn ǁaedi diga xub ge ǃKhūba ǁhûiǂui ǀō-aisa ǃkhais ai ǀgui du ge ǁguibade nî sī-ū. ǁNāpa ǀgui du ge khauǁguibade ǁguiba tsî tita ge mîmā du xūn hoana nî dī.
15 “Xawe du ge sadu ǂûs ǃaroma, mâpa ǀgui du ga ǁan xawes tsîna ǀgoa-e a ǂā ǁkhā tsî tura du ras kōse, ǃKhūb sadu Elob ǀkhae du hân hoana nî ǂû. ǃAnun tsî ǃanuoǃnân tsîn hoan ge ǁî-e, ǁkhama-i tamas ka io ǁgû-e du ga ǂû hâ khami ǀgui nî ǂû. 16 Xawe du ge ǁî-i ǀaoba ǂû tide tsî ǁgam-i khami ǃhūb ai nî ǁhōxū. 17 ǃKhūba du ra ǁguiba xū-i hoa-i ge sadu ǁanǃkhaigu tawa ǂûhe tide: Sadu ǃhorob di disiǁîǃâs kas, sadu ǂauxûib kas, sadu ǀkhera-oli-i kas, ǂguroǃnaesab sadu goman tamas ka io ǀgoan dib kas, ǃKhūba mās di mîmâis kas, sadu māsenxa ǁguibas kas tamas ka io ǀnî ǀkhara ǁguibas kas hoasa. 18 ǃKhūb sadu Elob mûǁae du ge, sadu tsî sadu ôan, sadu ǃgān tsî Leviǁîn, sadu ǃādi ǃnâ ǁan hân hoan ǀkha nē ǁguibade ǃKhūb ge ǁhûiǂui ǀō-aisa ǃkhais tawa ǀgui nî ǂû. ǁNāpa du ge dī du ra xū-i hoa-i ǃnâ ǃKhūb sadu Elob mûǁae nî ǃgâiaǂgao. 19 ǂAnbasen î sadu ǃhūb ǃnâ du ǁan hâs kōse tā Leviǁîna ǀuru.
20 “ǃKhūb sadu Elob ga mîmâib ge khami sadu ǃhūb di ǀkhariba khoraǂui, o du ge mâpa ǀgui du ga ǁan xawes tsîna tura du ra khami ǁgan-e ǂû ǁkhā. 21 ǃKhūb sadu Elob ge ǁîba ǀgoreǀî-ais ǃaroma ǁhûiǂui ǃkhaib ga kaise ǁan du hâpa xu a ǃnū, o du ge sadu ǂûs ǃaroma, mâpa ǀgui du ga ǁan xawes tsîna goma-i tamas ka io ǀgoa-i, ǁîb ge ǀkhaeb ase mā du-e ǂā tsî tura du ras kōse sadu hâǃkhais tawa a ǂû ǁkhā. 22 ǃAnun tsî ǃanuoǃnân tsîn hoan ge ǁkhama-i tamas ka io ǁgû-e du ga ǂû hâ khami ǀgui ǁî-e nî ǂû. 23 Xawe tā ǀaob xa hâǃnâhe ǁgan-e ǂû, ǀaob ǃnâb ûiba hâ tsî du ûiba, ǁgan-i ǀkha a ǂû ǁoa xuige. 24 ǀAoba du ge ǂû tide, xawe ǁîba ǁgam-i khami ǃhūb ai ǁhōxū. 25 ǃKhūb mûǁae ǃgâi tsî ǂhanuna du ga dī, on ge hoana sadu tsî sadu surib tsîn ǀkha ǃgâise nî ǃgû. 26 Hoaraga ǃnâu ǁguibadi tsî ǃKhūba du ge mîmâiba mādi tsîn hoana ǃKhūb ge ǁîba ǀgoreǀî-ais ǃaroma ǁhûiǂui ǃkhaib tawa sī-ū. 27 ǃKhūb sadu Elob di altars ai sadu khauǁguibadi, ǁgan-i tsî ǀaob tsîna ǁguiba. Nau ǁguibadi di ǀaoba altars ai ǁhōǂui tsî du ge ǁgan-e a ǂû ǁkhā. 28 Hoaraga mîmādi hîa ta ge mā dude ǃkhōǀgaipe. ǃKhūb mûǁae a ǃgâi tsî ǂhanuna du ga dī, on ge hoana sadu tsî sadu surib tsîn ǀkha ǀamosib kōse ǃgâise nî ǃgû.
Tā ǀkhara eloga ǀgoreǀî
29 “ǃKhūb sadu Elob ge nau ǁaedi di ǃhūba du ra ǁkhâuǁnâ khami ǁîde nî hîkākā, tsî du ge ǁîn ǃhūba ūbasen tsî nî ǁanǃnâ. 30 ǃKhūb ga ǁnā ǁaede hîkākās khaoǃgâ, ǂanbasen î du tā ǁîn di eloǃoaba ǁnaetiga sao, ǁnās nî ǁōǁōsa xui-ao. Tā ǁîgu gere ǃoabahe ǀgauga ǂanǂui ǂgao, î du tā ega ǁîn khami ǁîga ǀgoreǀî. 31 Tā ǃKhūb sadu Eloba ǁîn ra ǁîn di eloga ǀgoreǀî ǀgaub ai ǀgoreǀî ǂgao, ǁîn ra ǁîn di eloga ǀgoreǀîs ǃnâ ǃanuoǃnâ xūn ǃKhūb a ǃhuisana dī xuige. ǁÎn ge ǁîn ôan tsîna ǁîn di elogu ǃaroma ǀaes ǃnâ a ǁguiba.
32 “Tita ge mîmā du xūn hoana du ge ǂōrisase nî dī, xawe du ge ǁnāpa xū-i xare-e ǀaro tamas ka io ūbē tide.
© Khoekhoegowab Elobmîs © Bible Society in Namibia, 2020.
