Deuteronomium 13 - Khoekhoegowab New Translation 2020 (KKG20)

1 “Kēbo-ao-i tamas ka io ǁhapoǁguiǃā-ao-i ga sadu tawa hā tsî sao-i tamas ka io buruxa dī-i xa mîba du, 2 tsî-i ga nē sao-i, tamas ka io buruxa dī-e ǁî-i ge mî khami ī, tsî-i ga ǁî-e ǁnās ǃaroma a mî: ‘A da ǀkhara elogu ǀgoreǀî tama du ge hâ iga ǀgoreǀî tsî ǁîga ǃoaba.’ 3 ǁNāti ī kēbo-ao-i, tamas ka io ǁhapoǁguiǃā-ao-i ra mî xūn ai tā ǂâi-i xare-e ǂnûi. Nēs ǀkhab ge ǃKhūb sadu Eloba ra ǃâitsâ du, îb ǂanǁapo ǁkhā, ǁîba du sadu ǂgaob tsî ǀoms tsîra hoara ǀkha a ǀnamsa. 4 ǃKhūb sadu Elob di daoga sao, î ǁîba ǃaoǃgâ; ǁîba ǁnâuǀnam, î mîmādi âba ǃkhōǀgaipe; ǁîba ǀgoreǀî, î ǁîb tawa hâǀgara. 5 Mâ kēbo-ao-i tamas ka io ǁhapoǁguiǃā-ao-i, sado ǃKhūb sadu Elob, Egipteb di khobosisa xu ge ǂgaeǂguiǂui dub ǃoagu ga khâikhâiǃnâ-i hoa-e du ge nî ǃgam. ǁNāti ī khoen ǃKhūb ge mîmā du ûiba xu ra ǂgaeǂhapu dun ge a ǂkhaba. ǁÎna du ge sadu ǁaeguba xu nî ǃgamǂui.

6 “Sadu ǃgâsan, sadu ôan, sago taradi tamas ka io ǀgūǀhōsan tsîn ge ǀhôagao ǀgaub ai ǂgaoǂgaoǃnâ du ǁkhā ǀkhara elogu, sadu aboxagu tsîn ge tātsēs tsîna ǃoaba tama hâ iga ǀgoreǀîs ǃaroma. 7 ǁÎn di ǀgui-i ge sadu ǀgūse hâ khoen di elogu tamas ka io sadu ǃnūse hâ khoen di eloga ǀgoreǀîs ǃaroma a ǂgaoǂgaoǃnâ du ǁkhā. 8 Tā ǁîna ǃgâ tsî ǃhoadan kaisen. Tā ǁîna ǀkhom tamas ka io ǁkhaebatsâ. 9 ǁÎna ǃgam! ǂGuro ǀuisa ǁîn ai ǂnoa, tsî ǁnās khaoǃgâ an nau khoen hoan xa ǀuiǁhomhe. 10 ǁÎna ǀuiǁhomǃan! ǁÎn ge ǃKhūb sadu Elob, Egipteb di khobosisa xu ge ǂgaeǂguiǂui dub ǃoagu gere khâikhâiǃnâ du. 11 Nēsan ga hoaraga Israelǁîna ǁnâu, on ge ǃKhūba ǁnâuǀnam tsî nî ǃaoǃgâ; ǁîn ge ǁîba ǃaoǃgâ tsî tātsēs tsîna ǁnāti ī xū i xare-e ǁkhawa dītsâ tide.

12 “ǃKhūb sadu Elob ge mā du ǃādi ǃnâ du ga ǁan, o du ge a ǁnâu ǁkhā, 13 ǀnî khoen sadu ǃās din ge ǀǀîn ǂhunuma khoena ǀkhara elogu sadu aboxagu tātsēs tsîna ge ǃoaba tama hâ iga ǀgoreǀîs ǃaroma ge ǂgaeǂhapu. 14 ǁNāti ī xū-e du ga ǁnâu, o ǂōrisa ôaǃgao tsîs ga ǁnāti ī ǂkhaba xū-i ge ī ǃkhaisa ama, 15 o hoaraga khoen ǁnā ǃās din tsî ǁîn goman tsî ǀgoan tsîna ǃgam. ǁNā ǃās hoaragasa hîkākā. 16 ǁNāpa ge ǁan hâ i khoen di xūn hoana ǀhûhâsib di ǀhaoǃkhais tawa ǀhaoǀhao. ǁNās khaoǃgâ ǁnā xūn hoan ǀkha ǃāsa ǂhubiǂui, ǃKhūb sadu Elob di ǁguibas ase. Nēti ī ǃās ge ǁkhawa omkhâihe tide. 17 Tā hîkākāhe nîse ge ǀhaoǀhaohe xūna xu xū-i xare-e ū, îb tā ǃKhūb di ǁaiba sadu ǃoagu khâi, xaweb ǀkhom tsî ǀkhomxa du î du sadu aboxagab ge mîmâiba khami ǂguiǂguisen. 18 Tita go mā du mîmādi hoade ǁnâuǀnam tsî du ge ǃKhūb sadu Elob ǂâisa hoaǁae nî dī.”