1 ǁNās khaoǃgâb ge ǃKhūba khoena ǃhūba xu ge kuru
tsî mâ-i hoa-e ǁkhawa ǁnāǀî ra sî-oa.
2 ǁÎb ge ǁînab ge ǁaerob ǀguib di ûiba mā,
xawe ǁîna ǃhūbaib ai hâ xūn hoan ǂama ǁkhāsiba ge mā.
3 ǁÎb ge ǁîna ǁîb di īb ǃoa ge kuru
tsî ǁîna ǁîb di ǂhunuma ǀgaiba ge mā.
4 Nau kurusaben hoan ge ǁîna ra ǃao,
tsîb ge ǁîna ǀgurun tsî xamarin tsî ǀhomanin ǂama
ǁkhāsiba ge mā.
6 ǁÎb ge ǁîna namgu, mûdi,
ǂgaedi, ǂâidi tsî ǂgaoǂandi tsîna ge mā.
7 ǁÎb ge ǁîna ǂans tsî ǁnâuǃāb ǀkha ge ǀoaǀoa
tsî ǁîna ǃgâib tsî ǂkhabab tsîkha di ǃkharagagusiba ge ǁgau.
8 ǁÎb di kurus kaisiban nî mû
gab ge ǁîb di mûǂgāǀgauba ǁîna ge mā.
10 ǁÎn ge ǁîb ǃanu ǀonsa nî ǃkhōǀkhā
tsî kaisib ǁîb ge dīn hoan diba nî koa.
11 ǁÎb ge ǁîna ǂans
tsî ǂhanub tsîna ûib di ǀaus ase ge mā.
12 ǁÎb ge ǀamo ǃgaeǀhaosa ǁîn ǀkha ge dī
tsî ǁîb di mîmāde ǁîna ge ǂhaiǂhaiba.
13 ǁÎn ge ǂkhaisasib ǁîb ǁkhāsib diba mû
tsî ǂkhaisib ǁîb dommi diba ge ǁnâu.
14 ǁÎb ge ǁîna ǂhanuoǃnâsib ǃoagu ǃkhâikhom
tsî mâ-i hoa-e, mâti i nau khoen ǀkha nî ûi ǀgausa ge ǁkhāǁkhā.
Elob ge a ǀgoraǃgâ-ao
15 ǃKhūb ge hugaǀgui khoen ra dī xūna ǂan; ǀgui ǀgau-i ǁîba xu gaugausens di i tsîn ge a ǀkhai. 17 ǁÎb ge mâ ǁaes hoasa ǁîs ǂgaeǂgui-aoba ge mā, xawe Israelǁaes ge a ǃKhūb di ǂhunuma ǁae. 19 ǃKhūb ge hoaǁae khoen ra dī xūna ra kō. ǁÎn ra tsēkorobe dī xūn ge tsēs khami ǁîba ǃgāsaba. 20 ǀGui ǁore-i ǁîn di-i tsîn ge ǁîba xu sâusâusa tama hâ. ǁÎb ge hoana a ǂan. 22 ǀGâsana da ga mā, ob ge ǃKhūba harebesa ūhâ ǀkhunuǂnûidas ǃgâ-ais a ǃgomǀgausa ǃkhaisa ra ǂanǃgâ. Khoesi khoexaǃnâsib ge ûib ǁkhāb khami ǁîba ǃgomǀgausaba. 23 Egab ge ǂkhaba-aona ǀgoraǃgâ tsî nî ǁkhara, tsîn ge ǁîn ǃoaǂui hâ-e nî ǃkhōǃoa. 24 Xaweb ge ǃKhūba ǁnān ǁîb ǃoa oahās ǃaroma ra ǃhobasenna nî mā-am. ǁÎb ge hugaǀgui ǁnān ǃâubasensa ra ǂoaǃnâna ra ǂgaoǂgaoǃnâ.
ǃHobasens ǃoa hâ ǂgaikhâis
25 Sa ǁoreba khaos ai ǁnāxū, î ǃKhūb ǃoa hā. ǂGomǂgomsase ǀgore, îb ǃgâi ûibats nî ûiga hui tsi. 26 Hoan xa ǀGapib ǃoa oahā, î ǁoreba xu dabasen tsî ǂkhababa ǁkhan. 27 ǁNān ûitsaman ge ǃKhūba gangan ǁkhā, xawe ǁō hân di ǀgui-e koatsanasa, Hoan xa ǀGapiba ǁnaeba ǁkhān a? 28 Ûitsama khoe-i ge ǃKhūba koatsanasa ǁnaeba ǁkhā, xawe ǁō hâ tsî ǀkhai-i ge ǁîba gangan ǁoa. 29 Mâtikōses kha ǃKhūb di ǀkhomxaǃnâ ǀûbasa, ǁîb ǃoa ra dabasenn ǃoa a kai. 30 Xawe nēb ge khoen di ǀgau tama hâ; sada di ǀgui-i tsîn ge ûihâhâ tide. 31 Xū-i xare-i ge sores ǃgâ-ai ǃnâsa tama hâ, xaweb ge sores di ǃnâb tsîna soreǃkhaeǃkhaes ra hâ, o ra ǃkhae. Mâtikōse supuse di khoesi ǂâidi tsîna ǂkhabab xa ǃkhaeǃkhaehe ǁkhā! 32 ǃKhūb ge ǀhomaib ai hâ ǀgamirodi hoade ra kōǂam, xawe khoen ge tsao tsî a tsara.
© Khoekhoegowab Elobmîs © Bible Society in Namibia, 2020.
