Gao-aob Hiskiab ǀaeb tsî ǂurus
(2 Gao-aogu 20:1-112 Kroniks 32:24-26)1 ǁNā tsēdi ǃnâb ge Hiskiaba ǀaesen tsî ge ǁō ǁga. Amob ôab kēbo-aob Jesajab ge ǁîb tawa sī tsî ge mî: “Nētib ge ǃKhūba ra mî: Sa omsa ǂhomi; ǁōts nî tsîts ǂuru tide xuige.”
2 Hiskiab ge ǁîb aisa ǂnubiǂgoab ǃoa dawa tsî ǃKhūb ǃoa ge ǀgore: 3 “ǃKhūtse, ǂâihō re mâti ta ge ǂgomǂgomsase ǃoaba tsi ǃkhaisa, mâti ta ge ǂgaob hoab ǀkha ǃoaba tsi tsî sa mûǁae ǃgâina gere dī ǃkhaisa.” Hiskiab ge tsûsase ge ā.
4 Os ge ǃKhūb mîsa Jesajab kōse ge sī: 5 “ǃGû, î Hiskiaba sī mîba: ‘Nētib ge ǃKhūb, sa aboxab Davidi Eloba ra mî: Sa ǀgoresa ta ge go ǁnâu, sa ǁgamroga ta ge go mû; disikoroǀa kuriga ta ge sa ûib tawa nî ǀaroba tsi. 6 Tita ge ore tsi tsî Asiriab gao-aob ǃomma xu nē ǃāsa ǃnoraǃnora tsî ǁîsa nî ǁkhauba.’ ”
7 Ob ge Jesajaba ge ǃeream: “Nēs ge saos ǃKhūba xu hâsa, ǃKhūb mîmâib go xū-e nî dīsa: 8 Mû tita ge disi ǂaidi kōse somma, Axasi dāǃharodi ai nî oa kai.” Os ge soresa disi ǂaide ge oa.
9 Nēs ge Judab gao-aob Hiskiab ge ǀaeba xub ge ǂgau, o a xoa ǀgausa:
10 Tita ge ge ǂâi, ti ûitsēdi ǁaegub ǃnâ
ta ǁŌhân Hâǃkhaib ǃoa nî ǃgû ǃkhaisa;
ǃgau go ûikuriga ta nî sīǃnâ-ū ǀgai-i ge ǀkhai.
11 Tita ge ge ǂâi, ûitsaman ǃhūb ǃnâ ta
ǃKhūba ǁkhawa mû tide ǃkhaisa.
Khoe-i xare-e ta tātsēs tsîna ǁkhawa kōǀî tidesa.
12 Ti ûib ge ǀamǀamhe tsî tita xu ge ūbēhe,
ǃûi-ao-i tentoms khami,
Saraǂomao-i ra ti ǂomxūna xamikhâi khami
ta ge ti ûiba ra xamikhâi.
Tsēasa xu tsuxub kōseb ge ti ûiba ra ǀamǃgû.
13 Huib ǃaroma ta ge ǁgoas kōse ra ā,
xammi khamib ge ǁîba ti ǂkhōga ra khôa.
Tsēasa xu tsuxub kōseb ge ti ûiba ra ǀamǃgû.
14 Swabel-i tamas ka io kranani-i khami ta ra ǂnuni,
ǂnabus khami ta ge ra ǃgae.
Ti mûra ge ǀgapiseb ǃoa kōkhâis xa tsau hâ.
Ti ǃKhūtse, ti ǁgâiǀāba xu huiǂui te re.
15 Tare-e ta a mî ǁkhā?
ǁÎb ge mî tsî nēsa ge dī.
Ti ǀoms tsûb xa ta ge a ǁom ǁoa.
16 Ti ǃKhūtse, nē xūna xun ge khoena ra ûi;
tsî nē xūn hoan ǃnâb ge ti ûib gagaba hâ.
ǂGauǂgau te, î ûi kai te re.
17 Amase, ti tsûb ge ti ǃgâiǃgâ,
xawets ge ti ûiba hîkākāhes āba xu ge sâu,
ti ǁoren hoanats ge sa ǃgâb ai a sâusâu xui-ao.
18 ǁŌhân Hâǃkhaib ge gangan tsi ǁoa;
ǁōb a koa tsi ǁoa xui-ao.
Āb ǃnâ ra ǁgôan ge sa ǂgomǂgomsasiba a ǃâubasen ǁoa.
19 Ûib ǃnâ hân, ûitsaman ge ra gangan tsi,
nētsē ta ra dī khami.
ǁGûgu ge sa ǂgomǂgomsasiba ǀgôana ra ǂanǂan.
20 ǃKhūb ge nî ore te.
Sida ûitsēdi hoade da ge ǁapaxa ǀkhōxūn ai nî ǁnae,
ǃKhūb ommi tawa.
21 Ob ge Jesajaba ge mî: “An ǀnomahais ǂûna ū, tsî ǂgaub nîse ǀhapis ai ǂnûi.”
22 Hiskiab tsîn ge ge mî: “Mâ saosa ta nî sao,
ǃKhūb ommi ǃoa ta nî ǂoase?”
© Khoekhoegowab Elobmîs © Bible Society in Namibia, 2020.
