Gagab ǃnâ hâ ûib
1 Nēsi i ge ǁnān hîa Xristub* Jesub ǃnâ hân ǃaroma ǀgoraǃgâ-e a ǀkhai. 2 ǂHanub Gagab dib, Xristub Jesub ǃnâ ûiba ra māb ge ǁoreb tsî ǁōb tsîkha xu ǃnoraǃnora tsi xui-ao. 3 ǂHanub ge sada di khoesi ǂūsib a ǂkhabusa amaga dī ǁoa i-eb ge Eloba ge dī. ǁÎb ge ǁîb di Ôaba khoesi īsib, sada ǁoreb soros khami īb ǃnâ-u, ǁorebab nî ǀgoraǃgâse ge sî. 4 Elob ge nēsa ǂhanu-aisib di ǂgaoǀkhādi ǂhanub didi nî sada hîa khoesi ǂūsib ǃnâs ose, xawe Gagab ǃnâ ra ûi da ǃnâ dīǀoaǀoahese ge dī. 5 ǁNān khoesi ǂūsib ǃoa ra ûin ge khoesi xūn xa ra ǂâi, xawe ǁnān Gagab ǃoa ra ûin ge gagasi xūn xa ra ǂâi. 6 Tsî khoesi ǂūsib di ǂâis ge a ǁō, xawe Gagab di ǂâis ge ûib tsî ǂkhîb tsîkha ra hā-ū. 7 Khoesi ǂūsib di ǂâis ge Elob ǃoagu a khākhoe, Elob ǂhanuban ǁnâuǀnam tama amaga, ǁnāsan ǁîna a dī ǁoa xui-ao. 8 ǁNān khoesi ǂūsib ǃoa ra ûin ge Eloba a ǃgâiǃgâiǂgao ǁoa.
9 Xawe du ge sado khoesi ǂūsib ǃnâs ose xawe Gagab ǃnâ hâ, Elob di Gagab sadu ǃnâ hâ amaga. Khoe-i Xristub di Gagaba ūhâ tama-i ge ǁîb di tama hâ. 10 Xaweb ga Xristuba sadu ǃnâ hâ, sadu soros ǁoreb xa ǁō hâ hîa, ob ge Gagaba ra ûi kai du, Elob ǀkha du ǂhanu-ai kaihe hâ amaga. 11 Tsî Jesuba ge ǁō hâna xu ge ūkhâi Gagab ga sadu ǃnâ hâ, ob ge ǁnāb, Xristuba ǁō hâna xu ge ūkhâiba sadu ǁōǁkhā sorode ǁkhāti nî ûi-ûi, sadu ǃnâ ǁan hâ Gagab ǃnâ-u.
12 ǁNā-amaga ǃgâsado, sada khoesi ǂūsib ǃnaka ûisa da ge surude tama hâ. 13 Khoesi ǂūsib ǃoa du nî ûis kao, o du nî ǁō, xawe Gagab ǀkha du ga khoesi ǂūsib di dīga ǃgam, o du ge nî ûi. 14 ǁNān Elob di Gagab xa ra ǂgaeǂguihen ge a Elob ôa. 15 Eloba xu du ge khobosis di gaga-i ǃao kai ra-e ǃkhōǃoa tide, xawe du ge ǀgôasis di Gagab ǁîb di ǀgaib ǃnâ-u du Elob ǃoa “ǁGûtse, sida Îtse!” ti nî ǂgaiǂuiba nî ǃkhōǃoa. 16 Elob di Gagab ǂûb ge sada gagab ǀkha Elob ôada a ǃkhaisa ra ǃkhō-am. 17 Tsî ǁîb di ôada a amaga da ge a ǀumi-ao. Elob di ǀumi-ao tsî Xristub ǀkha ǁkhāti a ǀhûǀumi-ao. ǁÎb ǀkha da ga tsâ, o da ge ǁkhāti nî ǁîb ǂkhaisib di ǃâ kai.
ǃGoaxaǁaeb di ǃgâiǃōsib
18 Nē ǁaeb di tsâgu ǃgoaxa ǂkhaisib hîa nî ǂkhaiǂkhaiheb ǀkha a ǀgopeǀnōheǁoasa ǃkhaisa ta ge a ǂan. 19 Hoaraga kurus ge turaxase ǁkhoreb ǀkha Elob ôan di ǂhaiǂhaihesa ǃâu hâ. 20 Kurus ge harebeoǃnâsib ǃoa, ǁîs di ǂâisa xus ose, xawe Elob di ǂâisa xu ǁnāpas ge ǃâubasensa hâ i xui-ao ge ǀgoraǃgâhe. 21 ǁNā kurus ǂûs nî ǀguitsē kāǁōsib di khobosisa xu ǂkhaisib di ǃnorasasib Elob ôan dib ǃoa ǃnoraǃnorahese. 22 Kurus nēsis kōse ǁoratsûb khami tsâ tsûb ǃnâ hâsa da ge a ǂan. 23 Kurus ǀgui tamas xawe da sada Gagaba ǂguro ǀkhaeb Elob dib ase ūhâ, da sada ǂûda ǃnâ ra ǃgae, sada soros di oresa ǀgôase ǁkhorexase ra ǃâubasenǃâ. 24 Nē ǃâubasens ǀkhas ge orehe da gesa. ǃÂubasen da hâ xū-e da ga mû, os ge ǃâubasensa harebeoǃnâ. Khoe-e ǀnai-i ra mû xū-e ǃâubasen ǁkhā-i a? 25 Xawe mû tama da hâ xū-e da ga ǃâubasen, o da ge ǁî-e ǃnūǃnâxasib ǀkha ǁkhorexase ra ǃâubasen.
26 Gagab tsîn ge ǁkhāti sada ǂkhabusasigu âda ǃnâ ra hui. Tare-i ǀgorebas ǃaroma ǂhâbasa ǃkhaisa da a ǀū xui-ao, xaweb ge Gagab ǂûba mîǂuiheǁoasa ǃgaedi sada didi ǃnâ ra ǀgoreba da. 27 ǁNāb ǂgaoga ra ôaǃnâb ge Gagab di ǂâisa ǂan, Elob ǃoab ǁîba ǃanuna ra ǀgoreba xui-ao.
28 ǂAn da ge a Elob ra ǀnammi hân, ǁnān ǁîb di ǂâis ǃoa ǂgaihe hân hoan di ǃgâiba ǃoa ra sîsen ǃkhaisa. 29 ǁNān ǀnaib a ǂannab ge Eloba ǁîb Ôab ǀkhan nî ǀguiti-īse ǁhûiǂui xui-ao, ǁîb Ôab nî ǂguin ǁaegu ǂguroǃnaesabese. 30 Tsî ǁnān ǁhûiǂuib genab ge ge ǂgai. ǂGaib ge khoenab ge ge ǂhanu-ai kai. Tsî ǂhanu-ai kaib gen ǀkhab ge ǁkhāti ǂkhaisib âba ge ǀgoragu.
Elob di ǀnammi Xristub Jesub ǃnâ hâb
31 Tare-e da ǁnâi nēn xa nî mî? Elob ga sada ǀkha hâo, tari-e kha sada ǃoagu nî hâ? 32 ǁNāb, ǁîb Ôab ǂûba sâu tama i tsî ǁîba sada hoada ǃaroma ge māba. Mâtib ǁnâi ǁîb ǀkha hoa xūna ǀkhomxase mā da tide? 33 Tari-e Elob di ǁhûiǂuisabena nî ǀhapiǂnûiǀkhā? Elob ge ǁnāb ǂhanu-ai kai raba. 34 Tari-e ǀgoraǃgâ ra-e? Xristub Jesub ǁō geb, tamas ka io ǁōba xu ge ǂkhaiǂkhaiheb ose. ǁÎb ge Elob amǀkhāb ǁôab tawa sada ra ǀgorebase ǂnôa. 35 Tari-e sada Xristub di ǀnamma xu nî ǀgora? ǁGâiǀāba, ǂōǂōsiba, ǃgôaǃgonsa, ǃâtsūǀkhāba, ǀōǀkhāsiba, tsūǀkhāba tamas ka io gôaba? 36 Xoamâihe hâ khami:
“Sats ǃaroma da ge tsēs hoasa ra ǃgamhe
tsî ǂāgūn ase ǂâiǁguiǃnâhe hâ.”
37 Xawe da ge nēn hoan ǃnâ, dansa ǁnāb sada ǀnam hâb ǃnâ-u ūhâ. 38 ǂAn ta a xui-ao, ǁōb kas, ûib kas, ǀhomǃgān kas, ǀhomsi danaǂgaeǂgui-aogu kas, ǀgaigu kas, nēsi hân tsî ǃgoaxan kas, 39 ǀgapib tamas ka io ǃgammi kas tsî ǀnî kurusabe-i kas hoasa i ge Elob ǀnammi, Xristub Jesub, sada ǃKhūb ǃnâ-u sada diba xu a ǀgora da ǁoa.
© Khoekhoegowab Elobmîs © Bible Society in Namibia, 2020.
