1 Sada ge a ǂan ǃhūbaisi tentommi sada ǁanǃnâ hâb ga khôaǁnâhe, ob Eloba ǀamose nî hâhâ om-i, ǃomgu ǀkha kuruhe tama-e sada nî ǁanǃnâse ǀhommi ǃnâ ūhâ ǃkhaisa. 2 Tsî da ge tentom-i ǃnâ ǁan hâǃâ ǀhâimâiǀom tsî ra ǁkhore, î-i ǁnā om-i ǀhomma xu hâ-e sada ana, 3 ǁî-i ǀkha anahe hâse da ge ǀōǀkhāse hōhe tide. 4 Nē ǃhūbaisi tentommi ǃnâ da ûi hâ hîa da ge ǃgomsigu xa ra ǀhâimâiǀom. ǂGaeǂuiǀkhāhe tama i tsî ǂgaeǂgāhe ǂgao da ra amaga, ǁō ǁkhā-i ge nî ûib xa haraǂgāhe. 5 Elob ge ǁnāb sada nē ǀkharaǀkharas ǃaroma ge aiǂhomi tsî ǁîb di Gagaba hoa xūn di ǁapoǁapos ase ra mā daba.
6 ǁNā-amaga da ge hoaǁae ǁkhoaǂgaosib xa ǀoa hâ. Soros ǃnâ da ǁan hâs kōse da noxopa ǃKhūba xu ǃnū ǃkhaisa da ge a ǂan. 7 ǂGomsa xu da ge ûi hâ, xawe mû da rana xus ose. 8 Sada i ge nî ǃgâiba, sada sorode xu ǂoa tsî ǃKhūb tawa sī ǁansa. 9 Xūn hoan ǃgâ-ai da ge sada oms ǃnâ tamas ka io ǃnūse hâsa tsî xawe ǁîba ǂkhîǂkhîsa ra dītsâ. 10 Sada hoada Xristub* di ǀgoraǃgâǃnaos aiǃâ nî ǂhai, mâ-i hoa-i ǁî-i di ûib ǃnâ i gere dī xūn, ǃgâi tsîn ga tsūs hoasa sada ǃoaǂuis ǃoa nî ǀgoraǃgâhe xui-ao.
Xristub ǃnâ-u Elob ǀkha ǂkhîbagus
11 ǃKhūba ǃaos ra tare-e ǂâibasen ǃkhaisa ge a ǂan, xui-ao ge ge ra dītsâ khoena Eloba gowadanbasa. Elob ge sige ǂhaisase a ǂan tsî ta ra ǃâubasen sadu ǂgaoǂans ǃnâ du nî tita tsîna ǂhaisase ǂan ǃkhaisa. 12 Sige ge ǁkhawa ǁî-aitsama sadu aiǃâ koasen ǂgao tama hâ, xawe ge ge ra dītsâ sado īǁkhāsiba māsa sige ai ǂnīsas ǃaroma, î du ǁnān hîa ǁîn di ǃaugasi īsib ai ra koasenn tsî ǁîn di ǂgaob ǃnâ koasen taman xa ǃeream ǁkhā. 13 Amase ge ga ǃkhau hâ, o ge kom Eloba ǃoabas ǃaroma ǃkhau hâo. Tsî ge ga ǂuru ǁnâuǃāb ǃnâ hâ i, o ǁnās kom sadu ǃaromasao? 14 Xristub di ǀnammi ge sige ra ǂgaeǂgui tsî ge ge ǀGui Khoeb ge hoan ǃaroma ǁō ǃkhaisa ra mûǂan, ǁnā-amagan ge hoana ge ǁō. 15 ǁÎb ge hoana ge ǁōba, în ǁnān ûiba ūhâna tā ǁîn ǀguina ûiba, xawe ǁîb hîa ge ǁō tsî ǁîna ǁōba xu khâibab ǃaroma ûi.
16 Khoe-i xare-e da nēsisa xu khoesi ǀgaub ai ǂan tide. Tsî ge ge Xristuba khoesi ǀgaub ai ge ǂan i, xawe ge ge nēsi ǃaruǀî ǁnāti ǂan bi tama hâ. 17 Khoe-i ga Xristub ǃnâ hâo, o-i ge a ǀasa kurusabe, ǀoro xūn ge ra ǃgû-ī, ǀasan ge go hā. 18 Nēn hoan ge Elob xa ge kuruhe, ǁnāb hîa sada Xristub ǃnâ-u ǁîb ǀkha aitsama ǂkhîbagu kai tsî sige ǃoabas ǂkhîbagus disa ge māba. 19 Elob ge Xristub ǃnâ-u ǃhūbaiba ǁîb ǂûb ǀkha ge ǂkhîbagu kai, ǁoren âna ǃgôaba tamase. Tsî ǁnā ǀgaub ai ǂkhîbagus di ǂhôasa sige ǃnâ ge ǂgā.
20 Sige ge a Xristub di ǂnûǁkhaeba-ao, Elob ra sige ǃnâ-u khoexaǃnâse ǂgan du xase. ǁNā-amaga ge ge Xristub ǃaroma ra ǀkhoma: Elob ǀkha ǂkhîbagu re. 21 Xristub ge ǁore-i xare-e ge ūhâ tama hâ i, xaweb ge Eloba sada ǁoren ǃaroma ǁîba ǁoreǁguibas ase ge dī, î da ǁîb ǃnâ Elob di ǂhanu-aisi kai.
© Khoekhoegowab Elobmîs © Bible Society in Namibia, 2020.
