Nauna ǃgâidī, sats ǂûts ose
1 Sada hîa ǂgoms ǃnâ ǀgaisada ge ǁnān hîa ǂkhabusana nî hui tsî sada xa ǀgui ǂâi tide. 2 Mâ-i hoa-e a i ǁî-i ǀgūkhoe-e ǃgâidī, ǁî-e ǂgoms ǃnâ omkhâis ǃaroma. 3 Xristub* tsîn ge ǁî-aitsama ǂkhîǂkhîsen tama ge hâ i, xawe Xoas ra mî khami: “Satsa ra ǃkhāǃkhā khoen di ǃkhāǃkhādi ge tita ai ge hā.” 4 Xoadi ǃnâ ǀnai xoahe hân ge sada ǁkhāǁkhās ǃaroma xoahe hâ, tanixasib tsî ǀgaiǀgaiǃnâs tsîra Xoade xu hâra ǃnâ-u da nî ǃâubasensa ūhâse. 5 Ab Elob tanixasib tsî ǀgaiǀgais tsîra diba, ǁnāti ī ǂkhîb Xristub Jesub ǂâis ǃoa hâba ǃnare du, 6 î du ǀguiǂâixase ǀgui ams ǀkha Elob tsî ǁGûb sada ǃKhūb Jesub Xristub diba ǂkhaisiba mā.
ǃGâiǂhôas Jodeǁî taman* ǃaroma
7 ǁNā-amaga Xristub ge Elob di ǂkhaisib ǃnâ ǃkhōǃoa du khami ǃkhōǃoagu re. 8 ǁNā-amaga ta ge Xristub ge ǃgaosa khoen di ǃoaba-ao kai ti ge mî, Elob di amab, aboxagu ge mîmâibaheb nî ǁapoǁapohese. 9 Tsîn Jodeǁî tamana Eloba ǁîb di ǀkhomxasib ǃaroma ǂkhaisiba nî māse. Xoas ra mî khami:
“ǁNā-amaga ta ge Jodeǁî taman ǃnâ nî kare tsi
tsî sa ǀonsa nî koaǁnaeba.”
10 Tsî ǁkhawa ra mî:
“ǃGâiaǂgao, Jodeǁî tamado ǁîb di ǁaes ǀkha!”
11 Tsî ǁkhawa:
“Kare ǃKhūba Jodeǁî tama du hoadu,
î ǁîba koa, ǁaeso hoaso.”
12 Tsî ǁkhawab ra Jesajaba mî:
“Isaib surib ge nî hâ
tsîb ge hā tsî Jodeǁî tamana nî ǂgaeǂgui,
ǁîb ǃnân ge Jodeǁî tamana ǃâubasensa nî ūhâ.”
13 Ab Elob ǃâubasens diba ǁîb ǃnâ du ra ǂgom ǃkhais ǃaroma ǃgâiaǂgaob tsî ǂkhîb ǀkha ǀoaǀoa du, îs sadu ǃâubasensa ǃAnu Gagab di ǀgaiba xu ǃnāǂamsase i.
Paulub ge ǁîb sîǂkhanis di ǃaromasa ra ǃgāǃgā
14 Ti ǃgâsado, tita ge ǀoasase sadu ǀkha a ǂkhî, sadu ǂûdu ǃgâisib xa ǀoa hâ, ǀoasa ǂansa ūhâ tsî ǁîǃnābe a ǁgauǃnâgu ǁkhā ǃkhaisa. 15 Xawe ǀnî ǃkhaidi ai ta ge ǁkhoase sadu ǃoa ǂâiǂâiǃnâ du ta nîse ge xoa Elob ge mā te ǀkhommi ǃaroma. 16 Xristub Jesub di ǃoaba-aose, ta nî Jodeǁî taman ǃoa pristersi ǃoabas Elob ǃGâiǂhôas disa aoǁnâse, Jodeǁî taman di ǁguibas nî ūǃoasa tsî ǃAnu Gagab xa ǃanuǃanuhese. 17 ǁNā-amaga ta ge Xristub Jesub ǃnâ Eloba ta ra sîsenba ǃkhais xa ra koasen. 18 Tita ge ǃhoa ta ka o Xristub ge tita ǃnâ-u dīn xa ǀgui nî ǃhoa, Jodeǁî taman nî ǁnâuǀnamxasib kōse danhe ǁkhāse. ǁNāsab ge ti ǃnâ-u mîs tsî dīb, 19 saodi tsî buruxa sîsengu tsî Elob di Gagab di ǀgaib ǃnâ ge dī. Jerusalemsa xu Ilirikums kōse ta ge ǀoasase Xristub ǃGâiǂhôasa ge aoǁnâ. 20 ǁNā-amaga ta ge turaxase ra ǁgū ǃGâiǂhôasa Xristub ge ǀnai ǂgaihe tama hâ i ǃkhaidi ai aoǁnâsa. Î ta tā ǀnî khoe-i di ǃgaoǃgaob ai om. 21 Xawes ge Xoasa ra mî:
“ǁNān ǁîb xa ǂhôahe taman ge nî mû
tsî ǁnâu taman ge nî ǁnâuǃā.”
Paulub ge Romesa sarisa ra ǀapeǁgui
22 ǁNā-amaga ta ge hoaǁae sadu tawa sīsa gere ǂhanihe. 23 Xawe nēsi ǃaruǀî nē ǀkharigu ǃnâ sîsen tama i tsî ta ge ǂgui kuriga sadu tawa sīsa ge ǁkhore, 24 o ta ge nēsi ra ǃâubasen ǁnāti dīsa. Spanjeb ǃoa ta garuse ta ge sadu tawa nî sī tsî ǁaero-e ta ga sadu tawa hâs khaoǃgâ sadu di huib ǀkha ǁnāǀî nî ǃgû. 25 Xawe ta ge nēsi Jerusalems ǁga ra ǃgû Elob di khoena nî sī ǃoabase. 26 Masedoniab tsî Axajab ǀkharikha di kerkhegu ge ǁkhorexase Jerusalems ǃnâ hâ khoen Elob din ǁaegu hâ ǀgâsan ǃaroma ǁguibasa ge mā. 27 ǁÎn ge ge ǃgâiǂâibasen ǁîna huis di ǁguiǂamsan ge ūhâ i xui-ao. Jodeǁî taman ra Jodeǁîn di gagasi ǀkhaegu ǃnâ amǃnâxa, xui-aon ge Jodeǁî tamana ǁîn di ǃhūbaisi xūn ǀkha Jodeǁîna nî ǃoaba. 28 Nē sîsenna dītoa tsî ta ga sadu ge ǀhaoǀhao marisa ǁîn ai ǁkhaeǁnâs khaoǃgâ ta ge Spanjeb ǁga garuse nî sari du. 29 Sadu tawa ta ga sī, o ta ge ǀoasasib Xristub ǀkhaeb dib ǀkha ta nî sī ǃkhaisa a ǂan. 30 ǀKhoma du ta ra ǃgâsado, sada ǃKhūb Jesub Xristub tsî ǀnammi hîa ǃAnu Gagab di ǀkhaeb ǃnâ: Tita ǀkha ti ǃkhams ǃnâ ǀhû, î Elob ǃoa ǀgoreba te re, 31 Judeab ǃnâ hâ ǂgomoǃnâna xu ta nî orehe, tsîs ti ǃoabas Jerusalems ǃoa hâsa Elob di khoen xa nî ūǃoahe ǁkhā ǃkhaisa. 32 Î ta Elob di ǂâisa xu ǃgâiaǂgaob ǀkha sadu tawa sī tsî ǁaero-e sâ. 33 Ab ǂkhîb di Eloba sadu hoadu ǀkha hâ! Amen.*
© Khoekhoegowab Elobmîs © Bible Society in Namibia, 2020.
