ǀKhaexūn ǂgomsaben ǃaroma
1 Tsî ǃanun Jerusalems ǃnâ hân ra dībahe mariǀhaoǀhaosa, Galateǁîn di kerkhega ta ge mîmās ǁkhās khami sadu tsîna dī re. 2 Mâ Sabbattsēs hoasa a i mâ-i hoa-i âdo xū-e ǁguibē, ǁkhāsib â-e ǃoa, îs ǀhaoǀhaosa tā ǁnāpa ta ga sī, o ǀgui dīhe. 3 Tsî sī ta ka, o ta ge ǁnān sadu ge mâi-aiǃâsens sîǂkhanidi ǀkha, sadu ǀkhaeban nî Jerusalems ǃoa sī-ūse mā-amna nî sî. 4 Tsî tita nî ǃgû ǃkhais ga ǂhâbasa, on ge tita ǀkha nî ǃgû.
Paulub di ǃnariǀapeǁguigu
5 Tsî ta ge sadu tawa nî sī, Masedoniab tawa ta ga ǃkharuo, ǁnāpa-u ta nî ǃkharu xui-ao. 6 ǀNîsi ta ge sadu tawa nî hâ tamas ka io saob hoaragaba hâǃkharu, sadu nî hui te, ais ǃoa ta ga ǃgû ǃkhai-i hoa-i ǃoase. 7 ǃKharugaruse ǀgui ta mû du ǂgao tama xui-ao ta ge ra ǃâubasen, ǁaero-e ta nî sadu ǀkha ǃKhūb ga mā-amo hâsa.
8 Xawe ta ge Efeses tawa ǃAnu Gagab di ǁhōǂuis ǁaeb kōse nî hâ. 9 Kai tsî ǂhâǂhâsa dao-am-e ta ǁkhowa-ambahe hâ, xawen ge mâǃoa-aona a ǂgui.
10 Tsî Timoteub ga sīo, kō îb ǃaob ose sadu ǀkha hâ, ǃKhūb di sîsennab ra tita ǁkhāta khami dī xuige. 11 A i khoe-i xare-e tā ǁîba ǃharaxū, î du ǁîba aiǃâb ǁgab ǂkhîb ǃnâ nî ǃgûse hui, tita tawab nî hāse, ǃgâsagu ǀkha ta ǃâu bi hâ xui-ao.
12 Tsî ǃgâsab Apolob xasa, ǁîba ta ge kaise ge ǀkhoma ǃgâsagu ǀkhab sadu tawa nî sī ǃkhaisa, xaweb ge hoaragase nēsib nî sī ǃkhaisa ge ǂâibasen tama hâ i, tsîb ge ega, soa-eb ga hō ǁae-i hoa-i ai nî sī.
ǀUni mîdi tsî tawededi
13 ǂKhaikari hâ, ǂgoms ǃnâ ǁaposase mâ, ǁkhoaǂgaoxa, î ǀgai. 14 An sadu xūn hoana ǀnammi ǃnâ dīhe.
15 ǂAn du a ǃgâsado, Stefanab di omaris din ge ǂgurose Axajab ǃnâ xristeǁî kai tsî ǁî-aitsama Elob khoena ǃoabas ǃnâ mâisen ǃkhaisa. 16 Î du sadu tsîna nēti īna ǃnaka hâba tsî mâ-i hoa-i hîa sadu ǀkha sîsen tsî ra ǀhupuǀhupusen-i tsîna.
17 Tsî ta ra ǃgâiaǂgao Stefanab, Fortunatub tsî Axaikub tsîgu di hās ǂama, sadu ta ra ǁkhui soasa gu ge tita tawa ǀoaǀoa xui-ao. 18 Ti gagas tsî sadu dis tsîna gu ge ge khoakhoa. Nēti īga ǂanǃgâ re.
19 Asiab ǃnâ hâ kerkhegu ra tawede du. Akwilab tsî Priskilas tsîra tsî ǁîra ommi ǃnâ ra ǀhao kerkheb ra ǁkhorexase ǃKhūb ǃnâ tawede du. 20 Hoa ǃgâsagu ra tawede du.
Tawedegu du re ǃanu ǁoas ǀkha. 21 Ti ǂhunuma ǃommi ǀkha ta ge nēsa ra xoa: Tawedes tita Pauluta xu.
22 ǃKhūba ǀnam tama khoe-i, ǁnā-i ge ǀâxarexūhe hâ. Sida ǃKhūtse, hā re!
23 ǀKhommi ǃKhūb Jesub diba ab sadu ǀkha hâ.
24 Ti ǀnamma ab Xristub* Jesub ǃnâ sadu hoadu ǀkha hâ. [Amen.*]
© Khoekhoegowab Elobmîs © Bible Society in Namibia, 2020.
