Romeǁîn 12 - Khoekhoegowab New Translation 2020 (KKG20)

Elob ǃoabas ǃnâ hâ ûib

1 ǁNā-amaga ǃgâsado, Elob di ǀkhomxaǂgaosigu ǃaroma ta ge ra ǀkhoma du, î du sadu sorode ûitsama ǁguibase, ǃanu tsî Elob xa ūǃoahe hâse ǁguiba. Nēs a ama gagasi ǃoaba ǁîb ǃoa hâsa xui-ao. 2 Tā nē ǃhūbaib xa gaoǂamhe, xaweb sadu hoaraga khoesiba sadu ǂâis di ǀasa kaihes xa ǀkharaǀkharahe. O du ge Elob di ǂâisa nî ǁnâuǃā ǁkhā, ǁîs a ǃgâi, ūǃoahesa tsî dīǀoaǀoasa xui-ao.

3 Elob ge mā te ǀkhommi ǃaroma ta ge sadu ǁaegu hâ-i hoa-e ra mîba, î-i ta ǁî-aitsama ǃgôasensa ǃnāǃnā. Xawe mâ-i hoa-e i Elob ge mā-i ǂgoms di ǀnōba ǃoa, ǂuru ǂâiǀgaub ai ǁî-aitsama ǀgoraǃgâsen. 4 ǀGui soros ǃnâ da ǂgui uniǁaede ūhâ xui-aos ge mâs hoasa ǁîs di sîsenna ra dī. 5 ǁNās ǁkhās xase da ge ǂguida a xawe Xristub* ǃnâ a ǀgui soro tsî mâ-i hoa-e nau-i di uniǁae. 6 Sada ge gagasi māde ūhâ, Elob mā da hâ ǀkhommi ǃoa ǃkharagade. Kēbosis di mās kao, a da ǂgoms di ǀnōb hîa da ūhâb ǃoa sîsenū. 7 ǃOaba ra-e a i ǃoaba. Tsî ǁkhāǁkhā ra-e a i ǁkhāǁkhā. 8 Nau-i ǂgaoǂgaoǃnâs di māsa ūhâ-e, a i ǁnāti dī. Māǂgaoxa khoe-e a i ǁnāsa māsenxase dī. ǁKhāsiba ūhâ-i hoa-e a i ôasa. Tsî nauna ra ǀkhomxaǂgao-i hoa-e a i ǁnāsa ǃgâiaǂgaob ǃnâ dī.

9 Ab ǀnamma hînaoǃnâ. ǂKhababa ǁkhan î ǃgâin ǀguina dī. 10 ǃGâsaǀnamguba ūhâ. Tsî nē-e, nau-e ǃgôasiba ǁgausa turaxaba. 11 Turaxasib ǃnâ tā ǀopesa, ǀaexa gagas ǀkha ǃKhūba ǃoaba. 12 ǃÂubasens ǃnâ ǃgâiaǂgao, ǁgâiǀāb ǃnâ mâǀgai, î ǀûs ose ǀgore. 13 Elob di khoen hîa ǂhâb ǃnâ hân ǀkha ǀgoragu tsî hoaǁae khoexasiba ǁgauǂui.

14 Sadu ǃgôaǃgonaona ǀkhae, ǀkhae î tā ǀâxare. 15 ǃGâiaǂgao ran ǀkha ǃgâiaǂgao tsî ā ran ǀkha ā re. 16 ǀGuiǃnâxasib ǃnâ ûi, tā ǀgapiǂâixa, î ǃgamǃgamsen hân ǀkha ǀguiti-ī. Tā ǁîǃgôasen re.

17 Tā ǂkhabab ǀkha ǂkhababa mādawa-am, î khoen hoan aiǃâ ǃgâise dī. 18 Īǁkhā i karao, sadu xu i hâs kōse, hoa khoen ǀkha ǂkhîb ǃnâ ûi. 19 Tā ǀkhao ǀnamsabedo, xawe ab Elob di ǁaixasiba ǁnāsa dī; Xoas ra mî xui-ao: “ǀKhaob ge a ti, tita ge nî mādawa-am, tib ra ǃKhūba mî.” 20 ǁNās ǃās ǃnâs ge Xoasa ra mî: “Sa khākhoe-i ga ǃâo, ǁî-e ǂûmā re, ǁgâ-i kao, ǁî-e āsi re. Nēsats ga dī, ots ge ǀaexa ǂnomde ǁî-i danas ai nî ǀhaoǀhao.” 21 Tā ǂkhabab xa danhe, xawe ǂkhababa ǃgâib ǀkha dan re.