ǃAnu Gagaba xu hâ mādi
1 ǃGâsado, nēsa ta ge gagasi mādi xa ta ǃgāsase nî ǁnâuǃā kai duse ra xoa. 2 ǂAn du ge a ǀūbe du ge i, o du ge ûio ǁgôa-elogu ǃoa gere ǂgaeǂhapuhe ǃkhaisa. 3 ǁNā-amaga ta ra ǁnâuǃā kai du, Elob di Gagab ǃnâ ra ǃhoa-i ge “Ab Jesuba ǀâxarehe” ti a mî ǁoa tsî ǀgui-i khoe-i tsîn ge “Jesub ge a ǃKhū” ti mî ǁoa, ǃAnu Gagaba xu tamas ka io.
4 ǂGui ǃkharaga gagasi mādi ge hâ, xawe di ge ǁkhā Gagaba xu ra hā. 5 ǃKharagaǃnâgu gagasi mādi ǃKhūba ǃoabas didi hâ, xawe di ge ǁkhā ǃKhūba xu ra hā. 6 Sîsenǂuigu a ǃkharaga, xaweb ge a ǁkhā Elo, hoa xūna hoa khoen ǃnâ ra sîsenna. 7 Mâ-i hoa-i ge Gagab di ǂhaiǂhaisa hoan di ǃgâib ǃoa ra māhe. 8 ǀGui-i ge gā-ai mîde ǃhoas di ǁkhāsiba ra māhe tsî nau-e ǂans di mîsa, xawe ǁkhā Gagaba xu. 9 ǀNî-e ǂgoms di māsa tsî nau-e ǂgauǂgaus di māde, ǁkhā Gagaba xu. 10 ǀGui-e buruxa sîsenga dīs di ǀgaiba, nau-e kēbosisa, ǀnî-e ǃgâi tsî tsū gagadi ǁaegu ǀgoras māsa, nau-e ǃkharaga gowagu di ǂansa tsî ǀnî-e gowaga ǁguiǃāsa. 11 ǀGui Gagab ǀguib ge hâ, ǁkhā Gagab hîa nē xūn hoana ra sîsenni, mâ-i hoa-e ǁîb ra ǂgao khami ra māba.
ǀGui soros ge ǂgui uniǁaede ūhâ
12 Soros a ǀgui tsî ǂgui uniǁaede ūhâs ǁkhās khami, tsî ǂgui uniǁaedi a ǀgui soros ǁkhās khamis ge Xristub* sorosa ī, 13 sada hoada ǀgui Gagaba xu ǀgui soros ǃnâ ǁāǁnâhe hâ xui-ao. Nēsi da ga Jodeǁî, Grikeǁî, khobo tamas ka io ǃnorasas hoasa da ge ǀgui Gagab ǃnâ ra amǃnâxa.
14 Soros ge ǀgui uniǁaes ǀguisa xu hâ tama hâ, xawe ǂgui uniǁaede xu hâ. 15 ǂAis ga “ǃOm tama ta tsî ta ge soros di ǃâ tama” ti mî ǃkhais ge soros di ǃâsisa xus ǀgorahe hâ ti ǂâibasen tama hâ. 16 ǂGaes ga “Mû tama ta tsî ta ge soros di ǃâ tama” ti mî ǃkhais ge soros di ǃâsisa xus ǀgorahe hâ ti ǂâibasen tama hâ. 17 Tsî soros hoas ga mû hâ io, o ǁnâu ǁkhās ga hâ? Tsî hoaraga soros ga ǂgae hâ, o ǃkhapa ǁkhās ga hâ? 18 Xaweb ge Eloba soros ai uniǁaede, mâs hoasa ǁîs di ǃkhais ai ge mâi, ǂgaob ra khami. 19 Hoadi ga ǀgui uniǁaes ǀguisa i hâo, o da ge soro-i xa ga ǃhoa tama hâ. 20 ǂGui uniǁaede da ge ūhâ, xawe ǀgui soros ǀguisa. 21 Mûs ge ǃomma ǃoa “Satsa ta ǂhâba tama” ti a mî ǁoa tsîs ge danasa ǁkhāti ǂaira ǃoa “Saro ta ǂhâba tama” ti a mî ǁoa. 22 ǁKhātis ge sorosa ǂkhabusase ra mûsen uniǁaedi tsîna ǂhâba hâ. 23 ǁNā uniǁaedi ǀoro ǃgôasiba ūhâ ti da ra ǂâide da ge kai ǃgôasiba ra mā, tsî ǁnā uniǁaedi soros didi hîa taotaosa di ase ra ǃgapaǀîhede, kai ǂâisa ra ǂnûi-ai. 24 Anusase ī uniǁaedi ge ǀō-aisa ǂâisa ǂnûi-aihesa ǂhâba tama hâ, Elob ge ǁnāti sorosa ǃamǁare tsî kai ǃgôasiba ǁnā uniǁaedi ǁnāsa ǂhâba hâde mā xui-ao. 25 ǀGora-i soros ǃnâ hâ tide tsî di uniǁaede ǁîǃnābe ǀguitikōse nî ǂhansenbaguse. 26 Tsî ǀgui uniǁaes ga tsâ, o di ge hoa uniǁaede ra tsâǀhao tamas ka io ǀgui uniǁaes ga ǃgôasiba māhe, o di ge hoa uniǁaede ra ǃgâiaǂgaoǀhao.
27 Sadu ge a Xristub di soro tsî i ge mâ-i hoa-e, ǁnā soros di uniǁae. 28 Tsîb ge Eloba kerkheb ǃnâ ǂgurose apostelgu,* ǀgamǁîse kēbo-aon, ǃnonaǁîse ǁgauǃnâ-aon, ǁnās khaoǃgâ buruxa dīna ra dīn, ǂgauǂgaus māde ūhân, nauna huis di māsa ūhân, ǂgaeǂgui-aon tsî ǃkharaga gowagu ǂansa ūhân tsîna ge ǁgaumâi. 29 Hoana a apostel? Hoana a kēbo-ao? Hoana a ǁgauǃnâ-ao? Hoana buruxa sîsenga ra dī? 30 Hoana ǂgauǂgaus māde ūhâ? Tamas ka io hoana ǃkharagaǃnâgu gowaga ra ǃhoa? Hoana ra ǁguiǃā? 31 Hoan xa ǂoaǂamsa māde du ge nî ǁgūba.
O ta ge ǁnā ǂoaǂamsa daoba nî ǁgau du.
© Khoekhoegowab Elobmîs © Bible Society in Namibia, 2020.
