1 “Leviatanna ǁgabeb ǀkha ǃkhō ǁkhāts a,
tamas ka io ams âba tsurib ǀkha ǃgaeǂgan ǁkhāts a?
2 Tsuriba ǁîb ǂguis ǃnâ-u ǃkhāǃkharu ǁkhāts a,
tamas ka io ǁîb ǃnanikha ǁgabeb ǀkha ǃkhāhō ǁkhāts a?
3 ǁÎba ǀkhomhes ǃaroma satsa nî ǀkhoma
tamas ka io ǃgâi mîdi ǀkha satsa nî ǁgoasen?
4 ǀHûǀguisab sats ǀkha nî dī,
sa ǃgāseb nî hoaǁae hâse?
5 Aniro-i ǀkha ra ǀhuru khamits ǁîb ǀkha nî ǀhuru,
tamas ka iots ǁîba tsurib ǀkha nî ǃgae, sa ǃgādi ǃaroma.
6 ǂHarugu-aoga mâtikō marisa gu ǁîb ai ǂgansa nî mîǁgui?
ǁÎba ǂharugu-aogu ǃnâ nî ǀgoraǂgāhe?
7 ǁHâigôab ǀkha ǁîb khōb ǃnâ ǁhâiǃkharu ǁkhāts a
tamas ka io ǁgabeb ǀkha ǁîb danas ǃnâ-u?
8 Sa ǃomkhats ga ǁîb ǃoagu ūkhâi
tsî ǁnā ǃkhams xa ǂâi-o,
ots ǁnāsa ǁkhawa dī tide.
9 “Mû, ǁîba ǃkhōs di ǃâubasens ra ǃan kai tsi;
ǁîba mûs ǀkhats ge ǀnai ra ǂkhabuǂâi.
10 ǁÎb ge ǁaixasa, ǃhuriǃhuri bits kao.
Tari-e ǁnâi ǁîb aiǃâ a mâ ǁkhā?
11 Tari-e ǁîba ǂoeǂoe tsî ǃnorasase ra hâ ǂgao?
ǀHommi ǃnaka hân hoan ge a ti.
12 “Leviatanni di ǀnūgu, tamas ka io ǀgaib
tamas ka io kuruǀgaub xa ta ge ǃhoaǀû tide.
13 Tari-e ǁîb khōba nî ǀkhauǁnâ,
tamas ka io ǁîb ǀgamǃnâgu khōba nî ǃkhāǃkharuǃnâ?
14 Tari-e ǁîb ǃnanikha nî ǁkhowa-am?
ǁîkha ge ǃaoǃaosa ǁgûga ūhâ.
15 ǁÎb ǁâb ge ǁgoesaogu hâ ǂkhōrogu ǀkha a kurusa,
ǀgūguse ǁgoesaogub ǃnâ karosase a kuruǂgansaga.
16 ǁÎgu ge ǂoa-i xare-i ǃkharu tidese
kaise ǀgūguse a ǀgoeǁaesa.
17 ǂKhorogu ge ǀgūguse kuruǀhaosa;
ǀgorahe ǁoasegu ge a ǂaeǁaresa.
18 ǁÎb ga tsî, o di ge nanide ra ǂoaxa;
tsî ǁîb mûra ge soreǁhaib ǀkhâugu khami ǀapa.
19 ǁÎb amsa xub ge ǀaeǁhabuba ra ǂoaxa,
tsîdi ge nanide ǂoab ǃnâ ra khâi.
20 ǁÎb ǂgui-āra xub ge ǀanna ra ǂoaxa,
ǀaes ai mâ ra ǀgû sūsa xus khami.
21 ǁÎb ǀommi ge ǀaesa ra ǃkhāǂhubi;
ǁîb amǃnâba xu gu ge ǀaeǁhabuga ra ǂoaxa.
22 ǁÎb ǃaos ǃnâb ge ǀgaiba ǁan hâ
tsî ǁîba ra mûn hoan ge ǃaob xa ra ǃkhōhe.
23 ǁÎb ǁgan-i ge ǁaposase a ǀhaoǀhaosa;
ǁî-i ge ǁaposa tsî a gongonheǁoasa.
24 ǁÎb di ǂgaob ge ǃgareǀuib khami ǃgari,
tsî ǃnaka ra ǂnû ǁkhamiǀuis khami.
25 ǁÎb ga gon, on ǀgaisan tsîna ǃaob xa ra ǃkhōhe;
ǁîn ge ǁnātimîsi ra ǃkhoeni.
26 Gôab ǀkhats ga ǃkhā bi, xawets xū-e dī bi ǁoa;
tamas ka io sommi, ǂāb tsî ǁhâigôab tsîgu ǀkhas tsîna.
27 ǁÎb tawab ge ǀuriba ǃhoroǀgâb khami ī
tsî brons-e gunu hâ ǀaeb khami.
28 Khās tsî ǂāb tsîn ǀkhats ge ǁîba ǃaoǃao ǁoa,
slengers ǀuirodi ge ǁîb ai ra ǀgaruǃā.
29 ǃHôas ǀkhas tsînats ge ǁîba xū-e a dī ǁoa;
ǁîb ge ǁhâigôagu di ǀōba ra âiǂui.
30 ǁÎb ǃnāb ai ǁgoe ǂkhorogu ge
ǀā sūǂkhorogu khami mâ;
ǃhorotsautsau-ūxūs gôagu khami
daoga ǂgoab ǃnâ ra ǁgui.
31 ǁGammi di ǃgamsibab ge
sūs khami ra xora kai.
Goaǁhabu ra ǃgâiham-olisūs
khamib ge huriba ra ǁaiǁai.
32 ǃGâbǀkhāb aib ge mûmûsa ǂkhaira daoba ra tsâǁgui;
ǃuri ǀgareba ūhâ khamib ge ǁgamma ra mûsen.
33 ǁÎb khami ī kurusabe-ets ge ǃhūbaib ai hō tide,
ǃao-i xare-e ūhâ tama kurusabe-e.
34 ǁÎb xa kai ǀgurun tsînab ge ǃharaxūb ǀkha ra kō;
kai ǀgurun hoan di gaob ge ǁîba.”
© Khoekhoegowab Elobmîs © Bible Society in Namibia, 2020.
