ǂGuro ǃnani ǂganamxūdi di ǁkhowa-amhes
1 Tsî ta ge ǁKhaoba ǂguro ǂganamxūsab ra ǁkhowa-amse ge mû tsî haka ûitsama kurusabegu* di ǀguiba, ǃgurub xase ra ǀō dommi ǀkhab “Hā!” ti ra mîse ge ǁnâu. 2 Kō ta ge, o ta ge ǃuri hāba ge mû tsî ǁîb ai ǃgapi hâba, khāsa ǃomǁae ūhâse. Tsîb ge ǁîba dans kronsa ūhâse xawe ǁkhāti dansa nî ūhāse ge ǃgapiǂoa.
3 Tsî ǁKhaob ge ǀgamǁî ǂganamxūsa ǁkhowa-am, o ta ge ǀgamǁî ûitsama kurusabeba ge ǁnâu “Hā!” tib ra mîse. 4 Ob ge ǀnî hāb, ǀapaba ge ǂoaxa. ǁÎb ai ǃgapi hâb ge ǂkhîba ǃhūbaiba xu ūbēs di ǀgaiba ge māhe, khoen nî ǁîǃnābe ǃgamguse. ǁÎb ge kai gôaba ge māhe.
5 Tsî ǁKhaob ge ǃnonaǁî ǂganamxūsa ǁkhowa-am, o ta ge ǃnonaǁî ûitsama kurusabeba “Hā!” tib ra mîse ge ǁnâu. Tsî kō ta geo ta ge ǂnū hāba ge mû. Nē hāb di ǃgapi-aob ge ǀnō-ūdaba ǁîb ǃomǁae ge ūhâ i. 6 Tsî ta ge dom-i haka ûitsama kurusabegu di ǁaeguba xu hâ khami ra ǀō-e ge ǁnâu “ǀGui hakaǁîǃâs di ǃhoro-e ǀgui denars* ai tsî ǃnona hakaǁîǃâs gerstǃhoro-e ǀgui denars ai, xawe tā oli-i tsî ǂauxûi-i tsîna ǂkhôa” ti ra mî-e.
7 ǁKhaob ge hakaǁî ǂganamxūsa ǁkhowa-am, o ta ge hakaǁî ûitsama kurusabeba ge ǁnâu “Hā!” tib ra mîse. 8 Kō ta ge o ta ge ǀhai-īsiba ūhâ hā-e ge mû. ǁNāpa ge ǃgapi hâ ib ge ǁŌb ti gere ǂgaihe tsî kaise ǀgūse ǁîb ǃgâb ai gere saob ge ǁŌhân Hâǃkhaiba. ǁÎkha ge hakaǁîǃâb ǃhūbaib dib ǂama ǁkhāsiba ge māhe, torob, ǃâtsūǀkhāb, ǀaesenain tsî ǃhūbaib di ǀgurun ǀkha ǃgamsa.
9 Tsî ǁKhaob ge koroǁî ǂganamxūsa ǁkhowa-am, o ta ge altars ǃnaka ǁnān, hîa Elob di mîsa ǂhôa tsî ǂgomǂgomsase gere ǃkhō-amn tsî ge ǁnās ǃaroma ǃgamhen di ǀomde ge mû. 10 Tsîn ge ǁîna ǃgari dommi ǀkha gere ǂgaiǂui: “Hoaǀgaixa ǃKhūtse, ǃanu tsî a amatse! Mâǁaeb kōsets kha ǁnān hîa ǃhūbaib ai hâna ǀgoraǃgâ tsî ǁkhara tide, sida ǃgamhes ǃaroma?” 11 Tsî mâ-i hoa-i ǁîn di-i ge ǃuri saraba māhe tsî ge mîbahe ǂkhari ǁaeroban nî tanixa ǃkhaisa; ǀoasa ǃgôab di ǀhûǃoaba-aon tsî ǂgomsaben ǃKhūb din nî ǃgamhes kōse.
12 Tsî ta ge ǁKhaoba ge mû, ǃnaniǁî ǂganamxūsab ra ǁkhowa-amse. Tsîb ge ǁnāpa ǀgaisa ǃhūǂgubiba ge hā, tsîs ge soresa ǀhaosara-i, ǃoab di-i khami ge ǂnū tsîb ge ǁkhâba ge ǀaoǀapa. 13 ǀHommi di ǀgamirodi ge ǃhūbaib ai ǀnomahais di ǂûn hîa ǁan taman hâ hîa ǀgaisa ǂoa-i xa ra ǃgomǁnâhen khami ge ǁnā. 14 Tsî ǀhommi ge xamikhâihe ra ǂkhani-i khami ge kā tsî mâ ǃnâu-i tsî ǃnāǃnui-i hoa-i ge ǁî-i di ǃkhaisa xu ge ūbēhe. 15 Tsî ǃhūbaib di gao-aogu, ǂgaeǂgui-aogu tsî toroǃnandi ǂamkhoegu, ǃkhū hâgu tsî ǀgaisagu tsî hoaraga khoen, khobon tsî ǃnorasan ge ǁhoadi tsî ǁhāgu ǃnâ gere gaugausen. 16 ǁÎn ge ǃhomgu tsî ǃgareǀuigu ǃoa ge mî: “ǁNā-ai da, î gaugau da ǁNāb hîa trons ai ǂnôab di ais tsî ǁKhaob di ǁaiba xu! 17 ǁNā kai Tsēs ǁîkha ǁaib dis go hā xuige tsî tari-e ǁîs aiǃâ nî mâ ǁkhā?”
© Khoekhoegowab Elobmîs © Bible Society in Namibia, 2020.
