Jesaja 34 - Khoekhoegowab New Translation 2020 (KKG20)

Elob ge ǁîb khākhoena nî ǁkhara

1 ǃHaoso, ǀgūse hā re! ǁAeso ǃgaoǃgâ re! Ab ǃhūbaib tsî ǁîba ra ǀoaǀoan hoana ǁnâu; ǃhūbaib tsî ǁîba xu ra ǀkhīn hoana. 2 ǃKhūb hoaraga ǁaedi ǃoagu ǁaixa tsî ǁîn toroǂnubidi tsîn ǀkha ǀara hâ xui-ao. ǁÎb ge ǁîna ge ǀâxare tsî ǁîna ǂāhen nîse ge māǁnâ. 3 ǁÎn ǂāhe hân ge ǁkhōhe tamase nî ǁnāxūǁguihe, ǁîn di ǁō hâ sorodi ge nî ǀō; ǃhomga xūb ge ǁîn ǀaoba nî dâu. 4 ǀHomaib ai hâ xūn hoan ge nî kā, tsîb ge ǃāǂuisaba xamiǂkhani-i khami nî xamikhâisen. Hoaraga ǀgamirodi ge nî ǁnā, ǂgonab ai hâ ǂnare-i ra ǂnâ tsî ǁnā khami, tamas ka io ǀnomahais ai ǂnôa ǂûn ra kā khami.

5 Ti gôab ge ǀhomaib din hoana go dītoa. Mû, ǁîb ge Edomma nî ǁnāǂam, khoen hîa ta ǀâxareb ǀkha nî ǀgoraǃgâna. 6 ǃKhūb ge gôaba ūhâ; ǁîb ge ǀaob ǃnâ a ǂgomsa, ǁîb ge kaub ǀkha a ǃgū-aisa; ǁkhaon tsî pirin ǀaob ǀkha, baigu ǃnaidi kaub ǀkha, ǃKhūb Bosras ǃnâ ǁguibasa ūhâ xui-ao, Edomǃhūb ǃnâ hâ kai ǃgamǂuis ǃoa. 7 ǃGarob gomagu ge ǁîn ǀkha nî ǂāhe tsî ǂkham gomagu tsî ǀgaisa ǁgōgu ǀkha. ǃHūbaib ge ǀaob xa nî ǀapa tsî ǁîn ǃhūb ge kaub xa nî ǃgū-aihe. 8 ǃKhūb ǀkhaos di tsēsa nî ūhâ xui-ao, kurib matare-oas diba Sions ǃaroma.

9 Edommi ǃāgu ge tēr-i ǃnâ nî ǀkharaǀkharasen tsî ǁîs ǃhūba sulfuri ǃnâ. ǁÎs ǃhūb ge ǂhubi ra tēr-i khami nî ī. 10 ǁÎb ge tsuxub tsî tsēs tsîna ǀarihe ǁoase nî ǂhubi; ǀanni âb ge ǀamos kōse ǀgapise nî khâi. Ôananôaguba xu ôananôagub kōseb ge ǁîba xū-e dī-aihe ǁoase nî ǁgoe. Khoe-i xare-i ge ǁîb ǃnâ-ū ǁkhawa ǃkharu tide. 11 ǀAun tsî tsuxu-anin tsîn ge ǃhūba nî ǁan-ai; ǀhonon tsî goran tsîn ge ǁîb ai nî hâ. ǃKhūb ge ǀgaruǀgarus ǁgaraba ǁîb ǂama nî ǂgae tsî hîkākās ǀuidi ǀkha nî ǀnō. 12 ǁÎn ge ǁîba ǃaruǀî gaosib ase ǂgai ǁkhā tide tsî ǁîb gao-aogu hoagu ge nî bē. 13 Gao-omgu ǃnân ge ǁkhūna nî ǁhai; ǀkhininin tsî ǁîǁhain ge omǂnamisa ǃādi ǃnâ nî ǀomkhâi. ǀGirin ge ǁnāpa nî ǁan tsî ǀamin tsîn ge ǁnāpa nî hâ. 14 ǃGaroǀhôan ge ǃgaroǀgurun ǀkha nî ǁae, piriǁgâuagu ge nî ǂgaigu; ǀnoren tsîn ge ǁnāpa nî sâ tsî ǁîn ǃaroma ǁnāpa sâǃkhai-e nî aiǂhomi. 15 ǁNāpan ge ǀhonona omde kuru tsî ǃupuna nî ǁgoe; ǁîn ge ǁnāpa khore tsî nî kōǃgâhe, mâ-i hoa-e ǁî-i di ǃnôab ǀkha. 16 ǃKhūb ǂkhanisa ôa, î khomai: Nē xūn ǀgui-i tsîn ge kā tide. Xū-i xare-i ge horesa-i ose hâ tide. ǃKhūb ge nēsa mîmā tsî ǁîb gagab ge ǁîna ǀhaoǀhao xui-ao. 17 ǁÎb ge ǂnōgusa aos ǀkha ǃhūba ǀgora tsî mâ-i hoa-e ǃâ-e ge mā. ǁÎn ge ǀamose ǁnāpa nî hâ; ôananôaguba xu ôananôagub kōsen ge ǁnāpa nî ǁan.