Jerusalems xa hâ ǂhôas
1 Nēs ge ǃgoaǃnāb ai-i xa hâ ǂhôasa.
Tare-i ǃaroma du hoado omdi ǂamǃnâgu ai ge ǂoa? 2 Khâikhâisens ǂkhupib tsî ǁgauoǃnâ ǁâudīǀōgu xa ǀoa hâ ǃās ge. Xawe ǃgamhe gen ge gôab xa tamas ka io torob ǃnâ ǁō tama hâ.
3 Sadu toroǃkhōdana-aogu hoagu ge ǀguipa ge ǃkhoeni; ǁîgu ge khās ose ǃkhōsis ǃnâ ge ūhe. ǃNūsen ge ǃkhoeni, xawen ge hoana hōhe tsî ǃkhōsis ǃnâ ge ūhe. 4 ǁNā-amaga ta ge ge mî: “Tā tita kō! Tita ge tsûsase ra ā. Tā tita ti ôas di ǁaes di hîkākāhes ǃaroma ǁkhaeǂgao.” 5 ǃKhūb Elob Hoaǀgaixab ge ǃau-āb, kai ǃgurub tsî kai ǀgommi tsēsa ai-i ǃgoaǃnāb tawa ge ǀapeǁgui. ǂNubiǂgoagu ǁnās tsî ǃhomgu ǃoa hâ huiǃau-āb ǀguib.
6 Elammi toroǃkhamaogu ge khādi tsî ǂāgu tsîn ǀkha ǁâtanisen hâse torokunidi tsî hāgu ai ǃgapi hâse ge hā; Kirs toroǃkhamaogu ge ǁkhaukhōde ge ūhâ i. 7 Îsa ǃgoaǃnāgu Judab digu ge torokunidi xa ge ǀoa hâ i tsî toro hāǃgapi-aogu ge ǂgâ-amdi tawa ge mâ. 8 Judab ge ǃaruǀî ge ǁkhaubasen ǁoa i.
ǁNā tsēs ai go ge sago Haiǀgoms Ommi ǃnâ ge sâusa i ǁâtanin ai ge ǂgomaiǂnûi. 9 Sago ge Davidi ǃĀs ǃnâ di ǂgui khôaǃkhaide hâsa ge mû, tsî go ge ǂamse ǁgoe ǃkhubiba xu ǁgam-e ge xuribasen. 10 Sago ge Jerusalems omde gere ǃgôa tsî go ge omǂnamiba ǀgaiǀgais ǃaroma omde gere khôaǁnâ. 11 ǀGam ǂnubiǂgoakha ǁaegu gu ge ǁgam-i sâuǃnâ ǃkhaisa ge kuru. Xawe go ge ǁîsa ge kuruba kō-ôa tama ge i tamas ka io ǁîsa ge ǀnai ǀapeǁguiba ǃgôaǃgâ tama ge i.
12 ǁNā tsēs aib ge ǃKhūb Elob Hoaǀgaixaba ā tsî du nî ǃoa ǃkhaisa ge mîmā, sadu danade ǂkhom tsî du ǃoasarana nî anase; 13 xawe ǃgâiaǂgaob tsî ǁâudīb ǀguib, gomaga ǃgam tsî gūna ǂās ǀguis, ǁgan-e ǂûs tsî ǂauxûiba ās ǀguis. “A da ǂû tsî ā, ǁari da nî ǁō xuige.”
14 ǃKhūb Elob Hoaǀgaixab ge aitsama tita ǃoa ge mî: “Amase ǁōts nîs kōseb ge tsūdīb âtsa ǀûbahe tide,”
tib ge ǃKhūb Hoaǀgaixaba ra mî.Sebnab ǃoa hâ ǃkhâikhoms
15 Nēs ge ǃKhūb Elob Hoaǀgaixab ra mîsa: Sebnab, gao-ommi mûǂamaob ǃoa ǃgû, î ǁîba sī mîba: 16 “Tare-ets nēpa ra dī? Tarits tits ǂâi hâ ots nēpa, nē ǀgapiseb ǃnâ, gao-ao-i khami ǀhoba-e ra ǁhāǂuibasen, hâǃkhai-e ǃgareǀuib ǃnâ ra kurubasen-i khami? 17 Mâtikōsets ga ǂhâǂhâsa, xaweb ge ǃKhūba ūkhâi tsi tsî ǃnūse nî aoxū tsi! 18 ǁÎb ge satsa ǃgupuǃgupu tsi tsî hara ǃhūb ǃnâ nî aoǂgā tsi. ǁNāpats ge nî ǁō tsî sa ǂnīsa torokunidi ge ǁnāpa nî aoxūǁguihe. Sats ge sa ǀhonkhoeb omarisa taotaosase ība! 19 Sa sîsenǃkhaisa xu ta ge nî ūbē tsi tsîts ge sa ǃharosa nî ǀhana tsi.”
20 ǃKhūb ge Sebnab ǃoa ge mî: “ǁNā tsēs ai ta ge ti ǃgāb Eliakimmi, Hilkiab ôaba nî ǂgaihā. 21 Tita ge ǁîba sa saraba ǂgaeǂgā tsî kamanaǃgaesenni âts ǀkha ǁîba nî ǃgae. Sa ǁkhāsib ǀkha ta ge ǁîba nî ǀnau tsîb ge ǁîba Jerusalems ǁanǂgāsaben tsî Judab ommi din tsîna ǁgûse nî ība. 22 Tita ge Davidi ommi di ǁkhowa-amma ǁîb ǃereamsa ǁîb ai nî ǁgui; ǁîb ga ǁkhowa-am, o-i ge khoe-i xare-e ǂganam tide; ǁîb ga ǂganam, o-i ge khoe-i xare-e ǁkhowa-am tide. 23 ǃNorasa ǃkhais ai ta ge ankerǀurib khami ǁîba ǁaposase nî mâi tsîb ge ǁîba ǃgôasib di trons ase ǁîb aboxan omarisa nî ība. 24 ǁÎb ain ge hoaraga ǃgommi aboxan omaris diba nî ǁgui, ǁîb di surib tsî ôananôagub tsîna ǃkhōǂgā hâse. Hoaraga ǂkhari xapan, ǃoredi tsî ǁgamxapagu tsîn hoan ge nē ankerǀurib ai nî ǂgāmâihe! 25 ǁNā tsēs aib ge ǃKhūb Hoaǀgaixaba nî mî: ‘Ankerǀurib ǁaposa ǃkhais ai ge mâiheb ge nî ǁnā; ǁîb ge ǃgaoǁnâhe tsî nî ǁnā, tsî ǁîb ai ge ǂgāmâisa i ǃgommi ge nî ǁnā’ ”
tib ge ǃKhūb ra mî.© Khoekhoegowab Elobmîs © Bible Society in Namibia, 2020.
