Babilons di ǁnās
1 Nēs khaoǃgâ ta ge ǀnî ǀhomǃgāb ǀhomma xu ra ǁgôaxaba ge mû. ǁÎb ge kai ǁkhāsiba ge ūhâ i tsî ǁîb di ǂkhaisib ge ǃhūbaib hoaragaba ge ǃnâǃnâ. 2 Tsîb ge ǃgari dommi ǀkha ge ǂgaiǂui:
“ǁNās ge go!
Kai Babilons ge go ǁnā!
Tsîs ge go ǁgâuagu* di ǁanǃkhai kai,
hoa ǃanuoǃnâ gagagu
tsî ǃkharagaǃnâgu ǁgaisi tsî
ǃanuoǃnâ anin
tsî ǀgurun
di sâuǃkhais ase.
3 Hoa ǁaedi ge ǁîs ǂauxûib
ǀaib dib xa ge ǀhoro.
Gao-aogu ǃhūbaib digu
ge ǁîs ǀkha gere ǀai.
Tsî mâ ǂharugu-aob ǃhūbaib dib hoab ge ge ǃkhū,
ǁîs ûiǀgaub di ǁkhāsiba xu.”
4 Tsî ta ge ǀnî dommi ǀhomma xu nēti ra mîba ge ǁnâu:
“Ti khoedo ǂoaxa! ǁÎsa xu ǂoa!
Tā ǁîs di ǁoreb ǃnâ ǁhao;
î du tā ǁîs di ǁkharab ǃnâ amǃnâxa!
5 ǁÎs di ǁoreb ge ǀhommi kōse ge sī,
tsîb ge Eloba ǁîs di ǂkhaba daoga ǀuru tama ge i.
6 Sados ge dī-ūs ǁkhās xase ǁîs tsîna dī-ū re;
dīs gen hoan ai ǀgamǃnâguse mādawa-am si re.
ǁÎs di ǀgabisa ǀgam ǃnāra ǃnāsase
sados ge ǂnâbas xa ǀoaǀoa re.
7 ǁÎsa ǁnātikō ǃoab tsî tsûba mā re,
ǁîs ra ǁî-aitsama koasenū ǂkhaisib tsî ǂoaǂamsa ûib tsîn xa.
ǂGaob âs ǃnâs ge ra mîbasen:
‘Nē ta ge ǂnôa, gao-aose!
Tita ge ǃoatara tama hâ,
tsî ta tātsēs tsîna ǃoa-e ǂan tide.’
8 Tsîs ge ǁîsa nēs ǃaroma ǀgui tsēs ǃnâ
tsûtsû-ain ǀkha nî ǂnauhe,
ǀaesenain, ǃoab tsî ǃâtsūǀkhāb tsîn ǀkha.
Tsîs ge ǁîsa ǀaes ǀkha nî khauǃkhūhe
ǃKhūb Elob, ǁîsa ra ǀgoraǃgâb a ǀgaisa amaga.”
9 Tsî gu ge ǁnā gao-aogu ǃhūbaib digu, ǁîs di ǀaib tsî turagu ǃnâ gere ǁhaoga ǃās ǂama ǃoa tsî nî ā, ǀanni ǁîsa ra hîkākā ǀaes diba gu ga mûo. 10 ǁÎgu ge ǁîs ra tsâ tsûba ǃaob xa ǃnūse mâ tsî nî mî:
“Tsūba si! Tsūba si!
Sas kai tsî ǀgaisa ǃās Babilonse!
ǀGui iri ǃnâb ge sa ǁkharaba go hā!”
11 ǁKhāti gu ge ǃhūbaib di ǂharugu-aogu tsîna ā tsî ǁîs ǂama gere ǃoa, khoe-i xare-i ǁîgu di xūna ǃaruǀî ǁama tama xui-ao. 12 ǁÎgu di ǃhuniǀurib, ǀhaiǀurib, ǂoaǂamsa ǀuidi tsî pereldi; tsaura lapigu, ǂhoaǀapa saran, saib tsî ǃnâsaǀapa ǃkhain, hoaraga ǃgomhōsa haiǃnôan, ǂkhoaǁgûgu ǀkha kurusa ǂgui ǃkharagaǃnâgu xūn tsî ǃgomǀgausa hain ǀkha kurusa xūn, brons-i, ǀurin tsî marmeri ǀkha kurusan ge khoe-i xare-i xa ge ǁamahe tama hâ i. 13 ǁKhāti kanel-i, ǃgâihamxūn, ǃgâihamoli-i, miren, ǂhubihe ra ǃgâihamxūn, ǂauxûib tsî oli-i, mel-i tsî ǃhorob, goman tsî gūn, hān tsî hākunidi, khobon tsîn ge ge ǁamahe tama hâ i. 14 O gu ge ǁamaxū-aoga ǁîs ǃoa ge mî: “Sas gere tura xūn hoan ge go kā tsî sa hoaraga ǃkhūsib tsî ǂkhaib ge go bē tsîs ge ǁîna ǁkhawa hō tide!” 15 ǂHarugu-aon, nē ǃās ǃnâ ǂharugus xa ge ǃkhūn ge ǃnūse mâ tsî nî kō, ǁîs di tsâb ǃnâ ǁhaosan ra ǃao amaga. Ā tsî ǃoa 16 tsîn ge nî mî:
“Tsūba si
kai ǃāse!
ǁÎs ge ǁgā lapib,
ǂhoaǀapa
tsî ǃnâsa ǀapab ǀkha ge ǂgaeǂgāhe hâ i.
Tsîs ge ǃhuniǀurib,
ǃgomǀgausa ǀuidi
tsî pereldi ǀkha ge anisen hâ i!
17 Tsîs ge ǀgui iri ǃnâ
nē hoaraga ǃkhūsiba ge ǂoaǃnâ!”
Hoaraga doe-omdi di ǂgaeǂgui-aogu tsî ǃnariǀhao-aon, doe-omdi ai ra sîsen khoen tsî ǁnān hîa huriba xu ûi hân ge ǃnūse mâ 18 tsî ǁîsa ra hîkākā ǁhabub di ǀannan gere mûo gere ā. Tsîn ge “Tātsē xawe i ge nē ǃās khami ī ǃā-e ge hâ tama hâ i” ti gere mî. 19 Tsîn ge danadi ân ai tsaraba tsoro tsî ǃoa tsî ra āse gere mî:
“Tsūba si
kai ǃāse,
doe-omde ūhân hoan
ge ǁîs di ǃkhūsib
xa ge ǃkhū!
Xawes ge ǀgui iri ǃnâ
hoaraga xūn âsa ge ǂoaǃnâ!”
20 ǃGâiaǂgao re ǀhomtse,
hoa ǃanudu,
apostelgu* tsî kēbo-aogo!
Elob go Babilonsa sadu ǃoagus ūhâ ǀgoraǃgâs
ǃaroma a ǀgoraǃgâ xuige.
21 O i ge ǀgaisa ǀhomǃgā-e ǁkhamiǀuis khami kō kai ǀuisa ūkhâi tsî hurib ǃnâ aoǂgā tsî ge mî: “Nētis ge kai ǃās Babilonsa ǀgaib ǀkha nî aoǂnûihe tsî tātsēs tsîna ǁkhawa mûhe tide. 22 Harpdi di ǀōb tsî khoen di domgu tsî xâiǁnâde ra xâin ge ǁkhawas tsîna sas ǃnâ ǁnâuhe tide. ǂHarugu-ao-i xare-i ge sas ǃnâ hōhe tide, tsîb ge ǁkhāti ǁkhamiǀuis di ǀōb tsîna ǁkhawa ǁnâuhe tide. 23 Tātsēs tsîna i ge ǃamǀae-i di ǃnâ-e sas ǃnâ mûhe tide; ǃgame-aogu tsî ǃgametaradi tsîn di domgu ge ǃaruǀî sas ǃnâ ǁnâuhe tide. Sa ǂharugu-aogu ge ge ǃhūbaib di kai, tsîs ge sasa ǃgaib âs ǀkha ǃhūbaib di khoena ge ǂgaeǂhapu.”
24 Babilons ge kēbo-aogu tsî ǃanun di ǀaob ge ǁîs ǃnâ hōhe ǃkhais ǃaroma ge ǁkharahe, ǀaob ǃhūbaib ai ge ǃgamhen hoan diba.
© Khoekhoegowab Elobmîs © Bible Society in Namibia, 2020.
